Nau Mprơ Ơm 144 - Nau Brah Ndu Ngơi 2023

Dăn Brah Ndu rklaih jêh ri ăn nau ueh uĭn ma phung ƀon lan Păng

Nau mprơ Y-Đavit

¹ Tâm rnê ma Brah Yêhôva jêng Lŭ Toyh ma gâp! May nti an ti gâp tâm lơh, sâm nti nglau ti gâp tâm lơh.

² May jêng Nơm geh nau ueh jêh ri pôih nâp ma gâp, Jêng ntŭk gâp krap jêh ri Nơm tâm rklaih gâp, Jêng khêl ma gâp jêh ri ntŭk gâp gŭ krap; May ƀư ăn phung mpôl băl lăp gŭ tâm dâng gâp.

³ Ơ Brah Yêhôva, moh bunuyh jêng, kŏ tât May gĭt ma păng? Moh kon bunuyh jêng, kŏ tât May meng păng?

⁴ Bunuyh jêng nâm bu n'hâm nsôr, Nau rêh bunuyh nâm bu gui mpăr rgăn.

⁵ Ơ Brah Yêhôva, dăn May n'glưh lĕ ndâr trôk jêh ri jŭr hom, Pah tât ta phung yôk jêh ri khân păng mra luh nhhŭk ŭnh.

⁶ Dăn May ƀư nglaih lơp, gay nchah rai lơi phung rlăng, Dăn May pănh hăr, ƀư ăn rung răng khân păng.

⁷ Tă bơh klơ; dăn ti May rklaih gâp, Chông an gâp rklaih bơh dak thăng toyh, Jêh ri bơh ti phung bu năch.

⁸ Trôm mbung khân păng ngơi ma nau ndơm, Ti ma khân păng jêng ti mƀruh.

⁹ Ơ Brah Ndu, gâp mra mprơ ma May du nau mprơ mhe, Gâp mra mprơ nau tâm rnê May ma gong rêng loih jât rse.

¹⁰ May hŏ rklaih jêh ma phung hađăch, Jêh ri rklaih Y-Đavit, oh mon May, bơh đao ƀư rai.

¹¹ Sâm rklaih gâp klaih bơh ti phung bu năch; Mbung khân păng ngơi nau ndơm, Ti ma khân păng jêng ti ma mƀruh.

¹² Ăn phung kon bu klâu hên dôl mon ndăm Nâm bu tơm si luh chăt hon dăng ktang; Ăn phung kon bu ur hên jêng nâm bu meh n'gâng, Trah mon tĭng rup ngih hađăch.

¹³ Dăn lĕ jay prăp hên bêng ler Ma lĕ rngôch ntil play kao; Dăn phung biăp hên bĭk rơ̆ âk rbăn, âk rmưn Tâm lĕ mir hên.

¹⁴ Ăn phung ndrôk me hên deh âk kon; Ăn mpêr ƀon mâu dơi bluh ôh, Phung ƀon lan mâu ƀư bu nă, Jêh ri mâu geh nau nteh nhĭm ta trong sâng.

¹⁵ Ueh maak yơh ma phung ƀon lan geh nau tâm ban pônây! Ueh maak yơh phung ƀon lan geh Brah Yêhôva jêng Brah Ndu khân păng!