Nau Mprơ Ơm 34 - Nau Brah Ndu Ngơi 2023

Mprơ tâm rnê ma Brah Yêhôva mât mray jêh ri tâm rklaih

Nau Mprơ Ơm Y-Đavit, ƀư nchih dôl păng jan ƀư brŭt tanăp Y-Abimêlek jêh ri bu mprơh du

¹ Gâp mra tâm rnê ma Brah Yêhôva ƀaƀơ, Nau tâm rnê ma Păng gŭ tâm bâr mbung gâp mro mrăng.

² Huêng gâp mra tâm rnê êng ma Brah Yêhôva, Phung dêh rhêt mra iăt jêh ri răm maak.

³ Yơk mbah Brah Yêhôva ndrel ma gâp. Phung he ndrel n'grŭp tâm rnê ma amoh Păng.

⁴ Gâp joi dăn jêh ma Brah Yêhôva jêh ri Păng plơ̆ lah ma gâp, Tâm rklaih gâp bơh lĕ nau klach.

⁵ Mbu uănh n'gơr tâm Kôranh Brah mra geh nau sol ang; Khân păng mâu mra geh nau prêng măt ôh.

⁶ Phung rêh ni aơ nter kuăl jêh ri Brah Yêhôva dơn nau, Păng sâm rklaih an păng bơh lĕ rngôch nau rêh ni.

⁷ Tông mpăr Brah Yêhôva ƀư ngih bok gŭ jŭm phung klach yơk ma Păng Jêh ri tâm rklaih khân păng.

⁸ Rlong ler hom jêh ri gĭt năl Brah Yêhôva ueh reh hâu ngăn ngên! Ueh maak ngăn mbu nơm gŭ krap tâm Păng!

⁹ Hơi phung kloh ueh Brah Yêhôva, klach yơk hom ma Păng! Yorlah bu nâm klach yơk ma Păng mâu mra pưt kƀah ôh.

¹⁰ Phung kon yau mŭr mra geh nau pưt kƀah jêh ri ji ngot ji hir, Ƀiălah bu nâm joi Brah Yêhôva mâu mra pưt du ntil nau ueh ôh.

¹¹ Hơi phung kon, iăt hom nau gâp; Gâp mra nti khân may nau klach yơk ma Brah Yêhôva.

¹² Mbu nơm rŏng ma nau rêh, Jêh ri ŭch gŭ rêh jŏ năm geh nau ueh maak?

¹³ Njrăng hom mpiăt may bơh nau mhĭk, Jêh ri trôm mbung may bơh ngơi nau ndơm.

¹⁴ Du hom đah nau mhĭk jêh ri ƀư nau ueh. Tĭng joi hom nau đăp mpăn jêh ri hăn tĭng păng.

¹⁵ Măt Brah Yêhôva treng uănh ma phung sŏng srăng, Tôr Păng iăt bâr khân păng nter kuăl.

¹⁶ Ƀiălah muh măt Brah Yêhôva ƀư tâm rdâng đah phung ƀư mhĭk Gay jut lơi ăn kloh nau khân păng ndray kah gĭt bơh neh ntu.

¹⁷ Phung sŏng srăng nter kuăl, Brah Yêhôva iăt, Jêh ri tâm rklaih nơm nây bơh lĕ nau rêh ni.

¹⁸ Brah Yêhôva gŭ dăch đah phung bunuyh geh nuih n'hâm hŏt rgănh Jêh ri tâm rklaih phung geh nuih n'hâm rngot ma nau tih.

¹⁹ Bunuyh sŏng srăng geh âk nau mhĭk tât; Ƀiălah Brah Yêhôva tâm rklaih păng ƀaƀơ.

²⁰ Păng mât mơh lĕ rngôch nting nđăng nơm nây, Mâu ăn pă du mlâm ôh.

²¹ Nau ƀai mra nkhĭt nơm mhĭk; Bi ma phung tâm rmot ma nơm sŏng srăng mra geh nau tih jêh.

²² Brah Yêhôva tâm chuai huêng phung oh mon Păng; Lĕ rngôch phung gŭ krap tâm Păng mâu mra geh nau tih.