Nau Mprơ Ơm 28 - Nau Brah Ndu Ngơi 2023

Mbơh sơm dăn Kôranh Brah kơl jêh ri tâm rnê lah ueh yorlah Păng hŏ dơn nau jêh

Nau Mprơ Ơm Y-Đavit

¹ Ơ Brah Yêhôva, gâp kuăl May jêng lŭ toyh ma gâp; Lơi ta nsêt tôr ma gâp. Yorlah tơlah May gŭ rklăk mro đah gâp, Gâp mra jêng tâm ban lĕ phung jŭr tâm môch.

² Tơlah gâp yơr ti rle mpeh ma ntŭk dĭ kloh ueh Kôranh Brah Gay dăn ma May, Dăn iăt hom bâr gâp kuăl vah vơl.

³ Lơi ta têk gâp hăn ndrel ma phung janh ktang Mâu lah phung ƀư djơh, Jêng phung ngơi đăp mpăn ma phung chiau meng khân păng, Ƀiălah tâm trôm nuih n'hâm bêng ma nau djơh mhĭk.

⁴ Ăn May rmal khân păng tĭng nâm nau kan khân păng, Jêh ri tĭng nâm nau djơh mhĭk khân păng ƀư; Ăn May mplơ̆ sĭt tĭng nâm kan ti khân păng hŏ ƀư jêh, Jêh ri rmal khân păng khư ma nau tih khân păng.

⁵ Yorlah khân păng mâu gĭt năl ôh lĕ nau kan Brah Yêhôva, Jêh ri kan ndâk ti Păng ƀư. Păng mra ƀư rlâm khân păng, Mâu hôm rdâk khân păng đŏng ôh.

⁶ Mât ton tâm rnê ma Brah Yêhôva! Yor Păng hŏ tăng jêh nau bâr gâp kuăl vah vơl.

⁷ Brah Yêhôva jêng nau ktang jêh ri jêng khêl gâp; Nuih n'hâm gâp rnơm nsing ma Păng jêh ri gâp dơi geh nau kơl. Yor ri, nuih n'hâm gâp răm maak ngăn; Gâp mra sŏk nau mprơ tâm rnê ma Păng.

⁸ Brah Yêhôva jêng nau ktang ma ƀon lan Păng. Jêng pôih tâm rklaih ma nơm Păng tŏ dak ƀâu kah.

⁹ Dăn Kôranh Brah rklaih ƀon lan May jêh ri ăn nau ueh lăng ma drăp ndơn May; Dăn mât chiă jêh ri kuăn rdâng khân păng ƀaƀơ n'ho ro.