Nau Mprơ Ơm 147 - Nau Brah Ndu Ngơi 2023

Tâm rnê Brah Yêhôva yorlah nau ndâk tay ƀon Yêrusalem jêh ri geh jêng

¹ Halêluya! Ueh ngăn yơh dôl mprơ tâm rnê ma Brah Ndu he; Răm maak ngăn jêh ri di tâm rnê ma Păng!

² Brah Yêhôva rdâk ƀon Yêrusalem; Păng tâm rƀŭn phung kon Israel chah rai pru pra jêh;

³ Păng ƀư bah phung geh nuih n'hâm nchah rai Jêh ri put n'grêp ntŭk sôt khân păng.

⁴ Păng tâm nal rnoh lĕ mănh mbing, Jêh ri ntơ amoh ma lĕ rngôch mănh.

⁵ Kôranh Brah hên jêng dŭt toyh, geh nau brah mâu blau dŭt; Nau gĭt rbăng Păng dŭt toyh mâu blau lôch ôh.

⁶ Brah Yêhôva kâp kơl phung dêh rhêt, Ƀiălah lơh rlâm phung ƀai tŭp ta neh.

⁷ Mprơ hom ma Brah Yêhôva ma nau tâm rnê lah ueh, Kreh gong rêng loih gay tâm rnê ma Brah Ndu he.

⁸ Păng nkŭm lĕ ndâr trôk ma tŭk, Ndrăp dak mih ma neh ntu, Ƀư ăn gơ̆ hon tâm lĕ dor yôk.

⁹ Păng ăn ndơ sa ma phung mpô mpa bri, Jêh ri ăn ma phung kon nđak ndơ sa, tơlah khân păng nter.

¹⁰ Păng maak nuih n'hâm mâu di ta nau dăng seh, Păng răm maak mâu di ta tâm bar jâng kon bunuyh,

¹¹ Ƀiălah Brah Yêhôva maak tâm phung klach yơk ma Păng, Jêh ri mbu nơm n'gân nau kâp gân tâm nuih n'hâm ueh Păng.

¹² Ơ ƀon Yêrusalem, tâm rnê hom ma Brah Yêhôva! Ơ ƀon Siôn, tâm rnê hom ma Brah Ndu may!

¹³ Yor Păng hŏ ƀư nâp jêh mâng nđăng mpông pêr may, Jêh ri ăn nau ueh uĭn ma phung kon may ta nklang may.

¹⁴ Păng ăn nau đăp mpăn ma bri may, Ƀư ma may bêng ma ba ƀlê ueh lơn.

¹⁵ Păng njuăl nau ntăm ma neh; Nau păng ngơi nchuăt ngăch ngăn

¹⁶ Păng ăn mih pler nâm bu rsau biăp, Srih dak ngom nâm bu ŭnh buh.

¹⁷ Păng klŭp pler nđik jŭr âk rngơl; Mbu dơi gŭ tanăp nau nđik Păng?

¹⁸ Păng ntrŭnh nau ntăm, pler nđik lêk ro, Păng ƀư ăn sial khôm jêh ri dak hoch.

¹⁹ Păng tâm mpơl nau Păng ngơi ma Yakôb, Nau vay dăp jêh ri nau vay Păng ƀư ma phung Israel.

²⁰ Păng mâu ƀư pônây ôh ma bri dak êng; Khân păng mâu gĭt rbăng ôh nau vay Păng ƀư. Halêluya!