Nau Mprơ Ơm 103 - Nau Brah Ndu Ngơi 2023

Mprơ tâm rnê nau yô̆ toyh Brah Yêhôva

Nau Mprơ Ơm Y-Đavit

¹ Ơ huêng gâp, tâm rnê hom ma Brah Yêhôva! Lĕ ntil ndơ gŭ tâm gâp, Mprơ tâm rnê hom ma amoh kloh ueh Păng!

² Ơ huêng gâp, tâm rnê hom ma Brah Yêhôva, Lơi dĭng chuêl ôh lĕ ntil nau ueh Păng ăn.

³ Păng yơh yô̆ an lĕ nau tih may, Ƀư bah lĕ nau ji kuet may,

⁴ Tâm chuai nau rêh may bơh ntŭk rai yot, Sŏk nau ueh jêh ri yô̆ nđach ƀư đon hađăch gay ndô ma may.

⁵ Păng ƀư ăn ma may geh nau maak đah lĕ ntil nau ueh Gay nau mom ndăm may dơi plơ̆ sĭt tay nâm bu klang ƀŭng.

⁶ Brah Yêhôva ƀư nau sŏng srăng Jêh ri ƀư nau di ma lĕ rngôch phung bu tŭn jot.

⁷ Păng tâm mpơl jêh trong Păng ma Y-Môis, Jêh ri ma phung Israel gĭt lĕ kan Păng.

⁸ Brah Yêhôva bêng ma nau yô̆ nđach, vay ƀư ueh, Mâu gơnh duh nuih jêh ri ndrŏng ma nau ueh.

⁹ Păng mâu ir nduyh he ƀaƀơ ôh, Mâu lĕ Păng mât mray nau ji nuih tât n'ho ro.

¹⁰ Păng mâu ƀư ôh ma he tĭng nâm nau tih he ƀư, Mâu lĕ mplơ̆ sĭt ma he tĭng nâm nau djơh mhĭk he.

¹¹ Yorlah ndah nâm ƀah lĕ ndâr trôk đah neh, Rlau lơn ma nĕ đŏng nau ueh Păng toyh ngăn ăn mbu nơm yơk ma Păng.

¹² Ndah nâm ngai mpeh luh nar đah mpeh nhâp nar, Pôri đŏng Păng sŏk nkhah lơi nau tih he ngai đah he dŭm âk.

¹³ Brah Yêhôva yô̆ nđach phung klach yơk ma Păng, Nâm bu mbơ̆ yô̆ nđach ma kon păng.

¹⁴ Yorlah Păng gĭt mbă ndơ bu njêng he; Păng kah gĭt he jêng bơh ndruyh neh.

¹⁵ Nau rêh kon bunuyh tâm ban ma gơ̆, Tâm ban ma gơ̆ kao dang kao tâm ndrêch;

¹⁶ Lah sial khôm du tong ta kao, jêh ri mâu hôm saơ păng ôh, Ntŭk păng mâu hôm gĭt năl păng ôh.

¹⁷ Ƀiălah nau ueh Brah Yêhôva hôm ƀaƀơ n'ho ro Ma phung klach yơk ma Păng, Jêh ri nau sŏng srăng Păng prăp ma sau se khân păng.

¹⁸ Jêng lah ăn ma mbu nơm djôt prăp nau tâm rnglăp Păng Jêh ri kah gĭt lĕ nau vay ntăm bơh Păng gay tĭng ƀư.

¹⁹ Brah Yêhôva rdâk jêh sưng hađăch Păng ta klơ lĕ ndâr trôk, Ƀon bri hađăch Păng chiă uănh lĕ rngôch ndơ.

²⁰ Ơ phung tông mpăr Brah Yêhôva, Jêng lĕ nơm geh nau ktang ƀư tĭng nau Păng đă, Jêh ri tông bâr tĭng nau Păng lah! Mât ton hom ma Brah Yêhôva!

²¹ Ơ lĕ rngôch phung tahan Brah Yêhôva Jêng oh mon Păng, Ƀư tĭng nau Păng ŭch mĭn, Mprơ mât ton hom ma Brah Yêhôva!

²² Ơ lĕ rngôch ndơ Brah Yêhôva njêng Lĕ rngôch ntŭk tâm dâng nau Păng chiă uănh, Mprơ tâm rnê hom ma Brah Yêhôva! Ơ huêng gâp, mât ton hom ma Brah Yêhôva!