Nau Mprơ Ơm 140 - Nau Brah Ndu Ngơi 2023

Dăn Brah Ndu rklaih bơh phung rlăng

Nau Mprơ Ơm Y-Đavit. Nchih ăn ma nơm gai mprơ.

¹ Ơ Brah Yêhôva, rklaih gâp bơh phung ƀai; N'gang gâp bơh bunuyh janh ƀai,

² Jêng phung nchră ŭch ƀư nau mhĭk tâm nuih n'hâm, Jêh ri ăp nar ŭch nau tâm lơh.

³ Khân păng tôl mplanh mpiăt khân păng nâm bu mpiăt bêh, Ndôi khân păng geh dak kăch bêh ku. (Sêla)

⁴ Ơ Brah Yêhôva, mât mray gâp bơh ti phung ƀai, N'gang gâp bơh bunuyh janh ƀai, Jêng phung tâm nchră ƀư prah jâng gâp.

⁵ Phung sưr sân dăk, Khân păng nthăng rse ling nhuăl ta trong Jêh ri ƀư dăk sân ƀư mhĭk ma gâp. (Sêla)

⁶ Gâp lah ma Brah Yêhôva pô aơ: “May jêng Brah Ndu gâp. Hơi Brah Yêhôva! Rkêng hom tôr May iăt bâr gâp vơl dăn.”

⁷ Ơ Kôranh Brah jêng Brah Yêhôva, jêng nau ktang tâm rklaih gâp, May king n'gang bôk gâp ta nar tâm lơh.

⁸ Ơ Brah Yêhôva, lơi May ăn phung ƀai dơi geh nau păng ŭch; Dăn lơi kơl nau nchră khân păng dơi jêng, klach khân păng n'hao êng ma khân păng nơm. (Sêla)

⁹ Nau phung mhĭk ngơi mâu ueh ma gâp Ăn tŭp ta bôk khân păng nơm!

¹⁰ Ăn sa ônh rnga nkhŭt ta klơ khân păng! Ăn bu klŭp khân păng tâm ŭnh, Tâm ntu jru, ta nây khân păng mâu hôm dơi dâk ôh!

¹¹ Lơi ăn bunuyh geh mpiăt ndơm dơi gŭ nâp tâm n'gor; Ăn nau djơh mra hăn tĭng joi bunuyh janh ƀai!

¹² Gâp gĭt Brah Yêhôva mra koh dŏng nau di ma phung o ach, Phat dôih nau sŏng ma bunuyh pưt kƀah.

¹³ Nanê̆ phung sŏng srăng mra tâm rnê lah ueh ma amoh May; Phung sŏng mra gŭ rêh tanăp May.