Nau Mprơ Ơm 119 - Nau Brah Ndu Ngơi 2023

Tâm rnê nau vay Brah Yêhôva

¹ Ueh maak yơh phung mâu hôm geh bu dơi nduyh tâm trong khân păng, Phung hăn tĭng nau vay Brah Yêhôva.

² Ueh maak yơh phung djôt prăp nau Păng ntĭnh. Jêh ri tĭng joi Păng ma lĕ nuih n'hâm.

³ Khân păng mâu ƀư nau mhĭk ôh, Ƀiălah hăn tâm trong Păng.

⁴ May hŏ ntăm jêh nau vay ntăm bơh May ma hên Gay ma hên njrăng djôt prăp.

⁵ Ơ! Ŭch ma trong gâp dơi nâp ktang Gay ma gâp djôt prăp lĕ nau vay dăp May!

⁶ Tơlah gâp gơih mĭn ma lĕ nau vay May ntăm. Pôri gâp mâu mra bêk ôh.

⁷ Dôl gâp nti nau May phat dôih sŏng srăng Gâp mra tâm rnê ma May ma nuih n'hâm n'hêl nanê̆.

⁸ Gâp mra djôt prăp nau ntĭnh bơh May, Lơi ta chalơi gâp ôh.

⁹ Mâm bunuyh mom mra ƀư tâm trong păng nơm gay geh nau kloh? Ăn njrăng ƀư tĭng nau ngơi Kôranh Brah.

¹⁰ Kon tǐng joi May ma lĕ nuih n'hâm, Lơi ăn gâp der bơh nau vay May ntăm ôh.

¹¹ Gâp djôt prăp nau Brah Ndu ngơi tâm nuih n'hâm gâp, Gay ma gâp mâu hôm ƀư tih đah Kôranh Brah.

¹² Ơ Brah Yêhôva, tâm rnê ma May. Sâm nti an gâp lĕ nau vay Kôranh Brah ntăm!

¹³ Gâp dŏng bâr mbung gâp nkoch tay Lĕ nau vay ƀư bâr mbung May ntăm.

¹⁴ Gâp maak tâm trong May hŏ ntĭnh jêh, Rlau lơn nau maak dơn lĕ nau ndrŏng.

¹⁵ Gâp mra gŭ mĭn ma nau vay May ntăm, Mĭn rvê ma trong May.

¹⁶ Gâp maak tâm nau vay dăp May Mâu mra chuêl ôh nau May ngơi.

¹⁷ Dăn May ăn nau ueh rmeh ler ma oh mon May Gay ma gâp dơi gŭ rêh jêh ri djôt prăp nau May ngơi.

¹⁸ Dăn may pơk an măt gâp Gay ma gâp dơi saơ ntil khlay tâm nau vay May.

¹⁹ Gâp jêng bu năch ta neh ntu; Lơi dĭng pôn ma gâp tâm lĕ nau vay May ntăm.

²⁰ Huêng gâp ji hir ƀaƀơ kŏ tât rgănh huơi Ma lĕ nau vay ƀư bơh May.

²¹ May nduyh ma phung sưr jêng phung bu rtăp rak, Hăn der bơh lĕ nau vay ntăm bơh May.

²² Sŏk lơi nau bêk tă bơh gâp jêh ri nau tâm rmot. Yorlah gâp djôt prăp jêh nau ntĭnh bơh May.

²³ Nđâp phung kon hađăch gŭ nchră nau tâm rdâng đah gâp, Ƀiălah oh mon May ăt gŭ mĭn ma nau vay May.

²⁴ Lĕ nau ntĭnh bơh May jêng nau gâp rŏng, Khân păng jêng phung nchŏng an trong ma gâp.

²⁵ Huêng gâp krêp đah ndruyh neh, Ƀư ma gâp dâk rêh tay tĭng nau May ngơi.

²⁶ Gâp mbơh jêh trong gâp ma May, jêh ri May lŏ plơ̆ lah jêh ma gâp; Sâm nti an nau vay dăp May ma gâp.

²⁷ Ăn gâp gĭt rbăng trong nau vay ntăm bơh May, Pôri gâp mra gŭ mĭn ma lĕ nau kan khlay May.

²⁸ Huêng gâp nhĭm, bêng ler dak măt; Ƀư ăn ma gâp ktang tĭng nâm nau May ngơi.

²⁹ Ƀư ăn gâp der ngai trong nau mbruh, Jêh ri ƀư nau yô̆ gay sâm nti nau vay May ma gâp.

³⁰ Gâp săch jêh trong nau nanê̆ ngăn, Dơm nau vay ƀư bơh May tanăp gâp.

³¹ Ơ Brah Yêhôva! Gâp tâm rnglăp đah lĕ nau May ntĭnh: Lơi ăn gâp geh nau bêk prêng ôh.

³² Dôl May pơk huy nuih n'hâm gâp, Gâp mra nchuăt tâm trong nau vay May ntăm.

³³ Ơ Brah Yêhôva, sâm nti gâp trong nau vay ƀư bơh May Pôri gâp mra djôt prăp păng tât lôch.

³⁴ Dăn May ăn ma gâp nau gĭt rbăng gay gâp djôt prăp Jêh ri lĕ nuih n'hâm djôt prăp nau vay May.

³⁵ Ăn gâp hăn tĭng trong nau vay May ntăm Yorlah gâp rŏng trong nây.

³⁶ Ăn nuih n'hâm gâp rle mpeh nau ntĭnh bơh May Lơi dĭng rle mpeh drăp ndơ mâu di.

³⁷ Lơi ăn măt gâp rle mpeh lĕ nau dơm dam; Ƀiălah ăn gâp gŭ rêh tâm trong May.

³⁸ Ăn May ƀư tât di ngăn nau May ngơi đah phung oh mon May, Jêng nơm klach yơk ma May.

³⁹ Sŏk lơi tă bơh gâp nau bêk gâp klach, Yorlah nau vay ƀư bơh May jêng ueh.

⁴⁰ Gâp ŭch rŏng âk ngăn ma lĕ nau May ntăm! Dăn ƀư ăn gâp gŭ rêh tâm nau sŏng srăng May.

⁴¹ Ơ Brah Yêhôva, ăn nau ueh May tât ta gâp, Jêng nau May tâm rklaih, tĭng nâm nau ton May ngơi!

⁴² Pôri gâp mra plơ̆ lah ma nơm ƀư bêk gâp, Yorlah gâp rnơm ma nau May ngơi.

⁴³ Lơi ta sŏk nau ngăn bơh trôm mbung gâp, Yorlah gâp kâp gân jêh ma nau vay ƀư bơh May.

⁴⁴ Gâp mra tông prăp mro nau vay May Kŏ tât ƀaƀơ n'ho ro.

⁴⁵ Gâp mra hăn ma nau đăp mpăn, Yorlah gâp hŏ tĭng joi nau vay May ntăm.

⁴⁶ Gâp mra nkoch mbơh nau ntĭnh bơh May tanăp phung hađăch Ƀiălah gâp mâu bêk ôh.

⁴⁷ Gâp mra maak tâm lĕ nau vay May ntăm. Yorlah gâp rŏng ma khân păng.

⁴⁸ Gâp yơr ti rle mpeh ma nau vay May ntăm, jêng nau gâp rŏng Jêh ri mĭn ma nau vay dăp bơh May.

⁴⁹ Dăn May kah gĭt tay hom nau May hŏ ngơi ma oh mon May, Yor nau ngơi nây, May ƀư ăn gâp geh nau kâp gân.

⁵⁰ Nau May ngơi ƀư ăn gâp dơi dâk rêh tay, Nau aơ jêng tu bonh leng gâp tâm nau rêh ni.

⁵¹ Phung sưr mưch ma gâp hâu ngăn, Ƀiălah ăt gâp mâu teng ôh bơh nau vay May.

⁵² Ơ Brah Yêhôva, Gâp kah gĭt tay lĕ nau vay May ƀư bơh kăl e ri, Yor ri gâp geh nau bonh leng.

⁵³ Gâp ji nuih hâu ngăn, Dôl phung ƀai chalơi nau vay May.

⁵⁴ Nau vay dăp bơh May jêng nau gâp mprơ, Tâm nau rêh gâp jêng bu năch.

⁵⁵ Ơ Brah Yêhôva, dôl măng gâp kah gĭt tay ma amoh May Jêh ri gâp djôt prăp nau vay May.

⁵⁶ Gâp ndơn nau ueh lăng Yorlah gâp djôt prăp nau May ntăm.

⁵⁷ Brah Yêhôva jêng drăp ndơn ma gâp; Gâp ton mra djôt prăp nau May ngơi.

⁵⁸ Gâp vơh vơl nau ueh May ma lĕ nuih n'hâm; Yô̆ nđach an ma gâp tĭng nâm nau May ngơi.

⁵⁹ Dôl gâp gŭ mĭn tâm trong gâp, Pôri gâp chuat plơ̆ sĭt ma nau Kôranh Brah ntĭnh.

⁶⁰ Gâp ndal, mâu mbrĕ mbrơi ôh, Gay djôt prăp lĕ nau vay May ntăm.

⁶¹ Rse dăk phung ƀai ndơm jêh gay ƀư mhĭk ma gâp, Ƀiălah gâp mâu chuêl nau vay May ôh.

⁶² Ta klong măng, gâp mra dâk gay tâm rnê lah ueh ma May, Yor lĕ nau vay ƀư bơh May jêng sŏng srăng.

⁶³ Gâp jêng mĭt jiăng ma lĕ rngôch phung klach yơk mbah ma May, Jêh ri ma phung tĭng ndô̆ lĕ nau May ntăm.

⁶⁴ Ơ Brah Yêhôva, lam neh ntu bêng ma nau ueh May; Sâm nti lĕ nau vay dăp May ma gâp.

⁶⁵ Ơ Brah Yêhôva, May hŏ ƀư nau ueh ma oh mon May Tĭng nâm nau may ngơi.

⁶⁶ Sâm nti gâp nau gĭt rbăng jêh ri gĭt lor nau di Yorlah gâp chroh jêh ma nau vay May ntăm.

⁶⁷ Êlor gâp geh nau rêh ni, gâp vĭ nhhơt jêh Ƀiălah aƀaơ gâp djôt prăp nau May ngơi.

⁶⁸ May jêng ueh, jêh ri lơ hô ƀư nau ueh ƀaƀơ; Sâm nti gâp lĕ nau vay ƀư bơh May.

⁶⁹ Phung sưr sŏk nau ngơi mƀruh ƀư lư mhĭk ma gâp, Ƀiălah gâp mra djôt prăp nau May ntăm ma lĕ nuih n'hâm.

⁷⁰ Nuih n'hâm khân păng men, mbâl nâm bu ngi, Ƀiălah gâp rŏng ma nau vay May.

⁷¹ Nau rêh ni jêng nau ueh ma gâp, Tă bơh nĕ gâp dơi nti gĭt nau vay ƀư bơh May.

⁷² Nau vay tă bơh bâr mbung May ntĭnh ntăm Jêng khlay ngăn ma gâp rlau ma âk rbăn mah jêh ri prăk.

⁷³ Mbang ti May rhăk jêh gâp jêh ri mon jêh gâp; Ăn ma gâp nau gĭt rbăng, gay ma gâp dơi nti nau vay May ntăm.

⁷⁴ Phung klach yơk mbah ma May mra răm maak lah saơ gâp, Yorlah gâp kâp gân jêh tâm nau May ngơi.

⁷⁵ Ơ Brah Yêhôva, gâp gĭt nau May phat dôih jêng sŏng srăng Jêh ri ma nau răp jăp May ăn jêh gâp rêh ni.

⁷⁶ Dăn nau ueh May bonh leng gâp Tĭng nâm bu May hŏ ton jêh đah oh mon May.

⁷⁷ Ăn nau May yô̆ nđach văch ma gâp gay ma gâp dơi rêh, Yorlah gâp rŏng kơnh ma nau vay May.

⁷⁸ Ăn phung sưr geh nau bêk prêng Yorlah khân păng dŏng nau mƀruh nchơt gay nsak nkhăng gâp; Ƀiălah gâp mra gŭ mĭn ma nau May ntăm.

⁷⁹ Ăn phung klach yơk mbah ma May sĭt ta gâp. Khân păng mra gĭt rbăng nau May ntĭnh.

⁸⁰ Ăn nuih n'hâm gâp ƀư rĭng tâm lĕ nau vay May dăp; Gay ma gâp mâu bêk ôh.

⁸¹ Huêng gâp rdja ngăn yor ŭch ma nau May tâm rklaih; Gâp kâp gân ma nau May ngơi.

⁸² Măt gâp jêng huănh yor ŭch ma nau May ngơi; Gâp lah êng: “Ndah jŏ May mra bonh leng gâp?”

⁸³ Yorlah gâp jêng nâm bu nông ntâu krêp nhhuay ŭnh, Ƀiălah ăt gâp mâu chuêl ôh nau vay May dăp.

⁸⁴ Oh mon May anh dơn kŏ tât ndah jŏ? Dĭng May mra phat dôih phung ƀư mhĭk ma gâp?

⁸⁵ Phung sưr hŏ kuyh ntu jru gay ƀư mhĭk ma gâp, Jêng nau mâu ƀư tĭng nau vay May ôh.

⁸⁶ Lĕ rngôch nau vay May ntăm jêng răp jăp; Dăn May kơl gâp yorlah bu ngơi nchơt nklă lă lêng gay ma ƀư rêh ni Gâp.

⁸⁷ Knŏng hôm djê̆ lê̆ khân păng ƀư rai gâp ta neh ntu. Ƀiălah gâp mâu chalơi nau May ntăm ôh.

⁸⁸ Dăn ăn gâp dơi rêh tĭng nâm nuih n'hâm ueh May, Pôri gâp mra djôt prăp nau May ntĭnh tă bơh trôm mbung May.

⁸⁹ Ơ Brah Yêhôva, nau may ngơi gŭ nâp Ƀaƀơ klơ trôk.

⁹⁰ Nau răp jăp May hôm n'ho ro tă bơh rnôk aơ tât rnôk ri. May njêng jêh rplay neh jêh ri păng gŭ nâp ngăn ngên ƀaƀơ.

⁹¹ Tĭng nâm nau May ntăm, khân păng ăt gŭ nâp tât ta nar aơ, Yorlah lĕ rngôch ndơ jêng oh mon May da dê.

⁹² Tơlah nau vay May mâu jêng nau gâp rŏng Pôri gâp rai lôch jêh tâm nau rêh ni.

⁹³ Gâp mâu mra chuêl nau May ntăm ôh Yorlah ma păng yơh, May ƀư ma gâp dơi rêh.

⁹⁴ Gâp jêng ndơ May, rklaih hom gâp Yorlah gâp joi nau May ntăm.

⁹⁵ Phung ƀai gŭ kâp gay nkhĭt gâp, Ƀiălah gâp mra gŭ mĭn ma nau ntĭnh bơh May.

⁹⁶ Gâp hŏ saơ lĕ rngôch ndơ ueh ăt hôm geh nau dŭt da dê, Ƀiălah nau vay May ntăm jêng dŭt toyh mâu blau lôch ôh.

⁹⁷ Gâp rŏng kơnh ngăn ngên ma nau vay May! Lĕ nar gâp gŭ mĭn ma nau vay nây.

⁹⁸ Lĕ nau vay May ntăm ƀư ma gâp blau mĭn lơn ma phung rlăng gâp, Yorlah nau vay ntăm nây gŭ ƀaƀơ tâm gâp.

⁹⁹ Gâp geh nau gĭt rbăng lơn ma lĕ rngôch phung sâm nti gâp, Yorlah gâp gŭ mĭn lĕ nau May ntĭnh.

¹⁰⁰ Gâp gĭt rbăng âk lơn ma phung bu ranh, Yorlah gâp djôt prăp jêh nau May ntăm.

¹⁰¹ Gâp nkân jâng gâp bơh lĕ trong mhĭk, Gay ma gâp djôt prăp tĭng nau May ngơi.

¹⁰² Gâp mâu teng bơh lĕ nau vay May ntăm ôh, Yorlah May hŏ sâm nti jêh gâp.

¹⁰³ Nau May ngơi jêng njŭng mpiăt gâp hâu ngăn! Nanê̆ njŭng lơn ma dak sŭt tâm trôm mbung gâp!

¹⁰⁴ Yor nau May ntăm, gâp geh nau gĭt rbăng; Yor ri gâp tâm rmot lĕ trong nau mƀruh.

¹⁰⁵ Nau May Ngơi jêng ŭnh kađen njŭn leo jâng gâp, Nau ang ma trong gâp.

¹⁰⁶ Gâp hŏ sơm ton jêh ri ton nanê̆ pô aơ, Gâp mra djôt prăp lĕ nau vay May ƀư jêng sŏng srăng.

¹⁰⁷ Ơ Brah Yêhôva! Gâp geh nau rêh ni ngăn ngên; Dăn ƀư ma gâp dơi rêh tĭng nâm nau May ngơi.

¹⁰⁸ Ơ Brah Yêhôva, dăn May dơn ndơ ƀư brah gâp nơm ŭch nhhơr ma May ma nau mprơ tâm rnê bơh gâp, Jêh ri sâm nti gâp nau vay ƀư bơh May.

¹⁰⁹ Nau rêh gâp tâm tra đah nau djơh mhĭk ƀaƀơ, Ƀiălah gâp mâu chuêl ôh nau vay May.

¹¹⁰ Phung ƀai sân dăk gay ƀư mhĭk gâp, Ƀiălah gâp mâu chalơi nau May ntăm ôh.

¹¹¹ Nau May ntĭnh jêng drăp ndơn ma gâp ƀaƀơ, Yorlah khân păng jêng nau maak ma nuih n'hâm gâp.

¹¹² Gâp gơih ƀư tĭng nau vay May dăp, Mro mrăng jêh ri kŏ tât lôch dŭt.

¹¹³ Gâp tâm rmot ma phung geh nuih n'hâm tâm pă bar, Ƀiălah gâp rŏng kơnh ma nau vay May.

¹¹⁴ May jêng ntŭk gâp krap jêh ri khêl gâp; Gâp kâp gân tâm nau May ngơi.

¹¹⁵ Ơ phung ƀư mhĭk, du hom bơh gâp! Gay ma gâp djôt prăp nau vay Brah Ndu ntăm.

¹¹⁶ Dăn May chông gâp tĭng nâm nau May ton, gay ma gâp dơi gŭ rêh; Lơi dĭng ăn gâp bêk ôh dôl gâp n'gân nau kâp gân tâm May.

¹¹⁷ Dăn May chông gâp jêh ri ăn nau đăp mpăn ma gâp; Gay ma gâp gơih mĭn ƀaƀơ ma nau vay May dăp.

¹¹⁸ May dun lĕ rngôch phung hăn vĭ bơh nau vay May dăp, Yorlah nau ndơm mƀruh khân păng jêng dơm dam.

¹¹⁹ May mƀăr lơi lĕ rngôch phung ƀai bơh neh ntu nâm bu ndŏk; Yor ri, gâp rŏng ma lĕ nau May ntĭnh.

¹²⁰ Nglay săk gâp râm sâr yor klach ma May, Gâp klach râm sâr đŏng gŭ tanăp nau May phat dôih.

¹²¹ Gâp ƀư jêh nau di jêh ri nau sŏng srăng; Lơi ta jao gâp ma phung tŭn jot gâp.

¹²² Dăn May mât mray nau maak ma oh mon May; Lơi ăn phung sưr tŭn jot gâp ôh.

¹²³ Măt gâp huăr rgănh gŭ kâp gân nau tâm rklaih, Jêh ri ma nau May ngơi sŏng srăng.

¹²⁴ Dăn ƀư đah oh mon May tĭng nâm nau nuih n'hâm ueh May, Jêh ri sâm nti gâp nau vay May dăp.

¹²⁵ Gâp jêng oh mon May, dăn ăn ma gâp nau gĭt rbăng Gay ma gâp dơi gĭt rbăng nau May ntĭnh.

¹²⁶ Tât jêh mông Brah Yêhôva pah kan, Yorlah kon bunuyh hŏ rlau jêh nau vay May.

¹²⁷ Gâp rŏng ma nau vay May ntăm rlau lơn ma mah, Rlau lơn ma mah kloh.

¹²⁸ N'hêl nanê̆ ngăn, gâp gĭt năl lĕ nau May ntăm ma lĕ ntil mpô mpa jêng di ngăn; Jêh ri gâp tâm rmot ma lĕ rngôch trong nau mƀruh.

¹²⁹ Nau May ntĭnh jêng khlay ngăn Yor ri huêng gâp djôt prăp păng.

¹³⁰ Nau rblang bơh Nau Ngơi May djôt leo nau ang, Păng ăn nau gĭt rbăng ma phung tông bâr.

¹³¹ Gâp hă mbung jêh ri ji hir, Yorlah gâp ŭch ngăn ma nau vay May ntăm.

¹³² Dăn May n'gĭl uănh jêh ri yô̆ nđach ma gâp, Tĭng nâm nau May vay ƀư đah phung rŏng ma amoh May.

¹³³ Dăn mât mray jâng gâp nâp nhuat tâm nau May ngơi; Lơi dĭng ăn du ntil nau mhĭk chiă uănh gâp.

¹³⁴ Dăn rklaih gâp bơh mpôl bunuyh tŭn jot, Gay gâp tông prăp lĕ nau May ntăm.

¹³⁵ Dăn muh măt May sol ang ta oh mon May, Jêh ri sâm nti gâp lĕ nau vay dăp May.

¹³⁶ Dak măt gâp hoch nâm bu dak n'hor, Yorlah bu mâu tông prăp ôh ma nau vay May.

¹³⁷ Ơ Brah Yêhôva, May jêng sŏng srăng, Nau phat dôih May jêng nau sŏng.

¹³⁸ May ăn ma nau May ntĭnh Tâm nau sŏng srăng jêh ri nau răp jăp.

¹³⁹ Nuih n'hâm duh nđơr ƀư hŭch gâp, Yorlah phung tŭn jot gâp hŏ chuêl jêh nau May ngơi.

¹⁴⁰ Nau May ngơi jêng kloh rsang ngăn, Yor ri oh mon May rŏng kơnh ma nau nây.

¹⁴¹ Gâp jêng jê̆, bu mưch rmot Ƀiălah gâp mâu chuêl ôh nau May ntăm.

¹⁴² Nau sŏng srăng May jêng nau sŏng srăng n'ho ro. Nau vay May jêng nau nanê̆ ngăn.

¹⁴³ Nđâp lah nau uh ah jêh ri nau rngot tât ta gâp, Gâp ăt rŏng ma lĕ nau vay May ntăm.

¹⁴⁴ Nau May ntĭnh jêng sŏng srăng n'ho ro. Ăn ma gâp nau gĭt rbăng gay ma gâp dơi rêh.

¹⁴⁵ Ơ Brah Yêhôva, gâp kuăl mbơh sơm ma May ma lĕ nuih n'hâm, dăn plơ̆ lah an ma gâp; Gâp mra djôt prăp nau vay May dăp.

¹⁴⁶ Gâp kuăl mbơh sơm ma May, rklaih hom gâp Jêh ri gâp mra mât mray lĕ nau May ntĭnh.

¹⁴⁷ Gâp dâk lor ma ƀhit rvi ang jêh ri kuăl mbơh sơm; Gâp kâp gân jêh tâm nau May ngơi.

¹⁴⁸ Dôl mông gak măng măt gâp rngeh Gay gŭ mĭn nau May ngơi.

¹⁴⁹ Ơ Brah Yêhôva, dăn iăt bâr gâp tĭng nâm nuih n'hâm ueh May; Ăn gâp dơi rêh tĭng nâm nau May sek uănh.

¹⁵⁰ Phung geh nau mĭn ƀai văch dăch gay ƀư mhĭk gâp; Khân păng gŭ ngai đah nau vay May.

¹⁵¹ Ơ Brah Yêhôva, May gŭ dăch gâp ƀaƀơ, Jêh ri lĕ rngôch nau vay May ntăm jêng nau nanê̆ ngăn.

¹⁵² Bơh kăl e ri, bơh nau May ntĭnh, gâp gĭt rah vah May yơh rdâk khân păng kŏ tât n'ho ro.

¹⁵³ Dăn May mêt uănh ma nau rêh ni gâp jêh ri rklaih gâp, Yorlah gâp mâu chuêl ôh nau vay May.

¹⁵⁴ Dăn May koh dŏng rplay gâp ngơi jêh ri sâm chuai gâp; Ƀư an gâp dơi rêh tĭng nâm nau May ton.

¹⁵⁵ Nau tâm rklaih gŭ ngai đah phung ƀai, Yorlah khân păng mâu joi lĕ nau vay May dăp ôh.

¹⁵⁶ Ơ Brah Yêhôva, nau May yô̆ nđach jêng toyh ngăn, Ƀư ăn gâp dơi rêh tĭng nâm nau May ntăm.

¹⁵⁷ Phung ƀư mhĭk ma gâp jêh ri phung rlăng đah gâp jêng âk, Ƀiălah ăt gâp mâu teng lĕ nau vay May ntĭnh.

¹⁵⁸ Gâp saơ phung mâu gŭ răp jăp jêh ri gâp mưch rmot khân păng Yorlah khân păng mâu djôt prăp nau May ntăm ôh.

¹⁵⁹ May saơ nuih n'hâm gâp rŏng ma nau May ntăm! Ơ Brah Yêhôva, dăn ma gâp dơi rêh tĭng nâm nuih n'hâm ueh May.

¹⁶⁰ Lĕ rngôch nau May ngơi jêng nau nanê̆ ngăn; Lĕ nau vay ƀư sŏng srăng May hôm tât n'ho ro.

¹⁶¹ Phung kôranh ƀư mhĭk ma gâp mâu geh nau, Ƀiălah nuih n'hâm gâp klach yơk ma nau May ngơi.

¹⁶² Gâp maak ma nau May ngơi Tâm ban ma nơm dơi sŏk âk ndơ pit in.

¹⁶³ Gâp tâm rmot jêh ri tâm rmot ngăn ma nau mƀruh, Ƀiălah gâp rŏng ma nau vay May.

¹⁶⁴ Gâp tâm rnê ma May pơh tơ̆ tâm ăp nar Ma lĕ nau vay ƀư sŏng srăng May.

¹⁶⁵ Phung rŏng ma nau vay May geh nau đăp mpăn ngăn; Mâu geh ndơ ƀư chêh prah khân păng ôh.

¹⁶⁶ Ơ Brah Yêhôva, gâp kâp gân tâm nau May tâm rklaih, Jêh ri gâp ƀư tĭng nau May ntăm.

¹⁶⁷ Huêng tông prăp lĕ nau May ntĭnh; Gâp rŏng lĕ nau ntĭnh nây hâu ngăn ngên.

¹⁶⁸ Gâp tông prăp nau ntăm jêh ri nau May ntĭnh, Yorlah lĕ trong gâp mpơl tanăp măt May.

¹⁶⁹ Ơ Brah Yêhôva, ăn nau gâp kuăl mbơh sơm tât ta May. Ăn ma gâp nau gĭt rbăng tĭng nâm nau May ton!

¹⁷⁰ Ăn nau gâp vơh vơl tât tanăp măt May; Rklaih an gâp tĭng nâm nau May ngơi.

¹⁷¹ Ăn mbung gâp bêng ler nau tâm rnê, Yorlah May sâm nti gâp lĕ nau vay May dăp.

¹⁷² Ăn mpiăt gâp mprơ ma nau May ngơi, Yorlah lĕ nau vay May ntăm jêng sŏng srăng.

¹⁷³ Ăn ti May rgong gâp, Yorlah gâp hŏ săch tĭng lĕ nau May ntăm.

¹⁷⁴ Ơ Brah Yêhôva; gâp ŭch rŏng ma nau May tâm rklaih, Jêh ri gâp rŏng ma nau vay May.

¹⁷⁵ Ăn huêng gâp gŭ rêh gay tâm rnê ma May; Ăn lĕ nau vay May ƀư kơl an gâp.

¹⁷⁶ Gâp vĭ trong nâm bu biăp hăn nhhơt trong; dăn May joi hom oh mon May, Yorlah gâp mâu chuêl ôh nau vay May ntăm.