Nau Mprơ Ơm 129 - Nau Brah Ndu Ngơi 2023

Brah Ndu ƀư rai phung rlăng ƀon Siôn

Nau mprơ hăn hao tưng gưl

¹ “Ntơm bơh gâp hôm jêng mom, khân păng vay tŭn jot gâp” Aƀaơ, Israel lah hom:

² “Ntơm bơh gâp hôm jêng mom, khân păng vay tŭn jot gâp, Ƀiălah khân păng mâu mâp dơi đah gâp ôh.

³ Phung kan mir hŏ chuar rgăn jêh ta klơ ndŭr kơi gâp, Chuar blah jêh trong jong ta nây.”

⁴ Brah Yêhôva jêng sŏng srăng; Păng hŏ koh jêh rse phung ƀai kât.

⁵ Đơ phung tâm rmot ma ƀon Siôn Bêk prêng jêh ri rŭch lơi.

⁶ Ăn khân păng jêng nâm bu gơ̆ hon ta chor ngih Nhop kro jêh êlor ma bu rôk păng;

⁷ Nơm rek ba kuăn mâu tât bêng ôh ti păng, Nơm kât nchăp ba bun mâu tŏng du nchăp.

⁸ Phung rgăn ta nây mâu lah lĕ: “Dăn Brah Yêhôva ăn nau ueh uĭn ma khân may! He tâm amoh Brah Yêhôva mât ton ma khân may.”