Nau Mprơ Ơm 146 - Nau Brah Ndu Ngơi 2023

Tâm rnê ma Brah Yêhôva jêng Nơm kơl tâm rklaih

¹ Halêluya! Ơ huêng gâp, tâm rnê hom ma Brah Yêhôva!

² Gâp mra tâm rnê ma Brah Yêhôva du bông nau rêh gâp. Ndah jŏ nar gâp hôm rêh, gâp mra mprơ tâm rnê ma Brah Ndu dŭm nĕ lĕ.

³ Lơi rnơm nsing ma phung kon hađăch ôh, Mâu lĕ rnơm nsing ma kon bunuyh jêng ntŭk mâu geh nau tâm rklaih.

⁴ Lah tăch n'hâm, kon bunuyh plơ̆ sĭt ro ta ndruyh neh; Tâm nar nây yơh, lĕ nau păng ŭch ƀư rai lôch.

⁵ Ueh maak yơh ma nơm geh Brah Ndu Yakôb jêng nơm kơl păng, N'gân nau păng kâp gân tâm Yêhôva Brah Ndu!

⁶ Păng jêng Nơm rhăk njêng trôk jêh ri neh ntu, Dak Mƀŭt jêh ri lĕ rngôch mpa tâm khân păng; Păng djôt prăp nau răp jăp n'ho ro.

⁷ Păng ƀư nau di ma phung bu tŭn jot, Jêh ri ăn ndơ sông sa ma phung ji ngot. Brah Yêhôva rklaih phung bu nă jêng kon me.

⁸ Brah Yêhôva ăn phung chieh măt dơi lin; Brah Yêhôva kơl phung rdja nuih n'hâm; Brah Yêhôva rŏng ma phung sŏng srăng.

⁹ Brah Yêhôva king n'gang phung bu năch, Kơl rđâng phung kon đơi jêh ri bu ur ndrô, Ƀiălah Păng ƀư rai lơi trong phung ƀai.

¹⁰ Brah Yêhôva mra chiă uănh n'ho ro; Hơi ƀon Siôn, Brah Ndu may ƀư Hađăch bơh rnôk aơ tât rnôk ri! Halêluya!