Nau Mprơ Ơm 126 - Nau Brah Ndu Ngơi 2023

Lah ueh Brah Ndu hŏ njŭn phung ƀon lan Păng hŏ ăn sĭt tă bơh nau jêng bu nă

Nau mprơ hăn hao tưng gưl

¹ Tơlah Brah Yêhôva hŏ njŭn phung Siôn sĭt tă bơh nau jêng bu nă, Pôri hên jêng nâm bu du nau mbơi.

² Rnôk nây trôm mbung hên bêng ma nau gơm, Mpiăt hên ma nau mprơ troh rhơn. Bu lah ta nklang phung mpôl băl pô aơ: “Brah Yêhôva hŏ ƀư lĕ nau kan dŭt toyh jêh ma khân păng.”

³ Nanê̆, Brah Yêhôva hŏ ƀư lĕ nau kan dŭt toyh jêh ma phung he, Yor nây, phung hên maak.

⁴ Ơ Brah Yêhôva, njŭn hên plơ̆ sĭt bơh nau jêng bu nă, Nâm bu dak hoch tâm n'hong dak suăt ta n'gor Nêgep!

⁵ Mbu nơm srih ntil ma dak măt Mra rek tâm nau răm maak.

⁶ Mbu nơm n'ho ma hăn n'ho ma nhĭm, Djôt leo ntil grăp srih, N'hêl nanê̆ mra plơ̆ sĭt ma nau răm maak, Mbăk nchăp ba khân păng nơm.