Nau Mprơ Ơm 104 - Nau Brah Ndu Ngơi 2023

Brah Yêhôva mât mray ndơ Păng njêng

¹ Ơ huêng gâp, mât ton hom ma Brah Yêhôva! Ơ Yêhôva Brah Ndu gâp, May jêng toyh ngăn; May nsoh jêh nau chrat ang jêh ri nau nchrat ral!

² Păng nkŭm păng nơm ma nau ang nâm bu du blah ao, Ling lĕ ndâr trôk nâm bu ngih bok.

³ Păng dơm lĕ rda jrô prêh Păng ta klơ dak prêh, Dŏng ndâr tŭk ƀư ndeh seh, Jêh ri ncho ta klơ năr sial.

⁴ Păng mprơh sial jêng nơm mbơh Păng, Mpiăt ŭnh ƀư oh mon Păng.

⁵ Păng njêng rplay neh ta klơ lĕ ntur Păng; N'ho ro păng mâu mra geh mpât n'gơ ôh.

⁶ May sŏk dak rlai nkŭm neh nâm bu du blah ao, Ƀư ăn dak hao prêh lơn ma phung yôk.

⁷ Ƀiălah tơlah May nduyh, dak nchuăt du ro; Tăng nteh nglaih May, dak gơnh du ngai.

⁸ Yôk hao ta klơ, tâm rlŭng trŭnh văm Tât ntŭk May tâm nal jêh ma păng.

⁹ May nal jêh n'har ma dak gay ma dak mâu rlau ôh, Mâu hôm plơ̆ nkŭm tay klơ neh ntu đŏng ôh.

¹⁰ Păng ăn lĕ dak hoch luh tâm rlŭng, Khân păng hoch vah vang phung yôk.

¹¹ Khân păng ăn dak nhêt ma lĕ rngôch mpô mpa tâm bri; Phung seh bri dơi bah ji hir.

¹² Phung sĭm tâm trôk văch ƀư rsuăn ta kơh dak nây Jêh ri gŭ nhhiăng tâm n'gĭng si.

¹³ Bơh jrô prêh, Păng djrah phung yôk; Neh ntu dơi hơm ma play bah kan May.

¹⁴ Păng ăn gơ̆ hon ma mpa rong, Tơm si gay bunuyh mât rong Jêh ri neh dơi geh ndơ sa.

¹⁵ Ndrănh play krăk ƀâu ƀư maak nuih n'hâm bunuyh, Dak ngi ăn muh măt chrat ang, Jêh ri ƀănh gay ma sa bah ji ngot.

¹⁶ Tơm si Brah Yêhôva dơi djrah ma mih n'hach, Tơm si sêdar n'gor Liban Păng tăm jêh.

¹⁷ Phung sĭm văch ƀư rsuăn, Jêh ri phung sĭm kŭk kreo ƀư rsuăn ta klơ lĕ chông tơm si nây.

¹⁸ Yôk prêh jêng ntŭk gŭ ma phung be bri; Mpir lŭ jêng ntŭk đe bri gŭ krap.

¹⁹ Păng njêng jêh khay gay ăn bu gĭt yan; Nar gĭt mông păng nhâp.

²⁰ May njêng nau ngo, nây jêng măng, Jêng nôk phung mpô mpa bri hăn joi ndơ sa.

²¹ Kon yau mŭr ngrông dôl joi ndơ sa, Jêh ri joi ndơ Brah Ndu ăn ma khân păng sa.

²² Tơlah luh nar, khân păng plơ̆ sĭt Jêh ri gŭ bê̆ch tâm trôm.

²³ Rnôk nây kon bunuyh hăn pah kan Jêh ri ƀư kŏ tât măng trôk.

²⁴ Ơ Brah Yêhôva, kan May âk ngăn ngên! May njêng jêh lĕ rngôch ma nau blau mĭn; Neh ntu bêng ma ndơ May njêng.

²⁵ Bi ma dak mƀŭt toyh huy hâu ngăn ngên. Ta nây geh âk mâu dơi kơp mpa vơr Jê̆ jêh ri toyh.

²⁶ Kumpăn hăn nsong klơ nây, Geh Lêviathan May njêng jêh gay nsong pâl tâm nây.

²⁷ Lĕ rngôch phung jun nây gŭ kâp May Gay ma May ăn ndơ ma khân păng sa tâm mông găl.

²⁸ May ăn ma khân păng jêh ri khân păng sŏk dơn; May mplơt ti ăn khân păng dơi hơm mpay lĕ ndơ ueh.

²⁹ Ƀiălah tơlah May pôn măt, khân păng krit ngăn, May sŏk lơi n'hâm khân păng, khân păng khĭt Jêh ri plơ̆ sĭt ma ndruyh neh.

³⁰ Tơlah May njuăl tât n'hâm rêh, khân păng dơi rhăk njêng; May ƀư ăn mhe muh măt neh ntu.

³¹ Ăn nau chrêk rmah Brah Yêhôva gŭ ƀaƀơ; Ăn Brah Yêhôva răm maak tâm kan Păng.

³² Păng uănh ma neh, neh mpât n'gơ; Păng pah tât yôk, yôk luh nhhŭk ŭnh.

³³ Tơlah ndah jŏ gâp gŭ rêh, gâp mra mprơ ma Brah Yêhôva dŭm nĕ; Tơlah ndah jŏ gâp hôm rêh, gâp mra mprơ tâm rnê ma Brah Yêhôva dah nĕ lĕ.

³⁴ Ăn nau gâp mĭn dơi ƀư maak ma nuih n'hâm Păng; Yorlah gâp răm maak tâm Brah Yêhôva.

³⁵ Ăn phung tih rai lôch bơh neh ntu Jêh ri phung mhĭk mâu hôm geh đŏng ôh. Ơ huêng gâp, mprơ tâm rnê hom ma Brah Yêhôva! Halêluya!