Nau Mprơ Ơm 148 - Nau Brah Ndu Ngơi 2023

Lĕ rngôch ndơ tâm rnê ma Brah Yêhôva

¹ Halêluya! Tă bơh lĕ ndâr trôk, tâm rnê hom ma Brah Yêhôva! Tâm lĕ ntŭk prêh, tâm rnê hom ma Păng.

² Hơi phung tông mpăr Păng, tâm rnê hom ma Păng! Hơi lĕ rngôch phung tahan Păng tâm trôk, tâm rnê hom ma Păng!

³ Hơi nar jêh ri khay, tâm rnê hom ma Păng! Hơi lĕ rngôch phung mănh mbing, tâm rnê hom ma Păng!

⁴ Hơi trôk tâm lĕ ndâr trôk, Hơi phung tu dak gŭ ta klơ lĕ ndâr trôk, Tâm rnê hom ma Păng!

⁵ Lĕ rngôch ndơ tâm rnê ma amoh Brah Yêhôva, Yorlah Păng ntăm jêh, lĕ rngôch dơi rhăk njêng da dê.

⁶ Păng njêng lĕ phung nây nâp ktang tât n'ho ro mâu blau lôch ôh; Păng ăn jêh nau vay gay khân păng mâu lăn rlau ôh.

⁷ Hơi phung mpa bri toyh tâm dak rlai jêh ri lĕ rngôch brŏng jru tâm neh, Tâm rnê hom ma Brah Yêhôva.

⁸ Hơi ŭnh jêh ri mih pler, dak pler jêh ri n'hôl dak, Sial jêh ri phŭt ktang, tông hom bâr Păng ntăm.

⁹ Phung yôk jêh ri dor, Phung tơm play jêh ri lĕ rngôch tơm si sêdar,

¹⁰ Phung mpa bri jêh ri lĕ rngôch mpô mpa, Phung ndrŭng vơr jêh ri phung sĭm mpăr,

¹¹ Phung hađăch neh ntu jêh ri lĕ rngôch phung ƀon lan, Phung kôranh toyh jêh ri phung kôranh phat dôih neh ntu,

¹² Phung bu klâu ndăm jêh ri bu ur druh, Phung bu ranh jêh ri kon se,

¹³ Ăn lĕ rngôch ndơ tâm rnê ma amoh Yêhôva! Yorlah knŏng amoh Păng yơh khư yơk mbah! Nau chrêk rmah Păng ta klơ lơn ma neh ntu jêh ri ma lĕ ndâr trôk.

¹⁴ Păng hŏ n'hao jêh nke phung ƀon lan n'gơr prêh, Gay ma phung răp jăp tâm rnê ma Păng, Nâm bu ntĭt ma phung kon Israel, jêng phung ƀon lan gŭ dăch Păng! Halêluya.