Nau Mprơ Ơm 115 - Nau Brah Ndu Ngơi 2023

Tâm rđĭl rup ndah đah Brah Yêhôva

¹ Ơ Brah Yêhôva, yor nuih n'hâm ueh jêh ri nau răp jăp May, Nau chrêk rmah mâu jêng ndơ ma hên, mâu jêng ndơ ma hên. Ƀiălah khư jêng ndơ ma amoh May yơh!

² Mâm ƀư lĕ bri dak nănh ngơi pô aơ: “Ta ntŭk Brah Ndu khân păng?”

³ Brah Ndu he gŭ tâm klơ lĕ ndâr trôk; Păng ƀư lĕ rngôch nau Păng geh nau maak.

⁴ Bi rup brah khân păng ƀư ma prăk jêh ri mah, Jêng kan bơh ti bunuyh ƀư.

⁵ Khân păng geh trôm mbung, ƀiălah mâu ngơi ôh; Geh măt, ƀiălah mâu saơ ôh;

⁶ Geh tôr ƀiălah mâu tăng ôh; Geh muh ƀiălah mâu blau ƀâu ôh;

⁷ Geh ti ƀiălah mâu blau rbot ôh; Geh jâng ƀiălah mâu blau hăn ôh; Geh rmlông ƀiălah ngơi mâu nteh.

⁸ Mbu nơm ƀư rup brah jêh ri rnơm ma păng Jêng tâm ban khân păng.

⁹ Ơ Israel, rnơm nsing hom ma Brah Yêhôva; Păng jêng nơm kơl jêh ri khêl khân păng.

¹⁰ Ơ ngih Arôn, rnơm nsing hom ma Brah Yêhôva: Păng jêng nơm kơl jêh ri khêl khân păng.

¹¹ Ơ phung klach yơk ma Brah Yêhôva, rnơm nsing hom ma Brah Yêhôva: Păng jêng nơm kơl jêh ri khêl khân păng.

¹² Brah Yêhôva kah gĭt rvê ma he: Păng mra ăn nau ueh uĭn, ăn nau ueh uĭn ma ngih Israel, Ăn nau ueh uĭn ma ngih Arôn tâm ban lĕ.

¹³ Păng mra ăn nau ueh uĭn ma phung klach yơk ma Brah Yêhôva Phung jê̆ mâu lah phung toyh đŏng kơt nây.

¹⁴ Dăn Brah Yêhôva ăn bĭk nau ueh ma khân may, Ma khân may jêh ri ma phung kon sau khân may.

¹⁵ Dăn Brah Yêhôva jêng Nơm rhăk jêh trôk jêh ri neh ntu. Ăn nau ueh uĭn ma khân may.

¹⁶ Lĕ ndâr trôk jêng ndơ Brah Yêhôva, Ƀiălah Păng ăn neh ntu ma phung kon bunuyh.

¹⁷ Phung khĭt mâu lah nơm jŭr tâm ntŭk rklăk Mâu tâm rnê ma Brah Yêhôva ôh.

¹⁸ Ƀiălah hên mra tâm rnê ma Brah Yêhôva. Ntơm bơh aƀaơ tât n'ho ro. Halêluya!