Nau Mprơ Ơm 31 - Nau Brah Ndu Ngơi 2023

Nơm nchih rnơm nsing ma Brah Yêhôva jêh ri dăn Păng sâm kơl an

Nau Mprơ Ơm Y-Đavit, ƀư nchih ma nơm gai mprơ

¹ Ơ Brah Yêhôva, gâp gŭ krap tâm May; Lơi ăn gâp mâp nau bêk prêng ôh; Dăn sŏk nau sŏng srăng May jêh ri tâm rklaih gâp.

² Dăn Kôranh Brah rkêng tôr iăt ma gâp, Văch gơnh tâm rklaih gâp. Ƀư lŭ toyh ăn ma gâp nde krap, Du pôih nâp ktang gay ma rklaih gâp.

³ Yorlah Kôranh Brah jêng lŭ toyh ngăn jêh ri pôih nâp gâp; Yor ma amoh May, njŭn leo gâp.

⁴ Dăn Kôranh Brah đŏt lơi gâp bơh nhuăl khân păng hŏ nthăng jêh, Yorlah May jêng ntŭk gâp gŭ krap.

⁵ Gâp jao huêng gâp tâm ti Kôranh Brah; Ơ Brah Yêhôva jêng Brah Ndu nanê̆ ngăn, May hŏ chuai gâp jêh.

⁶ Gâp tâm rmot ma phung mbah rup brah dơm dam, Ƀiălah gâp rnơm nsing ma Brah Yêhôva.

⁷ Gâp mra răm maak jêh ri răm rhơn tâm nau ueh Kôranh Brah Yor Kôranh Brah hŏ mêt uănh jêh nau rêh ni gâp, Jêh ri gĭt năl nau rngot huêng gâp.

⁸ Kôranh Brah mâu jao gâp tâm ti phung rlăng ôh, Ƀiălah dơm jâng gâp tâm ntŭk huy.

⁹ Ơ Brah Yêhôva! Dăn yô̆ nđach gâp yorlah gâp gŭ tâm nau rêh ni. Măt gâp rgănh huơi yor ma nau rngot, Huêng gâp jêh ri săk jăn gâp tâm ban lĕ.

¹⁰ Nau rêh gâp roh huăch tâm nau rngot klâng, Lĕ năm gâp n'hŭch yor lŭng nter; Yor nau tih jêh ri nau ktang gâp huănh hươi Jêh ri nting nđăng gâp lêk rai.

¹¹ Đah phung rlăng, gâp jêng nau bêk prêng, Đah phung chiau meng, gâp jêng nơm khư nau bu mưch; Đah lĕ bunuyh bên năl, gâp jêng ndơ klach ngăn, Mbu nơm saơ gâp rŏ trong ăt mra du ngai.

¹² Tâm nuih n'hâm khân păng chuêl gâp nâm bu du huê bunuyh khĭt jêh. Gâp jêng tâm ban ma du play yăng chah hăch.

¹³ Gâp tăng âk bunuyh ngơi nchơt; Nau klach krit gŭ jŭm gâp! Khân păng tâm nchră ƀư mhĭk ma gâp, Khân păng ŭch ngroh lơi nau rêh gâp.

¹⁴ Ƀiălah Ơ Brah Yêhôva! Gâp rnơm nsing tâm May; Gâp lah: “May jêng Brah Ndu gâp”

¹⁵ Nau rêh gâp gŭ tâm ti Kôranh Brah; Tâm rklaih gâp bơh ti phung rlăng jêh ri phung ƀư mhĭk ma gâp.

¹⁶ Dăn muh măt May sol ang ta oh mon May. Sŏk nau ueh Kôranh Brah tâm rklaih gâp.

¹⁷ Ơ Brah Yêhôva, lơi ăn geh nau bêk ma gâp Yorlah gâp vah vơl dăn ma may. Ăn phung mhĭk geh nau bêk Jêh ri gŭ rklăk tâm ƀon phung khĭt!

¹⁸ Ăn mbung phung mƀruh jêng mlo! Yorlah khân păng ngơi djơh, ngơi sưr jêh ri tâm rmot Ƀiălah ngơi tâm rdâng đah phung sŏng srăng.

¹⁹ Nau ueh May toyh ngăn! May prăp nau ueh ma bunuyh klach yơk ma May, Ăn ma phung gŭ krap tâm May, Tanăp lĕ rngôch bunuyh.

²⁰ May pôn khân păng tâm ntŭk ndâp tanăp măt May Gŭ ngai đah nau kon bunuyh ŭch ƀư; May king n'gang khân păng tâm ngih bok Gŭ ngai đah mbung mpiăt tâm djrel.

²¹ Mât ton tâm rnê ma Brah Yêhôva Yorlah Păng hŏ tâm mpơl jêh nuih n'hâm ueh khlay ma gâp Tơlah bu nchueng gâp tâm ƀon.

²² Tâm nau uh ah gâp lah pô aơ: “Bu nkhĭt roh gâp tanăp măt May.” Ƀiălah tơlah gâp kuăl mbơh sơm ma May, May tăng nau gâp dăn.

²³ Hơi phung kloh ueh Brah Yêhôva, rŏng hom ma Păng! Brah Yêhôva mât mơh phung răp jăp Ƀiălah tâm rmal ktang ngăn ma phung gŭ ngao sưr rlau.

²⁴ Hơi lĕ bunuyh gŭ kâp Brah Yêhôva, Ăn geh hom nuih n'hâm nâp!