Nau Mprơ Ơm 27 - Nau Brah Ndu Ngơi 2023

Mâu klach ôh yorlah geh Kôranh Brah king n'gang

Nau Mprơ Ơm Y-Đavit

¹ Brah Yêhôva jêng nau ang jêh ri nau tâm rklaih gâp, Ma mbu hôm gâp klach? Brah Yêhôva jêng pôih nâp nau rêh gâp, Ma mbu hôm gâp klach?

² Tơlah phung ƀai jêh ri phung rlăng hăn lơh gâp, Khân păng ŭch sa hêk rvăn nglay săk gâp Pôri khân păng chêh prah da dê.

³ Nđâp tơlah du phung tahan ndâk vâl bok tâm tham đah gâp, Nuih n'hâm gâp mâu mra klach ôh; Nđâp tơlah nau tâm lơh hao toyh tâm rdâng đah gâp, Rnôk nây gâp ăt gŭ nâp rnơm tâm Kôranh Brah.

⁴ Gâp hŏ dăn jêh ma Brah Yêhôva du ntil nau Jêh ri mra joi nau nây! Nây jêng lĕ nau rêh gâp Dơi gŭ tâm ngih Brah Yêhôva Gay uănh nau ueh Brah Yêhôva Jêh ri gay dăn ôp tâm ngih brah Păng.

⁵ Yorlah tâm nar rêh ni, Păng mra king n'gang tâm ngih bok Păng, Pôn gâp ntŭk ndâp tâm ngih bok Păng, Jêh ri Păng mra dơm gâp ta klơ du mlâm lŭ toyh.

⁶ Aƀaơ gâp mra n'gơr bôk Prêh lơn lĕ phung rlăng nchueng jŭm gâp; Tâm ngih bok Păng, Gâp mra nhhơr ndơ ƀư brah ma bâr mprơ răm maak; Gâp mra mprơ maak jêh ri tâm rnê ma Brah Yêhôva.

⁷ Ơ Brah Yêhôva, dăn iăt bâr gâp kuăl mbơh sơm ma May: Dăn yô̆ nđach ma gâp jêh ri dơn nau gâp.

⁸ Tơlah Kôranh Brah lah: “Khân may joi hom muh măt Gâp” Pôri nuih n'hâm gâp lah ma Kôranh Brah pô aơ: “Ơ Brah Yêhôva! Gâp mra joi muh măt May.”

⁹ Ơ Brah Ndu jêng Nơm tâm rklaih gâp, Lơi ta pôn măt Kôranh Brah ma gâp, Lơi ta mprơh oh mon Kôranh Brah tâm rnôk Kôranh Brah ji nuih. Êlor Kôranh Brah jêng nau sâm kơl gâp. Lơi ta chalơi gâp, lơi ta mƀăr gâp.

¹⁰ Tơlah me mbơ̆ chalơi gâp Pôri Brah Yêhôva mra rom gâp.

¹¹ Ơ Brah Yêhôva! Dăn ntĭm nti gâp trong May; Dăn njŭn gâp lăp tâm trong lâng Ma yor lĕ phung rlăng gâp.

¹² Lơi ta jao gâp ma phung rlăng gâp ŭch, Yorlah khân păng nkoch lĕ nau mbơh nchơt Jêh ri ngơi nau janh ƀai tâm rdâng đah gâp.

¹³ Gâp gĭt nanê̆ mra saơ nau ueh Brah Yêhôva Tâm neh phung rêh.

¹⁴ Kâp gân hom ma Brah Yêhôva; Ktang hom jêh ri nâp! Di yơh, kâp gân hom Brah Yêhôva!