Nau Mprơ Ơm 22 - Nau Brah Ndu Ngơi 2023

Dăn Kôranh Brah tâm rklaih bơh nau rêh ni jêh ri nau tâm lơh

Nau Mprơ Ơm Y-Đavit, ƀư nchih ma nơm gai mprơ, tĭng bâr “jun me rnôk ơm ôi”

¹ Ơ Brah Ndu gâp! Ơ Brah Ndu gâp! Mâm ƀư May chalơi gâp? Mâm ƀư May gŭ ngai mâu ŭch kơl gâp jêh ri mâu tăng nau gâp nđêng?

² Ơ Brah Ndu gâp! Gâp kuăl nôk nar ƀiălah Kôranh Brah mâu plơ̆ lah, Dôl măng tâm ban pônây lĕ, ƀiălah gâp mâu geh gŭ rlu ôh.

³ Bi ma Kôranh Brah jêng kloh ueh, May gŭ ta nklang nau phung Israel tâm rnê.

⁴ Phung chô yau hên rnơm nsing ntŭk Kôranh Brah, Khân păng rnơm nsing ma May jêh ri dơi tâm rklaih.

⁵ Khân păng kuăl ma Kôranh Brah jêh ri dơi rklaih, Khân păng rnơm ma May jêh ri mâu bêk prêng ôh.

⁶ Ƀiălah gâp jêng du mlâm ndrŭng mâu di du huê bunuyh ôh. Kon bunuyh ƀư bêk, lĕ rngôch bunuyh mưch rmot.

⁷ Lĕ rngôch mbu nơm saơ gâp gơm mưch da dê, Nsut mbung rteh bôk jêh ri lah:

⁸ “Păng jao păng nơm ma Brah Yêhôva, ăn May tâm rklaih păng; Yorlah May rŏng ma păng, ăn May tâm rklaih păng!”

⁹ Di yơh, May ngluh jêh gâp tă bơh ndŭl me; Ƀư gâp rnơm nsing dôl gŭ ta ntang ntơh me gâp.

¹⁰ Ntơm bơh ndŭl proch, gâp hŏ dơi jao jêh ma Kôranh Brah; Kôranh Brah jêng Brah Ndu gâp ntơm bơh gâp mhe luh bơh ndŭl me.

¹¹ Lơi ta gŭ ngai đah gâp Yorlah nau rêh ni dăch jêh, Jêh ri mâu geh du huê bunuyh sâm kơl.

¹² Geh âk ndrôk nkuăng nchueng jŭm gâp. Lĕ ndrôk nkuăng lay ktang tă bơh Basan nchueng jŭm gâp.

¹³ Khân păng hă mbung, kâp rvăn gâp, Tâm ban ma yau mŭr dôl hêk ndơ sa jêh ri rđuh ngrông.

¹⁴ Gâp bu nkhŭt lơi nâm bu dak, Jêh ri nting gâp lêt rgănh da dê; Play nuih gâp nâm bu mpêt Lêk tâm săk jăn gâp.

¹⁵ N'hâm suan gâp sơh kro tâm ban ma neh bŏk pêt Jêh ri mpiăt gâp krêp ta trô ko; May dơm gâp bê̆ch tâm neh muy nau khĭt.

¹⁶ Yorlah phung so gŭ jŭm gâp, Du phung janh ƀai nchueng jŭm gâp; Khân păng ntâp bluh ti jêh ri jâng gâp.

¹⁷ Gâp dơi kơp lĕ rngôch nting gâp. Khân păng mâu rlu uănh ma gâp;

¹⁸ Khân păng tâm pă ndrăng khân păng nơm kho ao gâp; Tâm nchroh n'hôr gay sŏk ao jong gâp.

¹⁹ Ơ Brah Yêhôva! Lơi ta gŭ ngai ôh đah gâp; Ơ nau brah Kôranh Brah gâp, dăn văch gơnh kơl gâp.

²⁰ Dăn rklaih huêng gâp bơh ma đao, Jêh ri nau rêh gâp bơh phung so.

²¹ Kôranh Brah hŏ dơn jêh nau gâp, Rklaih an gâp bơh trôm mbung yau mŭr, Jêh ri nđâp ma nke rpu bri.

²² Gâp mra mbơh amoh Kôranh Brah ma oh nâu gâp Jêh ri tâm rnê Kôranh Brah tâm nklang phung tâm rƀŭn.

²³ Hơi phung klach yơk ma Brah Yêhôva, tâm rnê hom ma Păng! Hơi lĕ rngôch phung kon sau Yakôb, yơk mbah hom ma Păng! Hơi lĕ rngôch noi deh Israel, klach yơk hom ma Păng.

²⁴ Yorlah Păng mâu mâp tâm rmot mâu lah ƀư ƀơ̆ Nau rêh ni phung o ach; Mâu pôn lĕ măt Păng ma bunuyh nây, Ƀiălah gŭ iăt nau păng nter kuăl tâm rklaih.

²⁵ Nau gâp tâm rnê gŭ ta nklang phung tâm rƀŭn toyh luh tă bơh Kôranh Brah; Gâp mra ƀư ăn jêh nau gâp ton tanăp phung klach yơk ma Păng.

²⁶ Phung blau tông bâr mra sông sa jêh ri dơi hơm; Phung tĭng joi Brah Yêhôva mra tâm rnê ma Păng; Ăn bunuyh geh nuih n'hâm dêh rhêt dơi rêh lĕ rngôch rnôk n'ho ro.

²⁷ Lĕ rngôch lam rplay neh mra kah gĭt Jêh ri mra plơ̆ sĭt ma Brah Yêhôva, Lĕ rngôch mpôl băl bunuyh Mra chon mon mbah tanăp May.

²⁸ Yorlah ƀon bri hađăch jêng ndơ Brah Yêhôva, Păng chiă uănh phung mpôl băl bunuyh.

²⁹ Lĕ rngôch bunuyh ndrŏng ta neh ntu mra sông sa jêh ri mra yơk mbah; Lĕ rngôch phung plơ̆ sĭt tâm neh muy, Jêh ri phung mâu hôm dơi prăp nau rêh păng nơm, Mra chon mon tanăp Păng da dê.

³⁰ Du noi deh mra pah kan ma Păng; Bu mra mbơh nkoch amoh Kôranh Brah ma phung kon sau kăndơ̆,

³¹ Noi deh nây mra mbơh nau sŏng srăng Păng; Nkoch tay ma rơh kăndơ̆ pô aơ Brah Yêhôva hŏ ƀư jêh nau nây.