Nau Mprơ Ơm 25 - Nau Brah Ndu Ngơi 2023

Dăn Kôranh Brah kơl, njŭn leo jêh ri yô̆ an nau tih

Nau Mprơ Ơm Y-Đavit

¹ Ơ Brah Yêhôva, gâp nhhơr huêng gâp ma May.

² Ơ Brah Ndu gâp! Gâp rnơm nsing ma May. Ăn gâp mâu geh bêk prêng ôh; Lơi ăn phung rlăng dơi lơn ma gâp.

³ Ngăn yơh mâu geh du huê nơm rnơm nsing ma May geh nau bêk prêng; Knŏng phung gŭ nau tâm rlăng.

⁴ Ơ Brah Yêhôva, ăn gâp gĭt lĕ trong May Jêh ri ntĭm nti an gâp lĕ trong May.

⁵ Dăn leo gâp tâm nau ngăn May jêh ri ntĭm nti gâp, Yorlah May jêng Brah Ndu, Nơm rklaih gâp; Ăp nar gâp kâp gân May.

⁶ Ơ Brah Yêhôva, ăn kah gĭt nau yô̆ nđach jêh ri nuih n'hâm ueh May. Yorlah bar ntil nau nây geh bơh kăl e.

⁷ Lơi ta kah gĭt lĕ nau tih gâp, dôl hôm ndăm, mâu lah nau tâm rdâng gâp; Ơ Brah Yêhôva, kah gĭt tât ma gâp tĭng nâm nau yô̆ nđach Jêh ri nuih n'hâm ueh May.

⁸ Brah Yêhôva jêng ueh jêh ri sŏng, Yor nây, May knŏng nti trong ma phung tih.

⁹ May njŭn leo phung dêh rhêt tâm nau sŏng, Ntĭm nti trong May ma phung dêh rhêt.

¹⁰ Lĕ rngôch trong Brah Yêhôva jêng nau ueh da dê jêh ri nau nanê̆ ngăn Ma phung djôt prăp nau tâm rnglăp jêh ri nau ntĭnh bơh May.

¹¹ Ơ Brah Yêhôva! Yor amoh May, Yô̆ an ma gâp, yorlah gâp ƀư tih jâk.

¹² Mbu nơm klach yơk ma Brah Yêhôva? Păng mra ntĭm nti nơm nây tâm trong păng mra săch.

¹³ Huêng păng mra gŭ tâm ntŭk ueh mpăn, Jêh ri phung kon sau păng mra geh neh ƀư drăp ndơn.

¹⁴ Brah Yêhôva jan jiăng ndrel ma phung klach yơk ma Păng, Jêh ri mpơl ma nơm nây gĭt nau tâm rnglăp Păng.

¹⁵ Măt gâp uănh ƀaƀơ mpeh ma Brah Yêhôva, Yor Păng mra rklaih jâng gâp luh tă bơh jal.

¹⁶ Dăn Kôranh Brah mêt uănh ta gâp jêh ri yô̆ nđach gâp, Yorlah gâp gŭ êng jêh ri rêh ni.

¹⁷ Nau uh ah tâm nuih n'hâm gâp ntop âk; Dăn Kôranh Brah rklaih an gâp bơh nau mhĭk tât.

¹⁸ Dăn sek uănh nau rêh ni jêh ri nau mhĭk tât gâp Jêh ri yô̆ an ma lĕ rngôch nau tih gâp.

¹⁹ Uănh hom ma phung rlăng đah gâp văch dŭt âk ngăn; Khân păng tâm rmot ma gâp, văch janh ƀai hâu ngăn!

²⁰ Dăn Kôranh Brah mât mray huêng gâp jêh ri tâm rklaih gâp; Lơi ăn gâp bêk prêng ôh, yorlah gâp krap tâm Kôranh Brah.

²¹ Ăn nau kloh ueh jêh ri nau sŏng king n'gang gâp, Yorlah gâp kâp gân Kôranh Brah.

²² Ơ Brah Ndu! Tâm chuai phung Israel Bơh lĕ nau rêh ni.