Nau Mprơ Ơm 18 - Nau Brah Ndu Ngơi 2023

Nơm nchih tâm rnê ma Brah Yêhôva Yor dơi jêh đah phung rlăng

Nau Mprơ Ơm Y-Đavit, oh mon Brah Yêhôva, ƀư nchih ăn ma nơm gai mprơ. Păng mprơ nau mprơ aơ ma Brah Yêhôva tâm nar Kôranh Brah hŏ tâm rklaih păng tă bơh lĕ rngôch phung rlăng jêh ri tă bơh ti Y-Sôl. Păng lah:

¹ Ơ Brah Yêhôva, May jêng nau ktang gâp, Gâp rŏng ma May.

² Brah Yêhôva jêng lŭ toyh ma gâp, pôih nâp gâp jêh ri jêng Nơm tâm rklaih gâp. Brah Ndu gâp jêng lŭ toyh gâp, gâp gŭ krap tâm May Păng jêng khêl, jêng nke ma nau tâm rklaih, jêh ri jêng ntŭk gâp gŭ krap tâm ban lĕ.

³ Brah Yêhôva khư ma bu tâm rnê, Gâp kuăl mbơh sơm ma Păng, Jêh ri dơi rklaih jêh tă bơh lĕ phung rlăng đah gâp.

⁴ Rse nau khĭt nchueng jŭm gâp, Lĕ dak thăng nau rai yot ƀư ăn gâp klach krit.

⁵ Lĕ rse ƀon phung khĭt hŏ kât jŭm gâp, Lĕ dăk nau khĭt nthăng nhŭp gâp.

⁶ Tâm nau rêh ni gâp mbơh sơm ma Brah Yêhôva, Gâp kuăl ma Brah Ndu gâp. Bơh ngih brah, Păng tăng bâr gâp Jêh ri bâr gâp kuăl gay rklaih tât ta tôr Păng.

⁷ Rnôk aơ neh ntu n'găr mpât, Mbon lĕ yôk n'gơ n'găr tâm ban lĕ yorlah Păng ji nuih ngăn.

⁸ Nhhŭk ŭnh luh tă bơh trôm muh Păng, Mpiăt ŭnh hit luh tă bơh mbung Păng Ƀư ăn sa ônh hit hâng.

⁹ Păng rklêng trôk jêh ri jŭr gŭ; Tâm dâng jâng Păng geh ndâr tŭk krăk mbâl.

¹⁰ Păng ncho ta klơ Chêrubim jêh ri mpăr, Păng mpăr ta klơ ma năr n'hâm sial.

¹¹ Păng sŏk nau ngo ƀư bok nching nkŭm, Sŏk ndâr tŭk krăk mbâl dak ƀư king gŭ jŭm.

¹² Tă bơh nau ang chrêk rmah panăp Păng, Rgăn lĕ ndâr tŭk ngo mbâl, Geh mih pler jêh ri lĕ lơp nglaih hit ŭnh.

¹³ Brah Yêhôva mpơl lơp nglaih ta klơ lĕ ndâr trôk, Bâr Nơm Dŭt Prêh nteh huy ngăn, Ta nklang mih tŭp pler jêh ri lĕ lơp nglaih nchrat ŭnh.

¹⁴ Păng pănh hăr ƀư ma phung rlăng du pru pra, Luh nteh nglaih nchrat ang ăn khân păng krit ngăn.

¹⁵ Ơ Brah Yêhôva, yor nau May nduyh, Jêh ri yor n'hâm nsôr luh tă bơh trôm muh Păng, Blat dak mƀŭt mra mpơl Jêh ri lĕ mbon neh ntu mra saơ.

¹⁶ Păng yơr ti tă bơh prêh klơ kuăn gâp, Đŏt gâp luh bơh dak jru.

¹⁷ Păng tâm rklaih gâp tă bơh phung rlăng ktang, Tă bơh phung tâm rmot ma gâp; Yorlah khân păng jêng ktang lơn ma gâp.

¹⁸ Tâm nar rêh ni, khân păng hăn lơh gâp, Ƀiălah Brah Yêhôva chông n'gang gâp.

¹⁹ Păng njŭn gâp tâm ntŭk huy toyh, Tâm rklaih gâp yorlah Păng rŏng ma gâp.

²⁰ Brah Yêhôva hŏ nkhôm jêh ma gâp tĭng nâm nau sŏng srăng gâp, Mplơ̆ ma gâp tĭng nâm nau kloh ti gâp.

²¹ Yorlah gâp djôt prăp lĕ trong ndô̆ Brah Yêhôva, Mâu ƀư nau mhĭk jêh ri mâu chalơi Brah Ndu gâp.

²² Yorlah lĕ rngôch nau vay ƀư bơh Păng gŭ panăp gâp, Jêh ri gâp mâu nănh ngai ôh nau vay Păng dăp.

²³ Gâp gŭ ueh nŭm rĭng tanăp Păng Jêh ri prăp gâp nơm rklaih bơh nau mhĭk.

²⁴ Yor nây, Brah Yêhôva hŏ mplơ̆ sĭt jêh ma gâp tĭng nâm nau sŏng srăng gâp, Nkhôm ma gâp tĭng nâm nau kloh ti gâp tanăp Păng.

²⁵ Mbu nơm răp jăp, Kôranh Brah mra tâm mpơl nau răp jăp; Mbu nơm nŭm rĭng, Kôranh Brah mra tâm mpơl May nơm jêng nŭm rĭng.

²⁶ Mbu nơm kloh rsang, Kôranh Brah mra tâm mpơl May nơm jêng kloh rsang; Bi ma nơm kue, May mra tâm mpơl May nơm jêng blau mĭn.

²⁷ Kôranh Brah tâm rklaih phung dêh rhêt Ƀiălah n'glưh phung geh măt n'hao êng nơm.

²⁸ Kôranh Brah mpoh ŭnh kađen gâp; Brah Yêhôva Brah Ndu gâp mra sol ang ntŭk nau ngo gâp.

²⁹ Tă May gâp rduh lăp tâm phung tahan rlăng, Nsing ma Brah Ndu, gâp mra hăn rgăn mpêr ƀon.

³⁰ Bi ma Brah Ndu, lĕ trong Păng jêng nŭm rĭng. Nau Brah Yêhôva hŏ geh nau rlong uănh kloh jêh, Păng jêng khêl ma phung nde krap tâm Păng.

³¹ Knŏng Brah Yêhôva, mbu jêng Brah Ndu? Padih Brah Ndu hên, mbu jêng lŭ toyh?

³² Brah Ndu rêt rse bŭt gâp ma nau ktang, Jêh ri ƀư trong gâp dơi nŭm rĭng.

³³ Păng ƀư ma jâng gâp ngăch nâm bu jâng jun me Jêh ri dơm gâp gŭ nâp lĕ ntŭk prêh klơ.

³⁴ Păng nti ti gâp ma nau tâm lơh, Kŏ tât ntur ti gâp dơi van n'gâr na kông.

³⁵ Kôranh Brah ăn jêh khêl nau tâm rklaih ma gâp; Ti ma Kôranh Brah kuăn rdâng gâp Jêh ri nau ueh May hŏ ƀư jêh ma gâp jêng toyh.

³⁶ Kôranh Brah pơk huy trong tâm ăp nhuat gâp hăn, Gay jâng gâp mâu mbĭr prah ôh.

³⁷ Gâp mprơh tĭng phung rlăng đah gâp jêh ri tĭng ban khân păng; Gâp knŏng plơ̆ sĭt pakơi lôch jêh ƀư rai lĕ khân păng.

³⁸ Gâp lơh khân păng cha lôt jŭr kŏ tât mâu hôm dâk ôh; Khân păng cha lôt jŭr tâm dâng jâng gâp.

³⁹ Yorlah Kôranh Brah rêt jêh rse bŭt gâp đah nau ktang gay ma tâm lơh, Ăn phung rlăng chon mon panăp gâp.

⁴⁰ Kôranh Brah ƀư ăn phung rlăng rle ndŭr kơi nchuăt du; Bi ma phung tâm rmot đah gâp, gâp ƀư rai jêh khân păng.

⁴¹ Khân păng nter ƀiălah mâu geh bunuyh kơl rklaih, Nter dăn ma Brah Yêhôva ƀiălah Păng mâu plơ̆ sĭt lah ôh.

⁴² Gâp ƀư lêk khân păng nâm bu neh muy mpăr tâm sial, Nkhŭt khân păng nâm bu neh bŏk rŏ trong.

⁴³ Kôranh Brah tâm rklaih jêh gâp bơh nau phung ƀon lan tâm rdâng; Ndâk gâp ƀư bôk lĕ bri dak; Du phung ƀon lan mâu gĭt năl mra pah kan ma gâp.

⁴⁴ Tơlah tăng nkoch bri ma gâp, khân păng hŏ tông bâr jêh; Phung bu năch mra jan lah yơk panăp gâp.

⁴⁵ Phung bu năch rai lêk da dê nau rdja nuih, Chalơi pôih tahan ran lăp tâm nau nsâr râm.

⁴⁶ Brah Yêhôva gŭ rêh mro mrăng! Lŭ Toyh khư ma gâp mât ton tâm rnê! Dăn Brah Ndu nau tâm rklaih gâp geh nau yơk!

⁴⁷ Păng jêng Brah Ndu plơng bôk ma gâp, Ăn phung ƀon lan tâm dâng gâp.

⁴⁸ Păng tâm rklaih gâp bơh phung rlăng gâp; Ngăn yơh, Kôranh Brah nhhơk gâp prêh lơn ma phung tâm rdâng đah gâp, Jêh ri tâm rklaih gâp bơh phung janh ƀai.

⁴⁹ Yor nây, ơ Brah Yêhôva, gâp mra tâm rnê ma May ta nklang lĕ bri dak Jêh ri mprơ tâm rnê ma amoh May.

⁵⁰ Kôranh Brah ăn ma hađăch Păng lĕ nau dơi toyh, Jêh ri Păng ăn nau ueh lăng ma nơm Păng tŏ jêh dak ƀâu kah, Nây jêng Y-Đavit jêh ri ma noi deh păng kŏ tât lĕ rngôch rnôk n'ho ro.