Nau Mprơ Ơm 19 - Nau Brah Ndu Ngơi 2023

Nau chrêk rmah Brah Ndu tâm neh ntu jêh ri nau vay

Nau Mprơ Ơm Y-Đavit, ƀư nchih ma nơm gai mprơ

¹ Lĕ rngôch ndâr trôk mbơh nau chrêk rmah Brah Ndu. Trôk tâm mpơl kan ti Păng ƀư.

² Nar aơ nti lah nau chrêk rmah Brah Ndu ma nar ri, Măng aơ ăn nau gĭt rbăng Brah Ndu ma măng ri.

³ Mâu geh bâr, mâu geh nau ngơi; Bu mâu đŏng tăng bâr khân păng.

⁴ Ƀiălah bâr khân păng huy lam neh ntu Jêh ri nau khân păng hŏ mbơh jêh tât ta dŭt bri dŭt neh. Ta klơ trôk, Păng hŏ ndâk jêh ngih bok ma nar.

⁵ Nar jêng tâm ban ma du huê sai luh tă bơh jrô păng, Maak răm nchuăt tâm rlong nâm bu du huê bunuyh dăng ktang.

⁶ Nar luh tă bơh mpeh trôk pa aơ, Nchuăt rval tât mpeh trôk pa ri. Mâu geh ndơ dơi der bơh nau duh nar.

⁷ Nau vay Brah Yêhôva jêng nŭm rĭng, Ntop nau rêh tâm huêng Nau ntĭnh bơh Brah Yêhôva jêng nanê̆, Ƀư ma phung rluk mâl jêng blau mĭn.

⁸ Nau vay Brah Yêhôva jêng sŏng, Ƀư ăn nuih n'hâm răm maak; Nau vay ntăm bơh Brah Yêhôva jêng kloh, Ƀư ăn ang măt ang nuih n'hâm.

⁹ Nau klach yơk ma Brah Yêhôva jêng kloh rsang, Hôm gŭ tât n'ho ro; Lĕ nau vay ƀư Brah Yêhôva jêng nau ngăn. Lĕ rngôch jêng sŏng srăng.

¹⁰ Lĕ nau nây khlay lơn ma mah, Nanê̆ ngăn khlay lơn ma mah chrêk; Njŭng lơn ma dak sŭt, Ngăn yơh njŭng lơn ma mpơng dak sŭt.

¹¹ Lĕ nau nây ntĭm nti ma oh mon Kôranh Brah; Mbu nơm djôt prăp păng mra geh nau nkhôm toyh.

¹² Mbu nơm dơi gĭt rbăng lĕ nau tih păng? Dăn Kôranh Brah yô̆ an lĕ nau tih gâp mâu gĭt.

¹³ Dăn Kôranh Brah mât oh mon Kôranh Brah bơh mĭn ŭch ƀư tih; Ăn nau tih nây lơi chiă uănh gâp Pôri gâp mâu mra dơi geh nau nduyh ôh, Jêh ri mâu ƀư tih toyh.

¹⁴ Ơ Brah Yêhôva jêng Lŭ Toyh jêh ri Nơm Tâm Chuai gâp, Ăn bâr mbung nau gâp ngơi, Jêh ri nau mĭn rvê tâm nuih n'hâm gâp tĭng mĭn ueh May ŭch!