Nau Mprơ Ơm 17 - Nau Brah Ndu Ngơi 2023

Dăn Kôranh Brah tâm rklaih tă bơh phung tŭn jot

Nau Y-Đavit mbơh sơm

¹ Ơ Brah Yêhôva! Dăn gŭ iăt jêh ri sek uănh nau sŏng srăng ma gâp; Gŭ iăt nau gâp nter; Dăn rkêng tôr ma nau gâp mbơh sơm, Tă bơh bâr mbung mâu geh nau ndơm ôh.

² Ăn Kôranh Brah koh dŏng nau di ma gâp; Dăn măt May sek uănh ma nau sŏng.

³ Kôranh Brah hŏ sek uănh jêh nuih n'hâm gâp, khâl gâp dôl măng; May rlong uănh gâp ƀiălah joi mâu saơ geh nau ôh; Gâp ntrâng ton trôm mbung gâp mâu mra ƀư tih.

⁴ Bi ma nau kan phung bunuyh, Gâp rnơm ma nau Kôranh Brah lah gay ma prăp ma gâp nơm Tă bơh trong phung janh ktang.

⁵ Gâp chuat hăn nâp jêh tâm trong Kôranh Brah, Jâng gâp mâu chêh prah ôh.

⁶ Ơ Brah Ndu, gâp mbơh sơm ma May yorlah May mra dơn nau gâp. Dăn Kôranh Brah rkêng tôr iăt nau gâp mbơh sơm.

⁷ Ơ Nơm tâm rklaih mbu nơm gŭ nde krap tâm ti ma May, Klaih bơh phung rlăng khân păng, Dăn tâm mpơl nau ueh khlay ngăn ngên May.

⁸ Dăn Kôranh Brah king n'gang gâp nâm bu găr klŏ măt; Dăn pôn gâp tâm dâng gui năr May,

⁹ Tă bơh phung mhĭk tŭn jot gâp, Tă bơh phung ƀư tih gŭ nchueng gâp.

¹⁰ Khân păng nchăng nâp nuih n'hâm khân păng nơm; Bâr mbung khân păng sưr rlau.

¹¹ Khân păng nchueng jŭm ăp nhuat hên, Măt khân păng mêt uănh gay joi nau lơh prah hên.

¹² Khân păng jêng nâm bu yau mŭr ŭch ma ndơ sa. Nâm bu yau mŭr kon pôn săk gŭ kâp.

¹³ Ơ Brah Yêhôva, dăn dâk hăn hom, tâm mâp jêh ri lơh rlâm lơi khân păng! Dŏng đao May tâm rklaih huêng gâp tă bơh phung mhĭk.

¹⁴ Ơ Brah Yêhôva, dŏng ti May rklaih an gâp tă bơh phung bunuyh neh ntu, Jêng phung khân păng knŏng geh tâm rnôk aơ. May ăn ndŭl khân păng bêng ler lĕ drăp ndơ May ăn prăp ma khân păng; Phung kon khân păng dơi rmeh ler tâm ban lĕ Jêh ri kŏ hôm e rmeh ăn ma phung sau khân păng.

¹⁵ Ƀiălah gâp mra nsing yor nau sŏng srăng Kôranh Brah ăn dĭng saơ muh măt Kôranh Brah; Tơlah gâp kah rngăl bê̆ch, gâp mra geh nau mpay, yorlah uănh rup May.