Nau Mprơ Ơm 132 - Nau Brah Ndu Ngơi 2023

Dăn Brah Yêhôva ăn nau ueh uĭn ma ntŭk kloh ueh

Nau mprơ hăn hao tưng gưl

¹ Ơ Brah Yêhôva! Ăn may kah gĭt ma Đavit Ma lĕ nau rêh ni păng anh.

² Păng sân săk ma Brah Yêhôva Jêh ri ton đah Nơm Geh Lĕ Nau Brah Yakôb:

³ “Gâp mâu mra lăp ôh tâm ngih gâp, Mâu lĕ hao ta sưng bê̆ch gŭ rlu,

⁴ Gâp mâu mra ăn măt gâp bê̆ch ôh, Mâu lĕ ăn n'gô măt gâp nhêp

⁵ Kŏ tât rnôk gâp joi dơi saơ du ntŭk ma Brah Yêhôva, Du ntŭk gŭ ma Nơm Geh Lĕ Nau Brah Yakôb.”

⁶ Aơ hên tăng bu lah ma Hip Nau Tâm Rnglăp gŭ ta n'gor Êphratha, Jêh ri joi saơ Hip nây tâm mir Ja ar.

⁷ Hên mra lăp tâm ntŭk Păng gŭ; Yơk mbah ta tâm dâng rnơl chrong jâng May.

⁸ Ơ Brah Yêhôva, gơnh lăp ta ntŭk May rlu Ndrel Hip Nau Tâm Rnglăp bêng nau brah May!

⁹ Ăn ma phung kôranh ƀư brah May nsoh nau sŏng, Phung klach yơk May mra nter maak.

¹⁰ Yor Đavit jêng oh mon May, Lơi dun ôh ma nơm May tŏ dak ƀâu kah.

¹¹ Brah Yêhôva hŏ sân săk jêh ma Đavit, Du nau ton Păng mâu mra rgâl ôh nau tâm rnglăp, pô aơ: “Gâp mra n'gân du huê bơh ndŭl proch may Hao ta klơ sưng hađăch ntrok chiă uănh.

¹² Tơlah phung kon may djôt prăp nau Gâp tâm rnglăp Jêh ri nau Gâp ntĭnh mra nti ma khân păng, Pôri phung kon khân păng Mra gŭ ta sưng hađăch may tât n'ho ro.”

¹³ Yorlah Brah Yêhôva săch jêh ƀon Siôn; Păng ŭch Siôn ƀư ntŭk Păng gŭ;

¹⁴ Păng lah: “Aơ jêng ntŭk Gâp gŭ rlu ƀaƀơ n'ho ro; Gâp mra gŭ ta nây yorlah Gâp ŭch jêh kơt nĕ.

¹⁵ Gâp mra ăn nau ueh uĭn ma Siôn dơi rmeh ler ndơ sông sa, Ma phung o ach tâm ƀon nây dơi sa ƀănh dơi hơm.

¹⁶ Gâp mra sâm nsoh ma phung kôranh ƀư brah ƀon nây nau tâm rklaih, Jêh ri phung klach yơk păng mra nter hâk răm.

¹⁷ Ta nây, Gâp mra ăn nke Đavit chăt hao; Gâp ndrăp jêh du mlâm ŭnh kađen ma nơm Gâp troch jêh dak ngi.

¹⁸ Gâp mra sâm nsoh nau bêk ma phung rlăng păng; Ƀiălah đon hađăch ta klơ bôk may mra chrêk rmah.”