Nau Mprơ Ơm 24 - Nau Brah Ndu Ngơi 2023

Hađăch chrêk rmah lăp ƀon Siôn

Nau Mprơ Ơm Y-Đavit

¹ Neh jêh ri lĕ rngôch ndơ ta klơ neh, Neh ntu jêh ri lĕ bunuyh gŭ tâm nây jêng ndơ Brah Yêhôva da dê.

² Yorlah Păng yơh ndâk rplay neh ta klơ dak rlai, Jêh ri dơm mbon păng ta klơ lĕ n'hor dak.

³ Mbu mra hao ta yôk Brah Yêhôva? Mbu nơm mra dơi dâk tâm ntŭk kloh ueh Păng?

⁴ Nây jêng bunuyh geh ti kloh ueh jêh ri nuih n'hâm kloh, Mâu jao huêng păng ma rup brah dơm dam, Mâu lĕ ton săk ma nau mƀruh.

⁵ Bunuyh nây mra dơn nau ueh uĭn tă bơh Brah Yêhôva Jêh ri nau sŏng srăng tă bơh Brah Ndu jêng Nơm tâm rklaih păng.

⁶ Nây jêng noi deh phung tĭng joi Brah Yêhôva, Nây jêng phung tĭng joi muh măt Brah Ndu Yakôb. (Sêla)

⁷ Hơi lĕ mpông pêr, n'gơr hom bôk! Hơi mpông pêr ntơm saơm, pơk hom ăn prêh, Gay ma Hađăch chrêk rmah mra lăp.

⁸ Mbu jêng hađăch chrêk rmah aơ? Aơ jêng Brah Yêhôva yơh bêng nau ktang jêh ri nau brah, Brah Yêhôva ktang tâm nau tâm lơh.

⁹ Hơi lĕ mpông pêr, n'gơr hom bôk! Hơi lĕ mpông pêr n'ho ro, pơk hom ăn prêh! Gay ma Hađăch chrêk rmah mra lăp.

¹⁰ Mbu jêng Hađăch chrêk rmah aơ? Nây jêng Brah Yêhôva ma phung tahan, Păng yơh jêng Hađăch chrêk rmah. (Sêla)