Nau Mprơ Ơm 35 - Nau Brah Ndu Ngơi 2023

Nơm nchih mbơh sơm ma Kôranh Brah tâm rklaih păng bơh phung rlăng

Nau Mprơ Ơm Y-Đavit

¹ Ơ Brah Yêhôva, dăn tâm rlăch đah phung tâm rlăch đah gâp, Dăn tâm lơh đah phung tâm lơh tâm rdâng đah gâp.

² Dăn djôt khêl jê̆ jêh ri toyh, Dâk hom gay kơl gâp.

³ Dăn rjăng ma tak keng jêh ri đao king trong Phung hăn tĭng gâp. Dăn lah ma gâp: “Gâp jêng nau tâm rklaih may.”

⁴ Ăn phung joi ƀư mhĭk nau rêh gâp Mra geh nau bêk prêng jêh ri bu tâm rmot; Phung ŭch ƀư mhĭk ma gâp Mra plơ̆ rŭch jêh ri bêk prêng.

⁵ Ăn khân păng jêng nâm bu lâk sial khôm rdu, Dăn tông mpăr Brah Yêhôva mprơh lơi khân păng!

⁶ Ăn trong khân păng jêng ngo klĕng jêh ri mbĭr prah, Dăn tông mpăr Brah Yêhôva mprơh tĭng khân păng!

⁷ Yorlah khân păng nthăng nhuăl mâu geh nau gay sân dăk gâp; Jêh ri kuyh ntu mâu geh nau gay ma ƀư mhĭk nau rêh gâp.

⁸ Ăn nau rai yot tât ndal, Ƀư ma khân păng geh văk nhuăl khân păng nơm nthăng; Jêh ri khân păng tŭp tâm ntŭk rai yot.

⁹ Huêng gâp mra răm maak tâm Brah Yêhôva, Răm rhơn ngăn nau Păng tâm rklaih.

¹⁰ Lĕ nting nđăng gâp mra lah: “Ơ Brah Yêhôva, mbu tâm ban ma May? May tâm rklaih phung rdja bơh phung ktang, Rklaih phung rêh ni jêh ri phung pưt kƀah bơh phung tŭn jot.”

¹¹ Phung mbơh nau nchơt nây dâk; Ôp lĕ nau gâp mâu mâp gĭt ôh.

¹² Khân păng sŏk nau djơh ntrok nau ueh; Huêng gâp gŭ êng, roh nau kâp gân.

¹³ Tơlah khân păng ji kuet, Gâp nsoh ao ƀau, Ver sông sa, nchâp ma huêng gâp. Nau gâp mbơh sơm plơ̆ sĭt ta ntang ntơh gâp.

¹⁴ Gâp uănh khân păng nâm bu mĭt jiăng, nâm bu oh nâu. Gâp kŭnh bôk chuat hăn, rngot klâng, Nâm bu nhĭm klâng me păng.

¹⁵ Ƀiălah tơlah gâp chêh prah, khân păng tâm rƀŭn răm maak, Phung nchơt tâm rƀŭn tâm rdâng ma gâp ƀiălah gâp mâu gĭt ôh; Khân păng sa hêk gâp mâu rlu.

¹⁶ Ndrel ma phung mâu chroh mưch ma gâp. Khân păng rket sêk ji nuih tâm rdâng đah gâp.

¹⁷ Ơ Kôranh Brah, ndah jŏ May gŭ uănh nau nây? Dăn tâm rklaih huêng gâp bơh nau khân păng ƀư rai. Jêh ri sŏk lơi nau rêh gâp bơh phung yau mŭr.

¹⁸ Pôri gâp mra tâm rnê lah ueh ma Kôranh Brah tâm phung rƀŭn toyh. Mprơ tâm rnê tâm nklang phung ƀon lan âk.

¹⁹ Lơi ăn phung rlăng đah gâp jêng phung mƀruh nchơt geh nau răm maak. Mâu ăn lĕ phung rmot ma gâp mâu geh nô nau ntơ̆ măt lôr ndăng ma gâp.

²⁰ Yorlah khân păng mâu ngơi ôh nau đăp mpăn, Ƀiălah tâm nchră nau ndơm Lĕ bunuyh gŭ rêh đăp mpăn ta n'gor.

²¹ Khân păng hă mbung gay rdâng ma gâp. Jêh ri lah: “Ha, ha! Măt he hŏ saơ jêh nau nây.”

²² Ơ Brah Yêhôva! May hŏ saơ jêh nau nây, lơi ta gŭ rklăk ôh. Ơ Kôranh Brah! Lơi ta gŭ ngai đah gâp.

²³ Ơ Brah Ndu jêng Kôranh Brah gâp! Dăn kah rngăl jêh ri dâk hom gay ma koh dŏng gâp.

²⁴ Ơ Brah Yêhôva Brah Ndu gâp. Dăn koh dŏng gâp tĭng nau sŏng srăng Kôranh Brah; Lơi ăn khân păng geh nau mĭn gơm mưch ôh ma gâp.

²⁵ Lơi ăn khân păng lah tâm nuih n'hâm pô aơ: “Ah ha! He dơi geh nau he ŭch jêh.” Mâu lĕ ăn khân păng lah: “He hŏ rvăn rêh jêh păng.”

²⁶ Ŭch ma phung răm maak nau mhĭk tât ma gâp Mra geh nau bêk prêng jêh ri bêk prêng hâu ngăn. Mbu dâk tâm rdâng đah gâp ma nau sưr, Geh nau nkŭm ma nau bêk prêng jêh ri bu rmot da dê.

²⁷ Bi ma nơm koh dŏng nau sŏng srăng ma gâp, Mra răm maak hâk răm; Jêh ri ngơi ƀaƀơ: “Brah Yêhôva dŭt toyh! Păng maak ăn nau ndrŏng ma phung oh mon Păng.”

²⁸ Pôri mpiăt kon mra mbơh nau sŏng srăng May Jêh ri mprơ tâm rnê ma May ăp nar.