Nau Mprơ Ơm 30 - Nau Brah Ndu Ngơi 2023

Tâm rnê lah ueh Brah Yêhôva yorlah Păng tâm rklaih tă bơh nau khĭt

Nau Mprơ Ơm Y-Đavit. Nau mprơ dơi ƀư nchih dôl rnôk nhhơr ngih hađăch

¹ Ơ Kôranh Brah! Gâp tâm rnê Păng yorlah Păng chông gâp hao, Mâu ăn ôh phung rlăng răm maak yor gâp.

² Ơ Brah Yêhôva Brah Ndu gâp! Gâp dăn ma May Jêh ri May hŏ ƀư bah gâp jêh.

³ Ơ Brah Yêhôva, May hŏ djôt leo jêh huêng gâp tă bơh ƀon phung khĭt. Jêh ri mât mơh nau rêh gâp gay gâp mâu jŭr tâm môch.

⁴ Hơi phung kloh ueh Brah Yêhôva, mprơ tâm rnê hom ma Păng. Jêh ri tâm rnê lah ueh ma amoh kloh ueh Păng.

⁵ Yorlah nau Păng nuih knŏng ƀât lât, Bi ma nau Păng yô̆ gŭ lôch du njăr rêh. Nau nhĭm nhhiăng văch njưh dôl măng, Ƀiălah tât ơm ôi geh nau răm maak ro.

⁶ Bi ma gâp, tâm rnôk ndrŏng gâp geh lah pô aơ: “Gâp mâu mra mpât n'gơ ôh.”

⁷ Ơ Brah Yêhôva, yor nau yô̆ May, Yôk gâp dơi ndâk nâp. Ƀiălah dôl May pôn măt, Pôri gâp geh nau rŭng răng ro.

⁸ Ơ Brah Yêhôva! Gâp hŏ kuăl dăn jêh Jêh ri vơl dăn ma May pô aơ:

⁹ “Ƀư pling mham gâp, ƀư ma gâp jŭr tâm môch Pôri geh nau khlay lĕ? Ndruyh neh mra tâm rnê May lĕ? Păng mra dơi mbơh nau răp jăp May lĕ?

¹⁰ Ơ Brah Yêhôva! Dăn May iăt jêh ri yô̆ nđach gâp ƀă; Ơ Brah Yêhôva! Dăn kơl hom gâp.”

¹¹ May tâm rgâl jêh nau gâp rngot rvê jêng nau hâk maak, May pơk ao klâng ndrê gâp Jêh ri rêt rse bŭt gâp ma nau răm maak.

¹² Yor nây, huêng gâp mprơ tâm rnê ma Kôranh Brah jêh ri mâu gŭ rklăk ôh. Ơ Brah Yêhôva Brah Ndu gâp, gâp mra tâm rnê lah ueh ma May ƀaƀơ n'ho ro.