Nau Mprơ Ơm 106 - Nau Brah Ndu Ngơi 2023

Nau phung Israel mâu răp jăp jêh ri nau răp jăp Brah Ndu

¹ Halêluya! Mprơ tâm rnê hom ma Brah Yêhôva, yorlah Păng jêng ueh, Nau ueh Păng hôm ƀaƀơ n'ho ro.

² Mbu dơi nkoch bri lĕ kan toyh Brah Yêhôva ƀư jêh, Mâu lah lĕ nau mprơ tâm rnê ma Păng?

³ Ueh maak yơh mbu nơm djôt prăp nau di Jêh ri ƀư ƀaƀơ nau sŏng srăng!

⁴ Ơ Brah Yêhôva, ăn kah gĭt ma gâp tơlah May ƀư nau ueh ma phung ƀon lan May! Chop khâl gâp tơlah May tâm rklaih khân păng.

⁵ Gay ma gâp dơi saơ nau ndrŏng phung May săch jêh, Dơi gŭ ndrel đah nau maak phung ƀon lan May, Jêh ri dơi tâm rnê ma gâp nơm ma drăp ndơn May.

⁶ Hên jêh ri phung chô yau hên hŏ ƀư tih jêh; Hên ƀư nau kue jêh ri hên ƀư ma nau djơh jêh.

⁷ Dôl phung chô yau hên gŭ tâm bri Êjipt, Khân păng mâu gĭt rbăng lĕ nau mbên khlay May, Mâu lĕ kah gĭt nuih n'hâm ueh May rmeh ler, Ƀiălah ƀư nau tâm rdâng ta kơh dak mƀŭt, nây jêng Dak Mƀŭt Chăng.

⁸ Nđâp tơlah pônây, Păng ăt tâm rklaih khân păng yor amoh Păng, Gay ma tâm mpơl nau brah Păng.

⁹ Păng buay ma Dak Mƀŭt Chăng, păng suăt sơh kro; Păng njŭn khân păng rgăn dak mƀŭt jru nâm bu rgăn bri rdah.

¹⁰ Păng tâm rklaih khân păng bơh ti phung tâm rmot ma khân păng, Jêh ri tâm chuai khân păng bơh ti phung rlăng.

¹¹ Dak ƀư ngâm phung rlăng; Mâu ăn du huê hôm gŭ rêh klen.

¹² Rnôk nây mơ khân păng chroh nau Păng Jêh ri mprơ tâm rnê ma Păng.

¹³ Ƀiălah khân păng chuêl kan Păng gơnh ngăn; Mâu gŭ kâp ôh nau Păng nkah nti.

¹⁴ Nuih n'hâm khân păng kơnh ngăn tâm ndrêch rdah, Jêh ri khân păng rlong uănh Brah Ndu tâm ntŭk bri hŏng.

¹⁵ Brah Ndu ăn moh ndơ khân păng dăn, Ƀiălah ăn nau ji kuet ƀư rai ma nau rêh khân păng.

¹⁶ Tâm pôih tahan, khân păng tâm keh nach đah Y-Môis jêh ri Y-Arôn, Jêng nơm kloh ueh Brah Yêhôva.

¹⁷ Neh đang rvăn Dathan, Jêh ri tâp brôi ta klơ phung Abiram,

¹⁸ Ŭnh sa ta nklang phung tâm rƀŭn; Mpiăt ŭnh sa phung mhĭk.

¹⁹ Phung chô yau hên trah jêh du mlâm rup kon ndrôk tâm Hôrep, Jêh ri yơk mbah rup nây.

²⁰ Khân păng tâm rgâl Nơm chrêk rmah khân păng Gay sŏk rup ndrôk blau sa gơ̆.

²¹ Khân păng chuêl Brah Ndu jêng nơm tâm rklaih jêh khân păng, Jêh ri ƀư kan dŭt toyh ma khân păng tâm bri Êjipt;

²² Păng ƀư lĕ kan khlay tâm n'gor bri Cham, Jêh ri lĕ nau krit ta kơh Dak Mƀŭt Chăng.

²³ Yor nây, Brah Ndu lah pô aơ Păng mra ƀư rai khân păng. Ƀiălah Y-Môis jêng nơm Păng săch jêh, Dâk ntŭk pêch đang tanăp Păng, Gay dăn lơi ăn Păng ji nuih ƀư rai khân păng.

²⁴ Thoi ma nây, phung chô yau hên tâm rmot ma n'gor neh ueh uĭn, Mâu chroh ôh ma nau Păng ngơi.

²⁵ Khân păng ngơi ƀŭk dŭk suyh tâm pôih tahan, Mâu tông bâr Brah Ndu Yêhôva.

²⁶ Yor nây, Păng yơr ti ton pô aơ: “Gâp mra ƀư ma khân păng cha lôt prah tâm bri rdah,

²⁷ Ƀư ma phung noi deh khân păng cha lôt khĭt nklang lĕ bri dak, Jêh ri nchah du khân păng tâm lĕ n'gor bri.”

²⁸ Phung chô yau hên gŭ râng jêh tâm nau mbah brah Baal-Pêôr, Sa ndơ ƀư brah ma phung khĭt,

²⁹ Pônây, khân păng nsônh nuih n'hâm Brah Ndu yor ma lĕ kan khân păng ƀư, Jêh ri nau ji khĭt tưp geh tât ta nklang khân păng.

³⁰ Rnôk nây Y-Phinêas dâk ŭch ma buay lơi Jêh ri nau ji tưp dơi rlu.

³¹ Bơh rnôk aơ tât rnôk ri, nau păng ƀư dơi kơp jêng sŏng srăng Jêh ri dơi kah gĭt tâm lĕ rngôch rnôk n'ho ro.

³² Phung chô yau hên nsônh jêh nau May ji nuih ta kơh dak Mêriba, Pôri yor ma khân păng Y-Môis dơi nau mhĭk tât,

³³ Yor khân păng ƀư rŭng răng nau mĭn păng Yor ri păng ngơi mâu njrăng.

³⁴ Khân păng mâu ƀư rai ôh lĕ mpôl băl ta nây, Nâm bu Brah Yêhôva hŏ ntĭnh ntăm jêh.

³⁵ Ƀiălah tâm rlŭk đah phung ƀon lan nây, Ƀư tĭng lĕ kan khân păng ƀư.

³⁶ Khân păng mbah rup brah khân păng, Jêh ri nau aơ jêng dăk sân ma khân păng.

³⁷ Khân păng nhhơr phung kon khân păng Gay ƀư brah ma phung brah mhĭk.

³⁸ Khân păng ƀư nkhŭt mham mâu geh tih, Nây jêng mham kon bu klâu kon bu ur khân păng Gay ƀư brah ma rup brah n'gor bri Kanaan, Ăn n'gor bri jêng ƀơ̆ ƀơch yor mham nây.

³⁹ Nâm pônây, khân păng ƀơ̆ ƀơch yor kan khân păng, Jêh ri ƀư tih văng tĭr ma nau khân păng pah.

⁴⁰ Yor nây, nau Brah Yêhôva hao ji nuih ma phung ƀon lan Păng, Păng tâm rmot ngăn ma drăp ndơn Păng.

⁴¹ Păng jao khân păng tâm ti phung bu năch, Jêh ri phung tâm rmot ma khân păng chiă uănh khân păng.

⁴² Phung rlăng ăt tŭn jot khân păng. Khân păng lăp gŭ tâm dâng ti phung rlăng.

⁴³ Âk tơ̆ Kôranh Brah tâm rklaih khân păng, Ƀiălah khân păng sâl tâm rdâng đah Păng. Jêh ri gŭ ngâm tâm nau tih.

⁴⁴ Nđâp tơlah pônây, Brah Ndu ăt tăng nau khân păng dăn, Jêh ri mêt uănh khân păng tâm rnôk khân păng rêh ni.

⁴⁵ Păng kah gĭt yô̆ ma phung nây yor nau Păng tâm rnglăp. Păng yô̆ nđach ma phung nây tĭng nau ueh Păng mâu blau lôch ôh.

⁴⁶ Păng ăt ƀư ma bu geh nau yô̆ Tanăp phung nhŭp khân păng ƀư dĭk.

⁴⁷ Ơ Yêhôva Brah Ndu hên, dăn sâm rklaih hên, Tâm rƀŭn hên bơh nklang lĕ bri dak, Gay ma hên mra tâm rnê ma amoh kloh ueh May Jêh ri dơi mprơ tâm rnê ma May.

⁴⁸ Khư mprơ tâm rnê Yêhôva Brah phung Israel, Bơh rnôk n'ho ro saơm tât rnôk n'ho ro nglĕ dŭt! Ăn lĕ rngôch phung ƀon lan lah May lah da dê: “Amen!” Halêluya!