Nau Mprơ Ơm 108 - Nau Brah Ndu Ngơi 2023

Vơh vơl Kôranh Brah kơl an gay ma Păng ăn nau dơi đah phung rlăng

Nau mprơ. Nau Mprơ Ơm Y-Đavit

¹ Ơ Brah Ndu, nuih n'hâm gâp nâp! Gâp mra mprơ, huêng gâp mra tâm rnê ma May.

² Ơ dĭng rlet jêh ri gong rêng, kah rngăl hom! Gâp mra kah rngăl nchrat luh nar.

³ Ơ Brah Yêhôva, Gâp mra tâm rnê lah ueh ma May ta nklang phung ƀon lan, Tâm rnê ma May tâm lĕ bri dak.

⁴ Yorlah nuih n'hâm ueh Kôranh Brah dŭt toyh lơn ma lĕ ndâr trôk, Nau răp jăp ngăn May prêh tât ta ndâr tŭk.

⁵ Ơ Brah Ndu, ăn May geh nau yơk rlau lơn lĕ ndâr trôk; Ăn nau chrêk rmah May ral lam tâm neh ntu!

⁶ Dăn ti ma May sâm rklaih jêh ri plơ̆ sĭt lah ma gâp, Gay ma phung May rŏng dơi klaih.

⁷ Brah Ndu hŏ lah jêh tâm ngih brah kloh ueh Păng pô aơ: “Gâp mra răm maak tâm pă Sichem. Jêh ri veh rlŭng Sukôt.

⁸ Gilêat jêng ndơ Gâp, Manasê tâm ban lĕ; Êphraim jêng pôih nâp ma bôk Gâp; Yuđa jêng mâng jra hađăch Gâp.

⁹ Môap jêng thŭng rao Gâp; Gâp klŭp ntâu jot Gâp ta Êđôm; Gâp mra nter răm maak ma bri Philistin.”

¹⁰ Mbu nơm mra njŭn gâp lăp tâm ƀon ktang? Mbu nơm mra njŭn gâp tât ta bri Êđôm?

¹¹ Ơ Brah Ndu, mâu di hĕ May yơh jêng Nơm chalơi jêh hên? Ơ Brah Ndu, May mâu hôm hăn tâm lơh ndrel ma phung tahan hên đŏng.

¹² Dăn Brah Ndu kơl hên tâm rdâng đah phung rlăng, Yorlah nau kon bunuyh kơl an jêng dơm dam.

¹³ Rnơm Brah Ndu, hên mra tâm lơh ma nau janh ktang, Yorlah Kôranh Brah yơh mra jot plên phung rlăng đah hên.