Nau Mprơ Ơm 32 - Nau Brah Ndu Ngơi 2023

Ueh maak ma bunuyh Kôranh Brah dơi yô̆ an nau tih

Nau mprơ nti Y-Đavit

¹ Ueh maak ngăn ma bunuyh geh nau yô̆ an ma nau tih păng tih, Dơi nkŭm brôi an nau tih păng!

² Ueh maak ngăn ma bunuyh Brah Yêhôva mâu kơp ôh djơh mhĭk Jêh ri tâm nuih n'hâm mâu geh nau ndơm ôh!

³ Dôl gâp gŭ rklăk, lĕ nting gâp huănh hươi Jêh ri gâp nter nđêng lôch nar.

⁴ Yorlah nar jêh ri măng ti May n'grŭn jâk ta klơ gâp; Nau ktang gâp roh huơi nâm bu bơh phang yan kăl vai. (Sêla)

⁵ Gâp mbơh jêh nau tih ma May, Gâp mâu pôn ôh nau djơh mhĭk gâp; Gâp lah: “Gâp mra mbơh lĕ nau gâp ƀư tih ma Brah Yêhôva, Jêh ri May yô̆ an nau tih gâp.” (Sêla)

⁶ Yor nây, lĕ rngôch bunuyh blau yơk Mbơh sơm ma May da dê tâm mông ŭch geh; Nanê̆ tơlah geh dak toyh ler tât Pôri mâu mra tât ma khân păng.

⁷ May jêng ntŭk gâp nde krap: May king n'gang gâp bơh nau rêh ni; May ăn nau mprơ ma nau tâm rklaih gay nkŭm gâp. (Sêla)

⁸ Gâp mra nti may, ntĭm ma may trong mra hăn; Măt Gâp mra treng jêh ri sâm nti may.

⁹ Lơi ta jêng nâm bu seh jêh ri seh bri jêng ndơ mâu geh nau gĭt rbăng Bu n'găm trôm mbung ma gang jêh ri ma rse ndrăn mhe, gay ma khân păng dơi iăt nau, Tơlah mâu, khân păng mâu mra hăn dăch may ôh.

¹⁰ Phung mhĭk geh âk nau rngot Ƀiălah mbu nơm rnơm nsing ma Brah Yêhôva Mra geh nau ueh nkŭm bunuyh nây.

¹¹ Hơi phung sŏng srăng, răm rhơn hom jêh ri hâk maak tâm Brah Yêhôva! Hơi lĕ rngôch mbu geh nuih n'hâm sŏng, nter maak hom!