Nau Mprơ Ơm 105 - Nau Brah Ndu Ngơi 2023

Lĕ kan khlay Brah Yêhôva ƀư jêh ma phung ƀon lan Israel

¹ Mprơ tâm rnê hom ma Brah Yêhôva jêh ri kuăl mbơh sơm ma amoh Păng! Mbơh hom nau kan Păng ta nklang phung mpôl băl bunuyh!

² Mprơ hom ma Păng, tâm rnê hom ma Păng! Mĭn rvê hom ma lĕ rngôch nau kan khlay Păng.

³ Tâm rnê hom tâm amoh kloh ueh Păng; Ăn nuih n'hâm phung joi Brah Yêhôva geh nau răm maak!

⁴ Joi hom Brah Yêhôva jêh ri nau brah Păng, Joi hom muh măt Păng ƀaƀơ!

^5-6 Ơ noi deh Abraham jêng oh mon Păng, Ơ phung kon sau Y-Yakôb jêng phung Păng săch jêh! Ăn khân may kah gĭt nau kan khlay Păng ƀư jêh, Lĕ nau mbên khlay jêh ri nau phat dôih bơh bâr mbung Păng.

⁷ Păng yơh jêng Yêhôva Brah Ndu he; Nau Păng phat dôih gŭ lam neh ntu.

⁸ Păng kah gĭt ƀaƀơ ma nau Păng tâm rnglăp, Nau Păng ton prăp rbăn rnôk mâu dơi chuêl ôh;

⁹ Jêng nau tâm rnglăp Păng ƀư jêh đah Y-Abraham, Ton jêh đah Y-Isăk,

¹⁰ Nal jêh ma Y-Yakôb ƀư nau vay dăp, Ma phung Israel jêng nau tâm rnglăp n'ho ro,

¹¹ Tơlah Păng lah pô aơ: “Gâp mra ăn ma may n'gor Kanaan Jêng du kô̆ drăp ndơn ma may.”

¹² Rnôk nây khân păng knŏng jêng du rnoh djê̆ bunuyh. Jêng phung bu năch tâm n'gor,

¹³ Hăn tă bơh bri dak aơ tât ma bri dak êng, Tă bơh ƀon bri hađăch tê̆ tât ma phung ƀon lan ri.

¹⁴ Brah Yêhôva mâu ăn bu tŭn jot khân păng ôh; Ma yor khân păng, Păng mbơh lor ma hađăch khân păng:

¹⁵ “Lơi ta pah tât phung Gâp troch dak ngi, Lơi ƀư djơh ma phung nơm mbơh lor Gâp!”

¹⁶ Păng ăn nau ji ngot tât ta n'gor Jêh ri sŏk lơi lĕ ndơ sông sa.

¹⁷ Ƀiălah Păng njuăl du huê bunuyh hăn lor panăp phung ƀon lan Israel Jêng Y-Yôsep, bu tăch ƀư jêng bu nă.

¹⁸ Bu klêng jâng păng lăp tâm nkông, Kât rse rvăk loih ta trô ko

¹⁹ Kŏ tât nau păng ngơi plơ̆ jêng nau ngăn. Nau ngơi bơh Brah Yêhôva mpơl jêh ma păng.

²⁰ Hađăch njuăl bu doh Y-Yôsep, Nơm chiă uănh phung ƀon lan sâm rklaih păng.

²¹ Hađăch njêng păng ƀư nơm chiă uănh ngih hađăch, Chiă uănh lĕ rngôch drăp ndơ păng.

²² Păng geh nau dơi klơ phung băl hađăch păng, Jêh ri sâm nti nau blau mĭn ma phung kôranh bu ranh.

²³ Rnôk nây, ƀon lan Israel ăt văch ta Êjipt; Yakôb gŭ tâm n'gor bri Cham.

²⁴ Brah Yêhôva ƀư ma phung ƀon lan Păng bĭk âk, Ăn khân păng ktang lơn ma phung rlăng khân păng.

²⁵ Păng ƀư ma phung Êjipt plơ̆ tâm rmot ma phung ƀon lan Păng, Tâm nchră ƀư mhĭk ma phung oh mon Păng.

²⁶ Păng njuăl oh mon Păng jêng Y-Môis Jêh ri Y-Arôn nơm Păng săch jêh.

²⁷ Tâm n'gor Cham, Bar hê khân păng ƀư lĕ nau mbên jêh ri nau mbên khlay Păng.

²⁸ Păng njuăl nau ngo jêh ri ƀư ma n'gor ngo klĕng, Ƀiălah phung nây ăt mâu iăt ôh nau Păng.

²⁹ Păng tâm rgâl dak krong jêng mham, Jêh ri nkhĭt lơi ka khân păng.

³⁰ Neh khân păng bêng ma kĭt, Nsăt tât tâm jrô hađăch bê̆ch.

³¹ Păng lah, geh phung rhuay mpăr tât ro, Jêh măch bêng lam n'gor.

³² Păng ăn mih pler ntrok mih, Jêh ri ăn ŭch sa lĕ rngôch n'gor.

³³ Păng ƀư rai đang play krăk ƀâu jêh ri tơm play rvi, Ƀư deh tơm si tâm n'gor bri khân păng.

³⁴ Păng lah, krah ndrach mpăr tât ro Bi krah mâu dơi kơp ôh,

³⁵ Khân păng sa lĕ rngôch gơ̆ tâm n'gor bri, Jêh ri ƀư rai play do tâm neh.

³⁶ Păng nkhĭt đŏng lĕ rngôch kon bôk rah tâm n'gor, Nây jêng nau ueh ngăn nau ktang khân păng.

³⁷ Păng njŭn leo phung ƀon lan Israel du luh, ti bêng ma prăk mah; Mâu geh du huê jêng rdja ôh tâm phung mpôl băl păng.

³⁸ Phung Êjipt maak tơlah khân păng luh hăn, Yorlah nau krit phung Israel ƀư jêh ta khân păng.

³⁹ Brah Yêhôva ăn ndâr tŭk gay nkŭm khân păng, Jêh ri dôl măng geh ŭnh sol trong khân păng.

⁴⁰ Tơlah khân păng dăn, Yêhôva ăn phung sĭm gôi văch, Jêh ri sŏk ƀănh bơh trôk ăn păng sa hơm raơm.

⁴¹ Păng plah lŭ, dak luh dŭl ro Nâm bu du n'hor dak krong hoch tâm bri rdah.

⁴² Yorlah Păng kah gĭt ma nau Păng ton kloh ueh, Jêh ri mâu chuêl ôh Abraham jêng oh mon Păng.

⁴³ Tâm ban pônây, Păng njŭn phung ƀon lan Păng du luh ma nau răm maak, Leo phung Păng săch du luh tâm nau maak.

⁴⁴ Păng sŏk neh lĕ bri dak ăn ma khân păng, Jêh ri ăn ma khân păng sŏk play bơh kan phung mpôl băl êng

⁴⁵ Gay ma khân păng djôt prăp nau vay Păng, Jêh ri tông nau vay Păng. Halêluya!