Nau Mprơ Ơm 136 - Nau Brah Ndu Ngơi 2023

Tâm rnê lah ueh ma nuih n'hâm ueh Brah Yêhôva

¹ Tâm rnê lah ueh hom ma Brah Yêhôva yorlah Păng jêng nơm ueh; Nuih n'hâm ueh Păng hôm ƀaƀơ n'ho ro.

² Tâm rnê lah ueh hom ma Brah Ndu ma lĕ phung brah, Yor nuih n'hâm ueh Păng hôm tât ƀaƀơ n'ho ro.

³ Tâm rnê hom ma Kôranh Brah ma lĕ rngôch phung brah, Yor nuih n'hâm ueh Păng hôm tât n'ho ro.

⁴ Knŏng du huê Păng nơm ƀư lĕ kan khlay dŭt toyh, Yor nuih n'hâm ueh Păng hôm tât ƀaƀơ n'ho ro.

⁵ Nơm rhăk njêng jêh lĕ ndâr trôk ma nau blau mĭn, Yor nuih n'hâm ueh Păng hôm tât ƀaƀơ n'ho ro.

⁶ Nơm lăk jêh neh ta klơ dak, Yor nuih n'hâm ueh Păng hôm tât ƀaƀơ n'ho ro.

⁷ Nơm rhăk njêng jêh âk rplay ang toyh, Yor nuih n'hâm ueh Păng hôm tât ƀaƀơ n'ho ro.

⁸ Nar chiă uănh tâm nôk nar, Yor nuih n'hâm ueh Păng hôm tât n'ho ro.

⁹ Khay jêh ri lĕ phung mănh mbing chiă uănh măng, Yor nuih n'hâm ueh Păng hôm tât n'ho ro.

¹⁰ Păng yơh nơm dong khĭt phung kon bu klâu bôk rah bri Êjipt, Yor nuih n'hâm ueh Păng hôm tât n'ho ro.

¹¹ Djôt leo phung Israel bơh bri Êjipt Yor nuih n'hâm ueh Păng hôm tât n'ho ro.

¹² Ma mpang ti brah jêh ri nting tur yơr, Yor nuih n'hâm ueh Păng hôm tât n'ho ro.

¹³ Păng tâm pă Dak Mƀŭt Chăng jêng bar, Yor nuih n'hâm ueh Păng hôm tât n'ho ro.

¹⁴ Păng ăn phung Israel hăn rgăn ta nklang dak mƀŭt, Yor nuih n'hâm ueh Păng hôm tât n'ho ro.

¹⁵ Ƀiălah Păng nklơ̆ Pharaôn jêh ri phung tahan păng trŭnh tâm Dak Mƀŭt Chăng, Yor nuih n'hâm ueh Păng hôm tât n'ho ro.

¹⁶ Nơm njŭn phung ƀon lan Păng rgăn bri rdah, Yor nuih n'hâm ueh Păng hôm tât n'ho ro.

¹⁷ Lơh rai jêh phung hađăch toyh, Yor nuih n'hâm ueh Păng hôm tât n'ho ro.

¹⁸ Nkhĭt phung hađăch lư n'găr, Yor nuih n'hâm ueh Păng hôm tât n'ho ro.

¹⁹ Nây jêng Sihôn, phung hađăch Amôrit, Yor nuih n'hâm ueh Păng hôm tât n'ho ro;

²⁰ Jêh ri Ôk, hađăch n'gor Basan, Yor nuih n'hâm ueh Păng hôm tât n'ho ro.

²¹ Păng ăn n'gor neh khân păng jêng drăp ndơn, Yor nuih n'hâm ueh Păng hôm tât n'ho ro;

²² Jêng drăp ndơn ma phung Israel jêng oh mon Păng, Yor nuih n'hâm ueh Păng hôm tât n'ho ro.

²³ Nơm kah gĭt lĕ nau rêh hên hŏt rgănh, Yor nuih n'hâm ueh Păng hôm tât n'ho ro;

²⁴ Păng tâm rklaih hên bơh phung rlăng, Yor nuih n'hâm ueh Păng hôm tât n'ho ro.

²⁵ Păng ăn đŏng ndơ sông sa ma lĕ rngôch nglay săk, Yor nuih n'hâm ueh Păng hôm tât n'ho ro.

²⁶ Tâm rnê lah ueh hom ma Brah Ndu tâm lĕ ndâr trôk! Yor nuih n'hâm ueh Păng hôm tât n'ho ro.