Nau Mprơ Ơm 139 - Nau Brah Ndu Ngơi 2023

Kôranh Brah gĭt lĕ rngôch jêh ri gŭ lam ntŭk

Nau Mprơ Ơm Y-Đavit. Nchih ăn ma nơm gai mprơ

¹ Ơ Brah Yêhôva, May hŏ sek uănh gâp jêh Jêh ri May gĭt rah vah gâp.

² May gĭt lĕ dôl gâp gŭ, dôl gâp dâk; Ntơm bơh ngai may gĭt rah vah nau mĭn gâp.

³ May sek uănh trong gâp hăn jêh ri ntŭk gâp gŭ rlu, Gĭt năl lĕ trong gâp.

⁴ Nôk nau ngơi ê hŏ gŭ tâm mpiăt gâp, Ơ Brah Yêhôva! May hŏ gĭt lĕ jêh.

⁵ May gŭ jŭm gâp, panăp nđâp ma pakơi, Pah ti May ta klơ gâp.

⁶ Nau gĭt rbăng tâm ban pônây jêng khlay ngăn ma gâp, Prêh ir ngăn kŏ tât gâp mâu dơi gĭt rbăng ôh!

⁷ Ntŭk gâp mra hăn ngai bơh Huêng May? Ta ntŭk gâp mra du krap bơh muh măt May?

⁸ Tơlah gâp hao ta klơ trôk, May gŭ ta nây lĕ, Tơlah gâp jŭr bê̆ch tâm dâng ƀon phung khĭt, ri May gŭ ta nây lĕ.

⁹ Lah gâp sŏk năr luh nar, Mpăr rgăn bôl dŭt dak rlai,

¹⁰ Ta nây ăt geh ti May mra njŭn leo gâp, Ti ma May mra djôt prăp gâp.

¹¹ Tơlah gâp lah: “N'hêl nanê̆ nau ngo mra nkŭm lơi gâp, Jêh ri nau ang jŭm gâp jêng măng,”

¹² Ƀiălah nau ngo nây ăt mâu dơi nkŭm lĕ ma May ôh, Dôl măng mra ang tâm ban ma dôl nar, Jêh ri nau ngo jêng nau ang đŏng đah May.

¹³ Yorlah May yơh mon njêng tâm trôm nuih n'hâm gâp, Tanh njêng gâp tâm trôm ndŭl me gâp.

¹⁴ Gâp tâm rnê lah ueh ma May, yor lĕ nau May njêng gâp klach krit jêh ri khlay ngăn ngên. Nau kan May dŭt khlay ngăn, Nuih n'hâm gâp gĭt rah vah ngăn nau nây.

¹⁵ Nôk May njêng gâp tâm ntŭk ndâp, May tanh gâp blau ir tâm ntŭk jru ir ngăn ta neh ntu, Pôri lĕ ntĭng nđăng gâp mâu dơi pôn tanăp May.

¹⁶ Măt May hŏ saơ jêh nau săk jăn mâu geh rup gâp; Rnoh lĕ nar tâm nal ma may, Hŏ nchih jêh tâm ndrom samƀŭt May Nôk ê hŏ geh du nar tâm lĕ nar nây.

¹⁷ Ơ Brah Ndu, lĕ nau mĭn May khlay âk ngăn ma gâp! Lĕ nau mĭn nây dŭt toyh!

¹⁸ Lah gâp ŭch kơp lĕ nau mĭn nây mra âk lơn choih. Nôk gâp kah rngăl, ăt gâp gŭ ndrel ma May.

¹⁹ Ơ Brah Ndu! Nanê̆ May mra ƀư rai phung ƀai. Ơ phung bunuyh ji hir mham, du hom khân may ƀah đah gâp!

²⁰ Khân păng srôih ngơi lĕ nau mhĭk ƀai ma May, Phung rlăng dâk tâm rdâng đah May jêng dơm dam.

²¹ Ơ Brah Yêhôva! Mâm ƀư gâp mâu tâm rmot ma phung tâm rmot ma May? Jêh ri mâu mưch rmot ôh ma phung tâm rdâng đah May?

²² Gâp tâm rmot hâu ngăn ma khân păng, Kơp khân păng jêng phung rlăng đah gâp.

²³ Ơ Brah Ndu! Dăn sek uănh gâp jêh ri gĭt nuih n'hâm gâp; Rlong uănh gâp gay ma gĭt nau mĭn gâp;

²⁴ Rlong uănh gâp gĭt lah geh nau mhĭk mâu lah mâu, Jêh ri sâm njŭn leo gâp tâm trong n'ho ro.