Nau Mprơ Ơm 137 - Nau Brah Ndu Ngơi 2023

Nau rngot klâng phung hăn ƀư bu nă ta bri Babilôn

¹ Hên dôl gŭ ta kơh dak krong Babilôn, Kah gĭt ma ƀon Siôn jêh ri nhĭm.

² Hên yông gong rêng loih hên Ta klơ n'gĭng tơm si yôr ta kơh dak krong nây.

³ Yorlah ta nây phung nhŭp hên ƀư jêng bu nă Đă hên mprơ; Phung tŭn jot hên đă hên mprơ ma nau hâk răm; Khân păng lah: “Mprơ hom ma hên du nau mprơ bơh Siôn!”

⁴ Tâm bri phung bu năch, Mâm ƀư hên dơi mprơ nau mprơ ma Brah Yêhôva?

⁵ Ơ Yêrusalem, tơlah gâp chuêl may, Ăn ti ma gâp chuêl nau ktang păng!

⁶ Tơlah gâp mâu kah gĭt đah may, Mâu uănh Yêrusalem jêng nau răm maak toyh ma gâp, Ăn mpiăt gâp krêp đah rmlông trôm mbung gâp!

⁷ Ơ Brah Yêhôva, ăn May kah gĭt ma lĕ nau phung kon sau bri Êđôm hŏ ƀư jêh; Tâm nar bu sŏk jêh ƀon Yêrusalem, Khân păng lah: “Ƀư rai hom! Ƀư rai hom! Ƀư lâng kŏ tât ta mbon păng!”

⁸ Ơ kon bu ur Babilôn, nơm bu mra ƀư rai! Ueh maak yơh ma nơm mplơ̆ plơng may Tĭng nâm nau mhĭk may hŏ ƀư jêh ma he!

⁹ Ueh maak yơh ma nơm nhŭp kon jê̆ may, Jêh ri mbang hăch khân păng ta lŭ!