Nau Mprơ Ơm 2 - Nau Brah Ndu Ngơi 2023

Nau chiă uănh Nơm Dơn Nau Tŏ Dak Ƀâu Kah

¹ Mâm ƀư lĕ bri dak geh nau uh ah? Jêh ri lĕ phung ƀon lan mĭn ŭch nau dơm dam?

² Lĕ phung hađăch ta neh ntu plơ̆ dâk tâm rdâng, Phung kôranh chiă uănh tâm rnglăp ndrăng khân păng Tâm rdâng đah Brah Yêhôva jêh ri đah Nơm Dơn Nau Tŏ Dak Ƀâu Kah Păng.

³ Khân păng lah: “Ăn nkê̆ch pă lơi nkông khân păng, Jêh ri mƀăr lơi rse rvăk khân păng ăn ngai đah he.”

⁴ Nơm gŭ tâm trôk mra gơm, Kôranh Brah mra mưch khân păng.

⁵ Nôk nĕ tâm nau ji nuih, Păng mra nduyh khân păng, Tâm nôk ji nuih, Kôranh Brah ƀư khân păng klach krit.

⁶ Păng lah: “Gâp yơh, Gâp hŏ ndâk Hađăch Gâp hŏ săch Ta klơ Siôn, jêng yôk kloh ueh Gâp.”

⁷ Gâp mra mbơh nau ntĭnh bơh Brah Yêhôva: Păng lah ma Gâp: “Kon jêng Kon Gâp; Nar aơ Gâp hŏ deh jêh Kon.

⁸ Dăn hom tă bơh Gâp, Gâp mra ăn lĕ bri dak jêng drăp ndơn ma Kon, Jêh ri lam lĕ rplay neh jêng drăp ndơ ma Kon.

⁹ Kon dŏng mâng tăk jra loih mbang nchah khân păng, Ƀư khân păng nchah lơi nâm bu yăng neh chah rai.”

¹⁰ Pônây yơh ơ phung hađăch, ăn khân may geh nau blau mĭn! Ơ phung kôranh phat dôih neh ntu, iăt hom nau mbơh!

¹¹ Pah kan hom ma Brah Yêhôva ma nuih n'hâm klach yơk, Maak răm hom ma nuih n'hâm râm nsâr.

¹² Chŭm Kon hom, klach Păng ji nuih Jêh ri khân may mra rai yot tâm trong khân may, Yorlah nau Păng ji nuih mra gơnh hao nuih. Ueh maak yơh ma mbu nơm nde krap ma Păng.