Nau Mprơ Ơm 13 - Nau Brah Ndu Ngơi 2023

Mbơh sơm dăn Kôranh Brah kơl tâm nau rêh ni

Nau Mprơ Ơm Y-Đavit, ƀư nchih ma nơm gai mprơ

¹ Hơi Brah Yêhôva! Ndah jŏ dĭng ƀaƀơ nau May chuêl? May pôn măt ma gâp ndah jŏ?

² Gâp geh nau rêh ni ngăn tâm huêng, Ăp nar geh nau rngot ndah jŏ tâm nuih n'hâm? Nơm rlăng đah gâp dơi n'hao prêh lơn gâp kŏ tât ndah jŏ?

³ Ơ Brah Yêhôva Brah Ndu gâp, sek uănh hom jêh ri plơ̆ lah ma gâp. Ăn măt gâp dơi ang, klach lah gâp mra bê̆ch tâm nau khĭt!

⁴ Klach lah phung rlăng gâp mra lah: “Gâp dơi lơn jêh đah păng,” Jêh ri phung tâm rdâng đah gâp mra răm rhơn tơlah gâp chêh prah.

⁵ Ƀiălah gâp hŏ rnơm nsing jêh ntŭk nau ueh Kôranh Brah; Ăn nuih n'hâm gâp răm maak ma nau Kôranh Brah tâm rklaih.

⁶ Gâp mra mprơ ma Brah Yêhôva, Yorlah Păng ƀư jêh nau ueh ma gâp.