Nau Mprơ Ơm 33 - Nau Brah Ndu Ngơi 2023

Mprơ tâm rnê ma Brah Yêhôva jêng Nơm Rhăk Njêng dŭt toyh

¹ Ơ phung sŏng srăng, maak hom tâm Brah Yêhôva! Nau tâm rnê ma Kôranh Brah di ma phung bunuyh sŏng.

² Dŏng gong rêng mprơ tâm rnê hom ma Brah Yêhôva; Dŏng gong rêng loih jât rse mprơ tâm rnê hom ma Păng!

³ Mprơ tâm rnê hom ma Păng du ntil nau mprơ mhe, Jêh ri kreh dĭng ma nau săr lah đah bâr nter maak!

⁴ Yorlah nau Brah Yêhôva jêng sŏng, Jêh ri lĕ kan Păng ƀư tâm mpơl nau răp jăp.

⁵ Păng rŏng nau sŏng srăng jêh ri nau di; Lam neh ntu bêng ma nau ueh Brah Yêhôva.

⁶ Lĕ ndâr trôk rhăk njêng bơh nau ngơi Brah Yêhôva, Lĕ rngôch khay mănh mbing luh tă n'hâm nsôr bơh bâr mbung Păng.

⁷ Păng rgum lĕ rngôch dak mƀŭt jêng mbŭch, Jêh ri prăp dak jru nsŭn du ntŭk jay.

⁸ Bunuyh lam neh ntu klach yơk hom ma Brah Yêhôva; Lĕ phung ƀon lan ta neh ntu klach râm nsâr tanăp Păng!

⁹ Yorlah mâm nau Păng lah mra geh ro; Păng ntrŭnh nau ntăm lĕ rngôch ndơ mra nâp ngăn.

¹⁰ Brah Yêhôva ƀư rai nau lĕ bri dak ŭch ƀư mhĭk, Păng ƀư rai nau ŭch phung ƀon lan.

¹¹ Brah Yêhôva mĭn ƀư dơi gŭ nâp n'ho ro. Nau Păng mĭn tâm nuih n'hâm hôm e bơh rnôk aơ tât ma rnôk ri.

¹² Moh bri dak geh Brah Yêhôva ƀư Brah Ndu khân păng, Moh ntil mpôl bunuyh Păng dơi săch ƀư jêng drăp ndơn păng, Geh nau ueh maak n'ho ro!

¹³ Brah Yêhôva uănh tă bơh klơ trôk, Păng uănh saơ lĕ rngôch kon bunuyh.

¹⁴ Tă bơh sưng hađăch Kôranh Brah gŭ, Păng gŭ uănh, Păng sek uănh lĕ rngôch bunuyh gŭ ta neh ntu.

¹⁵ Păng yơh njêng nuih n'hâm ăp nơm khân păng, Jêh ri sek uănh lĕ rngôch kan khân păng.

¹⁶ Mâu geh ôh du huê hađăch yor tahan âk geh nau tâm rklaih, Mâu geh du huê nơm ktang dơi rklaih yor nau ktang păng.

¹⁷ Rnơm ma seh gay dơi rklaih jêng dơm dam, Nau rnam păng dơi mâu lĕ dơi tâm rklaih ma du huê bunuyh.

¹⁸ Ri măt Brah Yêhôva uănh ma phung klach yơk ma Păng, Jêh ri phung kâp gân tâm nau ueh Păng

¹⁹ Gay ma tâm rklaih huêng khân păng bơh nau khĭt Jêh ri prăp nau rêh khân păng tâm nau ji ngot.

²⁰ Huêng hên gŭ kâp Brah Yêhôva; Păng jêng tu sâm kơl jêh ri jêng khêl ma hên.

²¹ Nuih n'hâm hên mra geh nau răm maak tâm Păng Yorlah hên rnơm nsing jêh tâm Amoh Kloh Ueh Păng.

²² Ơ Brah Yêhôva, dăn nau ueh May jŭr hoch tâm hên, Di nâm bu hên kâp gân jêh tâm May.