Nau Mprơ Ơm 145 - Nau Brah Ndu Ngơi 2023

Tâm rnê ma nuih n'hâm ueh jêh ri nau brah Brah Yêhôva

Nau mprơ Y-Đavit tâm rnê

¹ Ơ Brah Ndu jêng Hađăch gâp, gâp mra yơk tâm rnê ma May, Mât ton ma amoh May tât ƀaƀơ n'ho ro.

² Ăp nar gâp mra tâm rnê ma May. Tâm rnê ma amoh May tât ƀaƀơ n'ho ro.

³ Brah Yêhôva jêng dŭt toyh jêh ri khư ma nau tâm rnê; Nau dŭt toyh Păng mâu dơi veh ôh.

⁴ Rơh bunuyh aơ tât rơh bunuyh ri mra tâm rnê ma kan May, Jêh ri mra mbơh lĕ nau kan brah May.

⁵ Gâp gŭ mĭn ma nau lit rnam, bêng nau chrêk rmah May, Jêh ri ma kan khlay May.

⁶ Bu mra mbơh nau brah dŭh prêh khư klach ngăn bơh May, Jêh ri gâp mra nkoch bri ma nau dŭt toyh May.

⁷ Bu mra kah gĭt nkoch ndray ma nau ueh May mâu blau lôch, Jêh ri mra mprơ troh rhơn ma nau sŏng srăng May.

⁸ Brah Yêhôva ăn nau ueh ƀaƀơ, vay yô̆ nđach Mâu gơnh duh nuih jêh ri bêng nau ueh.

⁹ Brah Yêhôva ƀư nau ueh ma lĕ rngôch bunuyh, Nau Păng yô̆ nđach gŭ ta lĕ rngôch ndơ Păng rhăk njêng.

¹⁰ Ơ Brah Yêhôva, lĕ rngôch kan May mra tâm rnê ma May; Lĕ phung răp jăp đah May mra tâm rnê ma May.

¹¹ Khân păng mra ngơi ma nau chrêk rmah ƀon bri hađăch May, Nkoch tay nau brah May,

¹² Gay tâm mpơl phung kon bunuyh gĭt năl nau kan brah May Jêh ri nau chrêk rmah hit rnam ƀon bri hađăch May.

¹³ Ƀon bri hađăch May jêng ƀon bri hađăch n'ho ro, Nau May chiă uănh gŭ mro tă bơh rơh aơ tât rơh ri.

¹⁴ Brah Yêhôva chông lĕ rngôch phung tŭp, Jêh ri Păng mphâk lĕ rngôch phung rdja nuih.

¹⁵ Măt lĕ ntil mpô mpa kâp gân ma May da dê, May ăn ndơ sông sa ma khân păng di yan.

¹⁶ May pơk huy ti May, Ƀư mpay ma lĕ rngôch mpa rêh.

¹⁷ Brah Yêhôva jêng sŏng srăng tâm lĕ trong Păng, Jêh ri bêng nau ueh tâm lĕ kan Păng.

¹⁸ Brah Yêhôva gŭ dăch đah lĕ rngôch phung kuăl mbơh sơm ma Păng, Jêng gŭ dăch phung kuăl mbơh sơm ma Păng ma nau nanê̆ ngăn.

¹⁹ Păng ƀư mpay ma phung klach yơk Păng, Tăng đŏng nau khân păng kuăl dăn jêh ri rklaih an khân păng.

²⁰ Brah Yêhôva king n'gang lĕ rngôch phung rŏng ma Păng, Ƀiălah Păng mra ƀư rai lĕ rngôch phung ƀai.

²¹ Bâr mbung gâp mra mprơ tâm rnê ma Brah Yêhôva; Ăn lĕ rngôch nglay săk mât ton ma amoh kloh ueh Păng tât ƀaƀơ n'ho ro.