Nau Mprơ Ơm 21 - Nau Brah Ndu Ngơi 2023

Mprơ tâm rnê ma nau Kôranh Brah tâm rklaih

Nau Mprơ Ơm Y-Đavit, ƀư nchih ma nơm gai mprơ

¹ Ơ Brah Yêhôva, hađăch răm maak yor nau ktang May, Yorlah nau May tâm rklaih, păng hâk răm hâu ngăn!

² Kôranh Brah ăn jêh ma păng nau nuih n'hâm păng ŭch, Mâu dun đŏng ôh nau bâr mbung păng dăn. (Sêla)

³ Yorlah Kôranh Brah sŏk nau ueh uĭn jêh ri vơt dơn păng; Ndô đon hađăch ta klơ bôk păng ma mah chrêk.

⁴ Păng dăn ma Kôranh Brah ăn nau rêh, jêh ri Kôranh Brah ăn jêh ma păng, Kŏ tât ăn ma păng năm khay jŏ jong n'ho ro.

⁵ Yor nau Kôranh Brah tâm rklaih, păng geh nau chrêk rmah toyh; May nsoh ma păng nau yơk jêh ri nau rnam.

⁶ May ăn ma păng nau ueh lăng ƀaƀơ n'ho ro; Nau Kôranh Brah gŭ ndrel ƀư ma păng hâk răm, răm maak.

⁷ Yor hađăch rnơm nsing ma Brah Yêhôva, Yor ma nau ueh tă bơh Nơm Dŭt Prêh, păng mâu mra mpât n'gơ ôh.

⁸ Ti hađăch mra dơi nhŭp lĕ rngôch phung rlăng đah păng; Ti ma hađăch mra geh nhŭp phung tâm rmot ma păng.

⁹ Tơlah Kôranh Brah gŭ ta nây, May ƀư ma khân păng nâm bu ŭnh năk duh; Tâm nau păng ji nuih, Brah Yêhôva mra rvăn ăn khân păng Jêh ri ŭnh mra sa khân păng.

¹⁰ Kôranh Brah mra ƀư rai phung kon sau khân păng bơh neh ntu, Jêh ri noi deh khân păng bơh phung kon bunuyh.

¹¹ Nđâp tơlah khân păng ŭch ƀư tâm rdâng ma Kôranh Brah Khân păng mĭn ƀư nau ƀai, ƀiălah khân păng mâu dơi jêng ôh.

¹² Kôranh Brah mra ăn khân păng plơ̆ nchuăt du, May van na pănh ta măt khân păng.

¹³ Ơ Brah Yêhôva, ăn May geh nau yơk tâm nau ktang May! Pôri hên mra mprơ jêh ri tâm rnê ma nau brah May.