Nau Mprơ Ơm 37 - Nau Brah Ndu Ngơi 2023

Ueh maak bunuyh rnơm nsing ma Brah Yêhôva

Nau Mprơ Ơm Y-Đavit

¹ Lơi ta rngot may nơm yor phung ƀai ôh, Mâu dơi keh nach lĕ phung ƀư nau mhĭk.

² Yorlah mâu jŏ ôh bu mra rek khân păng nâm bu gơ̆, Jêh ri mra klêu tâm ban ma gơ̆ nse.

³ Rnơm nsing hom ma Brah Yêhôva jêh ri ƀư nau ueh, Gŭ hom tâm n'gor jêh ri siăm păng nơm ma nau răp jăp Păng.

⁴ Maak hom tâm Brah Yêhôva Pôri Păng mra ăn ma may nau nuih n'hâm may ŭch.

⁵ Jao hom trong păng nơm ma Brah Yêhôva Jêh ri rnơm ma Păng jêh ri Păng yơh mra ƀư nau nây:

⁶ Păng mra njêng nau sŏng srăng may mpơl nâm bu nau ang. Jêh ri nau di may tâm mpơl nâm bu nôk nar.

⁷ Gŭ rklăk hom tanăp Brah Yêhôva jêh ri gŭ kâp ma Păng. Lơi ăn rngot may nơm yor du huê bunuyh dơi jêng tâm trong păng Mâu lah bunuyh ƀư lĕ nau ŭch ƀư mhĭk.

⁸ Ăn mƀăr hom nau ji nuih jêh ri chalơi nau nuih; Lơi ƀư rŭng may nơm ôh, yor nau nây knŏng ƀư nau kan mhĭk.

⁹ Yorlah phung mhĭk mra geh nau rai yot, Ƀiălah mbu nơm kâp gân Brah Yêhôva mra geh neh ƀư drăp ndơn.

¹⁰ Hôm ƀât lât phung mhĭk mâu mra hôm. Nđâp tơlah may joi tât ntŭk păng, ăt mâu saơ păng ôh.

¹¹ Bi ma bunuyh dêh rhêt mra geh n'gor ƀư drăp ndơn, Jêh ri maak dơn nau đăp mpăn nau ndrŏng.

¹² Nơm mhĭk tâm nchră ƀư rai ma nơm sŏng srăng Jêh ri rket sêk ji nuih ma păng,

¹³ Ƀiălah Kôranh Brah mra gơm mưch rmot păng Yorlah saơ nar tâm rmal păng dăch tât.

¹⁴ Phung mhĭk tŏk đao jêh ri van na Gay ma nkhĭt nơm o ach jêh ri nơm pưt kƀah, Gay ma nkhĭt phung hăn tĭng trong sŏng di.

¹⁵ Ƀiălah đao khân păng mra ntâp tâm nuih n'hâm khân păng nơm Jêh ri na khân păng bu mra nkê̆ch pă.

¹⁶ Bunuyh sŏng srăng nđâp lah geh djê̆ drăp ndơ Rlau lơn ma nơm ndrŏng ƀư nau mhĭk.

¹⁷ Yorlah ti nơm mhĭk mra pă, Ƀiălah Brah Yêhôva yơk rdâng an bunuyh sŏng srăng.

¹⁸ Brah Yêhôva gĭt mrô nar phung sŏng Jêh ri drăp ndơn khân păng mra tât n'ho ro.

¹⁹ Tâm rnôk rêh ni khân păng mâu mra bêk prêng ôh; Tâm nar sât ji ngot khân păng ăt dơi hơm mpay.

²⁰ Bi ma phung mhĭk mra rai yot; Phung rlăng Brah Yêhôva mra nâm bu ngi kon biăp, Bu mra su gŭch, rai lêk roh hêt nâm bu nhhŭk tŭk.

²¹ Nơm ƀai chan ƀiălah mâu mplơ̆ sĭt ôh, Bi ma nơm sŏng srăng blau ƀư nau yô̆ jêh ri ăn.

²² Yorlah phung Brah Ndu ăn nau ueh uĭn mra dơn neh, Bi ma phung Păng rak rtăp mra rai yot.

²³ Lĕ nhuat bunuyh mpeh Brah Yêhôva dơi nâp jêng, Păng rŏng trong bunuyh nây.

²⁴ Nđâp tơlah chêh prah mâu lĕ prah Yorlah Brah Yêhôva yơr ti kơl rđâng bunuyh nây.

²⁵ Kăl e gâp hôm ndăm, aƀaơ hŏ ranh jêh, Gâp mâu mâp saơ ôh bunuyh sŏng srăng bu chalơi. Mâu lah noi deh nơm nây ƀư dan.

²⁶ Ăp nar bunuyh sŏng srăng ƀư nau yô̆ jêh ri ăn manh; Noi deh păng geh nau ueh uĭn.

²⁷ Der hom nau mhĭk jêh ri ƀư nau ueh Pôri may mra rêh n'ho ro.

²⁸ Yorlah Brah Yêhôva rŏng ma nau di, Mâu chalơi ôh phung kloh ueh Păng. Bunuyh sŏng srăng Păng mât mray n'ho ro. Bi noi deh phung mhĭk mra rai lôch.

²⁹ Phung sŏng srăng mra dơn neh Jêh ri gŭ rêh ta nây n'ho ro.

³⁰ Trôm mbung bunuyh sŏng ngơi nau blau mĭn, Mpiăt bunuyh nây nkoch nau sŏng.

³¹ Nau vay Brah Ndu gŭ tâm nuih n'hâm bunuyh sŏng srăng, Jêh ri păng chuat hăn mâu dĭt diu.

³² Phung mhĭk rmoch kâp bunuyh sŏng srăng Jêh ri joi kô̆ nau gay nkhĭt bunuyh nây.

³³ Ƀiălah Brah Yêhôva mâu ăn bunuyh nây tâm ti păng, Mâu lĕ ăn bu kơp păng tih tơlah bu djôt hăn phat dôih.

³⁴ Kâp gân hom ma Brah Yêhôva djôt prăp tĭng trong Păng Pôri Păng mra n'hao may gay dơn neh. Jêh ri may mra saơ phung mhĭk rai lôch.

³⁵ Gâp mâp saơ phung mhĭk geh nau ktang toyh, Jêng toyh tâm ban ma tơm si jŏ năm ndrêh ueh.

³⁶ Ƀiălah geh bunuyh hăn rgăn, ri păng mâu hôm ôh; Gâp joi păng ƀiălah mâu mâp.

³⁷ Sek uănh hom ma bunuyh rah vah jêh ri uănh ma bunuyh sŏng, Yorlah nglĕ dŭt bunuyh đăp mpăn mra geh nau ueh maak.

³⁸ Bi ma phung ƀư tih mra dơn ndrel nau rai yot. Nar kăndơ̆ phung mhĭk mra rai lôch.

³⁹ Nau tâm rklaih phung sŏng srăng văch tă bơh Brah Yêhôva; Păng jêng pôih nâp khân păng tâm rnôk rêh ni.

⁴⁰ Brah Yêhôva koh dŏng jêh ri tâm rklaih khân păng; Păng rklaih khân păng bơh phung mhĭk jêh ri tâm rklaih khân păng, Yorlah khân păng nde krap tâm Păng.