Nau Mprơ Ơm 109 - Nau Brah Ndu Ngơi 2023

Dăn Brah Ndu plơng đah phung rlăng

Nau Mprơ Ơm Y-Đavit, ƀư nchih ăn ma nơm kôranh gai

¹ Ơ Brah Ndu, Nơm gâp tâm rnê, Lơi gŭ rklăk ôh!

² Yorlah trôm mbung phung ƀai jêh ri phung ndơm hă tâm rdâng ma gâp, Khân păng ngơi jêh nau mƀruh tâm rdâng đah gâp.

³ Nchueng jŭm gâp ma nau ngơi tâm rmot, Jêh ri tâm lơh đah gâp mâu geh nau.

⁴ Khân păng phong gâp nđâp lah gâp rŏng ma khân păng, Yor ri, gâp knŏng gĭt mbơh sơm.

⁵ Khân păng sŏk nau mhĭk ntrok nau ueh, Nau rmot mplơ̆ nau rŏng.

⁶ Dăn njuăl bunuyh ƀai tâm rdâng đah păng. Jêh ri dơm du huê bunuyh phong gŭ mpeh pa ma păng.

⁷ Tơlah bu phat dôih păng, ăn bu kơp păng tih jêh. Jêh ri nau păng mbơh sơm kơp jêng nau tih.

⁸ Ăn lĕ nar păng rêh gleh hŏ, Ăn du huê nơm êng sŏk dơn nau pah kan păng.

⁹ Ăn phung kon păng plơ̆ jêng nơm kon đơi, Jêh ri ur păng jêng bu ur ndrô.

¹⁰ Ăn phung kon păng jêng phung nsong mblêng nsong dan, Ăn hăn dăn sa ngai bơh ngih sat khân păng.

¹¹ Ăn kôranh rnon sŏk pit lĕ rngôch ndơ păng geh. Phung bu năch sŏk rdu lơi play kao tă bơh kan păng.

¹² Lơi ăn du huê ƀư ueh ma păng, Mâu geh du huê yô̆ nđach ma kon đơi păng.

¹³ Ăn bu nkhĭt lơi phung kon sau păng, Jut lơi amoh khân păng tâm rnôk kăndơ̆.

¹⁴ Ăn bu nkah tay lĕ nau mhĭk phung chô yau păng tanăp măt Brah Yêhôva; Nau tih me păng bu mâu jut lơi ôh.

¹⁵ Ăn lĕ nau tih nĕ gŭ tanăp măt Brah Yêhôva ƀaƀơ Gay ma Păng jut lĕ nau ndray khân păng bơh neh ntu.

¹⁶ Yorlah păng mâu kah gĭt ƀư nau yô̆ ôh, Ƀiălah păng lŏ ƀư mhĭk ma phung rêh ni jêh ri o ach, Jêh ri ma nơm geh nuih n'hâm rêh ni gay ma nkhĭt lơi khân păng.

¹⁷ Păng rŏng ma nau rtăp rak; jêh ri nau rtăp rak nây tŭp ta bôk păng; Păng mâu ŭch nau ueh uĭn ôh; nau ueh uĭn du ngai đah păng.

¹⁸ Păng nsoh nau rtăp rak, nâm bu bok ao păng nơm; Nau rtăp rak nây lăp jru jêh tâm păng nâm bu dak, Nâm bu dak ngi lăp jru tâm nting păng.

¹⁹ Ăn nau rtăp rak jêng nâm bu bok ao jŭm păng, Nâm bu du njăr rse bŭt, rêt jŭm ndŭr kơi păng.

²⁰ Brah Yêhôva mra plơng bôk phung rlăng gâp tâm ban pônây, Jêh ri ma phung ngơi nau ƀai gay ƀư mhĭk ma nau rêh gâp.

²¹ Ƀiălah ơ Kôranh Brah jêng Brah Yêhôva, Yor ma amoh May, ăn May ƀư nau yô̆ ma gâp; Yorlah nuih n'hâm ueh Kôranh Brah jêng nau ueh, dăn tâm rklaih hom gâp.

²² Yorlah Gâp jêng rêh ni jêh ri o ach; Nuih n'hâm gâp ji ngăn jêh tâm gâp.

²³ Nau rêh gâp du hăn nâm bu gui kêng mhaơ. Bu ntrŭt gâp nâm bu krah.

²⁴ Kômâk gâp râm nsâr yor ver ât sông sa, Săk jăn gâp rgay grol, mâu geh dăng.

²⁵ Gâp jêng ndơ ma khân păng mưch; Ăp tơ̆ khân păng saơ gâp, khân păng rteh bôk.

²⁶ Hơi Yêhôva Brah Ndu gâp! Dăn kơl hom gâp, Jêh ri rklaih hom gâp, gâp tĭng nuih n'hâm ueh May;

²⁷ Gay ma khân păng gĭt aơ jêng ti Brah Yêhôva; May yơh hŏ ƀư nau nây.

²⁸ Khân păng rak rtăp gâp, ƀiălah May ăn nau ueh uĭn ma gâp. Tơlah khân păng dâk, bu mra ƀư bêk khân păng, Bi ma phung oh mon May mra răm maak.

²⁹ Ăn phung rlăng đah gâp nsoh nau bêk. Nau bêk prêng nkŭm khân păng nâm bu ao.

³⁰ Aƀaơ, bâr mbung gâp mra tâm rnê hâu ngăn ngên ma Brah Yêhôva Jêh ri tâm rnê ma May ta nklang phung âk.

³¹ Yorlah May gŭ râng mpeh pa ma nơm pưt kƀah, Gay tâm rklaih nau rêh khân păng, bơh phung tâm rmal.