Nau Mprơ Ơm 135 - Nau Brah Ndu Ngơi 2023

Brah Ndu jêng Nơm geh lĕ nau brah, bi rup brah jêng dơm dam

¹ Halêluya! Tâm rnê hom ma amoh Brah Yêhôva. Ơ phung oh mon Brah Yêhôva,

² Jêng phung gŭ tâm ngih Brah Yêhôva, Tâm nkual nhuang ngih Brah Ndu he, Tâm rnê hom ma Păng!

³ Mprơ tâm rnê hom ma Brah Yêhôva yorlah Brah Yêhôva jêng nơm ueh; Mprơ nau tâm rnê ma amoh Păng yorlah nây jêng nau maak.

⁴ Yorlah Brah Yêhôva hŏ săch jêh Yakôb ma Păng nơm, Sŏk phung Israel jêng drăp ndơn êng ma Păng.

⁵ Gâp gĭt Brah Yêhôva jêng dŭt toyh, Kôranh Brah he ta klơ lơn ma lĕ rngôch brah.

⁶ Brah Yêhôva ƀư lĕ ndơ ueh ma nau Păng ŭch, Nđâp lah tâm trôk mâu lah tâm neh ntu, Tâm dak rlai mâu lah tâm lĕ rngôch brŏng jru.

⁷ Păng ăn ndâr tŭk hao bơh nglĕ dŭt rplay neh, Ƀư lơp nglaih ndrel ma mih, Ăn sial khôm luh tă bơh lĕ jay Păng prăp drăp ndơ khlay.

⁸ Păng dong nkhĭt phung kon bu klâu bôk rah tâm n'gor Êjipt, Ntơm bơh bunuyh kŏ tât ma mpô mpa.

⁹ Păng ƀư lĕ nau mbên jêh ri nau khlay ta nklang Êjipt, Gay ma phat dôih hađăch Pharaôn jêh ri ma lĕ rngôch phung oh mon păng.

¹⁰ Păng lơh rai âk jêh phung mpôl băl toyh Jêh ri Păng nkhĭt lĕ phung hađăch janh ktang,

¹¹ Jêng Sihôn, hađăch phung Amôrit, Ôk, hađăch ma phung Basan Jêh ri lĕ rngôch hađăch n'gor Kanaan.

¹² Păng ăn ma n'gor khân păng jêng drăp ndơn, Jêng drăp ndơn ma Israel phung ƀon lan Păng.

¹³ Ơ Brah Yêhôva, amoh May hôm tât ƀaƀơ; Ơ Brah Yêhôva, Nau kah gĭt ndray ma May gŭ mro ntơm bơh rnôk aơ tât rnôk ri.

¹⁴ Yorlah Brah Yêhôva mra koh dŏng phung ƀon lan Păng, Jêh ri yô̆ nđach ma phung oh mon Păng.

¹⁵ Rup brah phung ƀon lan ƀư ma prăk jêh ri mah, Jêng kan bơh ti bunuyh ƀư.

¹⁶ Khân păng geh trôm mbung ƀiălah mâu ngơi ôh, Geh măt ƀiălah mâu saơ ôh,

¹⁷ Geh tôr ƀiălah mâu tăng ôh, Jêh ri tâm trôm mbung khân păng mâu geh n'hâm nsôr.

¹⁸ Mbu nơm ƀư rup brah, Jêh ri mbu nơm rnơm ma khân păng Jêng tâm ban khân păng da dê.

¹⁹ Ơ ngih Israel, tâm rnê hom ma Brah Yêhôva! Ơ ngih Arôn, tâm rnê hom ma Brah Yêhôva!

²⁰ Ơ ngih Lêvi, tâm rnê hom ma Brah Yêhôva! Ơ phung klach yơk ma Brah Yêhôva, tâm rnê hom ma Brah Yêhôva!

²¹ Tâm rnê hom ma Brah Yêhôva bơh Siôn Jêng Nơm gŭ ta Yêrusalem! Halêluya!