Nau Mprơ Ơm 142 - Nau Brah Ndu Ngơi 2023

Dăn Brah Ndu kơl tâm nau rêh ni

Nau mprơ nti Y-Đavit. – Nau mbơh sơm nôk gŭ tâm trôm lŭ

¹ Bâr gâp kuăl dăn ma Brah Yêhôva; Bâr gâp vơh vơl dăn ma Brah Yêhôva.

² Gâp tâm mpơl nau rêh ni gâp tanăp Păng, Nkoch bri nau uh ah gâp ma Păng.

³ Tơlah huêng gâp rgănh huơi, May gĭt rah vah jêh trong gâp. Tâm trong gâp hăn. Khân păng tâm nchră ndrel ƀư dăk sân gâp.

⁴ Dăn May uănh pa ma gâp, Aơ, mâu geh bunuyh srâng iăt tât ma gâp ôh; Mâu đŏng geh ntŭk gay ma gâp nsing; Mâu geh nơm meng ma nau rêh gâp ôh.

⁵ Ơ Brah Yêhôva, gâp kuăl dăn ma May pô aơ: “May jêng ntŭk gâp gŭ krap, Jêng ndơ bu pă ma gâp tâm n'gor bri phung rêh.”

⁶ Dăn May iăt nau gâp nter, Yor gâp jêng rêh ni ngăn ngên. Sâm rklaih an gâp bơh phung ƀư mhĭk đah gâp Yor khân păng ktang lơn ma gâp.

⁷ Mphâk lơi huêng gâp tă bơh ndrung bu nă Gay ma gâp tâm rnê lah ueh ma amoh May. Phung sŏng srăng mra gŭ jŭm gâp Yorlah May hŏ ƀư ueh ma gâp.