Nau Mprơ Ơm 107 - Nau Brah Ndu Ngơi 2023

NDROM SAMɃŬT RƠH PRĂM ( Nau Mprơ Ơm 107 – 150 ) Tâm rnê lah ueh ma Brah Yêhôva tâm rklaih jêh bơh nau rêh ni

¹ Tâm rnê lah ueh hom ma Brah Yêhôva yorlah Păng jêng ueh; Nau ueh Păng hôm ƀaƀơ n'ho ro.

² Phung Brah Yêhôva tâm chuai jêh bơh ti phung rlăng Lah hom pônây;

³ Nây jêng phung Păng tâm rgum jêh bơh lĕ n'gor; Bơh mpeh luh nar jêh ri mpeh nhâp nar, Mpeh pa lơ jêh ri mpeh pa dâng.

⁴ Khân păng nsong mblêng ntŭk bri rdah tâm bri hŏng, Joi mâu dơi saơ ôh du rplay ƀon gay ma gŭ.

⁵ Khân păng ji ngot ji hir, Huêng khân păng jêng rdja ra ai.

⁶ Rnôk nây, tâm nau rêh ni, khân păng vah vơl ma Brah Yêhôva, Jêh ri tâm rklaih khân păng bơh nau rêh ni,

⁷ Njŭn leo khân păng ta trong sŏng, Kŏ tât nôk khân păng dơi joi du rplay ƀon gay ma gŭ.

⁸ Ăn bu tâm rnê lah ueh ma Brah Yêhôva yor nuih n'hâm ueh Păng, Jêh ri yor lĕ nau mbên khlay Păng ƀư jêh ma phung kon bunuyh!

⁹ Yorlah Păng ƀư ăn mpay huêng ji hir, Jêh ri nuih n'hâm ji ngot ji hir dơi mpay hơm ma lĕ nau ueh.

¹⁰ Geh phung gŭ tâm nau ngo klĕng jêh ri tâm gui nau khĭt, Phung bu krŭng geh nau rêh ni tâm rse rvăk loih.

¹¹ Yorlah tâm rdâng jêh đah nau Brah Ndu ngơi, Jêh ri tâm rmot ma nau nti lah Nơm Dŭt Prêh.

¹² Yor nây, Păng sŏk nau rêh ni gay ntrŭnh lơi nuih n'hâm khân păng; Khân păng cha lôt mâu geh nơm kơl rdâng ôh.

¹³ Rnôk nây, tâm nau rêh ni khân păng vah vơl ma Brah Yêhôva, Jêh ri Păng tâm rklaih khân păng bơh nau rêh ni.

¹⁴ Păng njŭn leo khân păng bơh ntŭk nau ngo klĕng jêh ri gui nau khĭt, Ƀư tăch rse rvăk kât ma khân păng.

¹⁵ Ăn bu tâm rnê lah ueh ma Brah Yêhôva yor nuih n'hâm ueh Păng, Jêh ri yor nau mbên khlay Păng ƀư jêh ma phung kon bunuyh!

¹⁶ Yorlah Păng ƀư chah jêh mpông pêr kông Jêh ri nkê̆ch lơi lĕ mâng loih.

¹⁷ Phung rluk geh nau rêh ni yorlah nau gŭ ngao tih, Jêh ri rêh ni yor nau djơh mhĭk khân păng nơm.

¹⁸ Khân păng tâm rmot ngăn ma lĕ ndơ sông sa, Jêh ri hăn dăch ta mpông pêr nau khĭt.

¹⁹ Rnôk nây, tâm nau rêh ni khân păng vah vơl ma Brah Yêhôva, Jêh ri Păng tâm rklaih khân păng bơh nau rêh ni.

²⁰ Păng ăn nau Păng ngơi jêh ri ƀư bah khân păng, Tâm rklaih khân păng bơh môch.

²¹ Ăn bu tâm rnê lah ueh ma Brah Yêhôva yor nuih n'hâm ueh Păng, Jêh ri yor nau mbên khlay Păng ƀư jêh ma phung kon bunuyh!

²² Ăn khân păng nhhơr ndơ ƀư brah nau tâm rnê lah ueh, Jêh ri nkoch bri lĕ kan Păng ma nau mprơ răm maak.

²³ Geh bunuyh ncho kumpăn hăn klơ dak rlai, Jêh ri pah kan ta klơ dak mƀŭt toyh;

²⁴ Khân păng saơ kan Brah Yêhôva, Uănh nau mbên Păng tâm dak jru.

²⁵ Păng ăn phŭt sail khôm, Jêh ri mpiăt dak toyh rpuh đô̆;

²⁶ Hao leo ta trôk, jêh nây ngâm jŭr tâm ntu jru. Tâm nau rêh ni, nau nănh nuih n'hâm roh rai.

²⁷ Khân păng hăn vât vâr ndĭt ndĭu nâm bu du huê bunuyh nhŭl ndrănh; Nau blau mĭn roh rai da dê.

²⁸ Rnôk nây, tâm nau rêh ni, khân păng vah vơl ma Brah Yêhôva, Jêh ri Brah Yêhôva tâm rklaih khân păng nau rêh ni.

²⁹ Păng ƀư nsrŭng phŭt sial ktang, Ƀư ăn mpiăt dak toyh gŭ rklăk.

³⁰ Khân păng maak yorlah rbuh dak rlai đăp mpăn; Brah Ndu leo khân păng ta kơh khân păng ŭch.

³¹ Ăn bu tâm rnê ma Brah Yêhôva yor nuih n'hâm ueh Păng, Jêh ri yor lĕ nau mbên khlay Păng ƀư jêh ma phung kon bunuyh!

³² Mât ton hom ma Brah Ndu ta nklang phung ƀon lan Păng, Jêh ri mprơ tâm rnê Păng tâm phung kôranh bu ranh.

³³ Păng tâm rgâl dak krong jêng bri rdah, Dak n'hor jêng neh sơh.

³⁴ Jêh ri neh hon ndơ jêng neh chiăt, Yor nau djơh mhĭk phung gŭ ta nây.

³⁵ Păng tâm rgâl bri rdah jêng dak nglao, Neh sơh jêng tu dak.

³⁶ Păng ƀư ăn phung ji ngot geh ntŭk ma gŭ, Jêh ri khân păng rdâk du rplay ƀon gay ma gŭ.

³⁷ Khân păng srih găr tâm mir jêh ri tăm krăk ƀâu, Jêh ri dơi geh play rmeh ler.

³⁸ Brah Ndu ăn nau ueh uĭn ma khân păng, jêh ri khân păng bĭk âk. Păng mâu ăn phung mpô mpa rong khân păng geh nau n'hŭch.

³⁹ Tơlah rnoh khân păng n'hŭch jŭr jêh ri bu ƀư mhĭk Yor nau tŭn jot, nau rêh ni jêh ri nau rngot.

⁴⁰ Brah Yêhôva nkhŭt nau ƀơ̆ ƀơch ta phung kon hađăch, Ăn khân păng nsong mblêng tâm n'gor ntŭk rngol mâu geh trong klaih.

⁴¹ Ƀiălah păng rklaih phung pưt kƀah bơh nau rêh ni, Jêh ri ăn rnăk vâl khân păng jêng âk nâm bu phung biăp.

⁴² Phung sŏng mra saơ nau nây jêh ri răm maak; Bi phung djơh mhĭk mra mêm mbung da dê.

⁴³ Ăn bunuyh blau mĭn rkêng tôr iăt lĕ nau aơ, Jêh ri mĭn rvê ma nuih n'hâm ueh Brah Yêhôva.