Nau Mprơ Ơm 143 - Nau Brah Ndu Ngơi 2023

Dăn Brah Ndu rklaih bơh phung rlăng

Nau Mprơ Ơm bơh Y-Đavit

¹ Ơ Brah Yêhôva, iăt hom nau gâp mbơh sơm, Rkêng hom tôr iăt nau gâp vơl dăn; Yor nau răp jăp jêh ri nau sŏng srăng May Dăn plơ̆ sǐt lah ma gâp.

² Lơi dĭng phat dôih ma oh mon May ôh, Yorlah mâu geh du huê jêng sŏng srăng tanăp May ôh.

³ Nơm rlăng hăn tĭng huêng gâp, Jot plên nau rêh gâp ta neh; Păng ƀư ma gâp gŭ tâm ntŭk ngo, nâm bu phung khĭt bơh jŏ jêh.

⁴ Yor nây huêng gâp rgănh huơi, Nuih n'hâm gâp uh ah.

⁵ Gâp kah gĭt tay ma lĕ nar rnôk kăl e, Gâp gŭ mĭn ma lĕ rngôch kan May ƀư Jêh ri gŭ mĭn ma kan ti May.

⁶ Gâp yơr ti let mpeh ma May; Huêng gâp ji hir ma May nâm bu neh sơh. (Sêla)

⁷ Ơ Brah Yêhôva! Gơnh plơ̆ sǐt lah nau gâp dăn! Huêng gâp rgănh huơi. Lơi pôn măt May ma gâp, Klach lah gâp tâm ban ma phung jŭr ta môch.

⁸ Ơm ôi, ăn gâp iăt nuih n'hâm ueh May, Yorlah gâp rnơm nsing ma May; Dăn ntĭm ăn gâp gĭt, trong gâp mra hăn, Yorlah huêng gâp kâp gân May.

⁹ Ơ Brah Yêhôva, rklaih an gâp bơh phung rlăng; Gâp hăn krap ta May.

¹⁰ Sâm nti gâp ƀư tĭng nau May ŭch, Yorlah May jêng Brah Ndu gâp; Brah May jêng ueh Njŭn leo gâp tâm neh lâng.

¹¹ Ơ Brah Yêhôva, yorlah amoh May, ƀư rêh hom gâp; Tâm nau sŏng srăng May, mphâk lơi huêng gâp bơh nau uh ah.

¹² Tâm nuih n'hâm ueh May, dăn nkhĭt lơi lĕ phung rlăng gâp, Ƀư rai lĕ rngôch phung tŭn jot gâp Yor gâp jêng oh mon May.