Nau Mprơ Ơm 102 - Nau Brah Ndu Ngơi 2023

Dăn Kôranh Brah kơl tâm nau rêh ni

Nau mbơh sơm ma du huê bunuyh rêh ni, tâm mpơl nau rngot klâng păng tanăp Brah Yêhôva

¹ Ơ Brah Yêhôva, iăt hom nau gâp mbơh sơm, Ăn nau gâp nter sâm rklaih hao tât ta May.

² Tâm nar rêh ni, Lơi pôn ôh măt May ma gâp; Rkêng tôr iăt ma gâp; Tâm nar gâp kuăl dăn, gơnh oi mplơ̆ lah nau gâp.

³ Yorlah lĕ nar gâp lêk nâm bu thŭl tŭk, Nting gâp rai nâm bu ŭnh sa ônh tâm ŭnh năk.

⁴ Nuih n'hâm gâp nâm bu kao gơ̆ bu jot mpet jêh ri kro klêu; Gâp chuêl nđâp sông sa nhêt.

⁵ Yor lŭng nter rđêng nđor. Săk jăn gâp knŏng hôm ntâu krêp đah nting.

⁶ Gâp jêng nâm bu sĭm klang grât tâm bri hŏng. Tâm ban klang kô tâm ndrêch rdah.

⁷ Gâp rngeh rlĭ rlang; Gâp tâm ban du mlâm sĭm srai rngot ta klơ chor ngih.

⁸ Ăp nar phung rlăng ƀư bêk ma gâp; Khân păng nsŭch jêh ri rak rtăp ma gâp.

⁹ Yor nau May nuih jêh ri ji nuih, Gâp sa ŭnh buh tâm ban ma sa ƀănh,

¹⁰ Jêh ri rvăn dak tăng tâm pot đah ndơ gâp nhêt. Yorlah May chông gâp hao prêh jêh ri mƀăr gâp tâm ntŭk dêh.

¹¹ Nar khay ngăch rlau nâm bu gui dăch roh, Nau rêh kro nâm bu kao gơ̆.

¹² Ƀiălah Brah Yêhôva ơi, May gŭ ta sưng hađăch n'ho ro, Nau kah gĭt ndray May hôm mro mrăng bơh rnôk aơ tât rnôk ri.

¹³ May mra gơnh yô̆ nđach ma ƀon Siôn; Yorlah jêng mông May ăn nau yô̆ ma păng. Jêh ri mông tât jêh.

¹⁴ Phung oh mon May rŏng ma ăp găr lŭ Siôn Jêh ri yô̆ nđach ma lĕ ndruyh neh păng đŏng.

¹⁵ Rnôk aơ mpôl băl bunuyh mra klach yơk ma amoh Brah Yêhôva, Jêh ri lĕ rngôch phung hađăch tâm neh ntu mra klach yơk ma nau chrêk rmah Păng.

¹⁶ Tơlah Brah Yêhôva rdâk tay ƀon Siôn, Păng tâm mpơl tâm nau chrêk rmah Păng.

¹⁷ Păng kâp iăt jêh nau phung rêh ni mbơh sơm, Mâu mưch ôh nau khân păng mbơh sơm.

¹⁸ Nchih hom nau aơ tât tâm rnôk kăndơ̆, Gay du mpôl băl bunuyh kăndơ̆ mra mprơ tâm rnê ma Brah Yêhôva.

¹⁹ Yorlah Păng uănh, bơh ntŭk kloh ueh prêh klơ, Bơh klơ trôk, Păng sek uănh ta neh ntu.

²⁰ Păng iăt nau phung bu nă nđêng nđor, Jêh ri rklaih phung bu jao jêh ma nau khĭt.

²¹ Tâm ban pônây, bu mbơh amoh Brah Yêhôva tâm Siôn, Jêh ri mprơ tâm rnê Păng ta ƀon Yêrusalem,

²² Tơlah lĕ rngôch phung ƀon lan tâm rgum Gay yơk mbah ma Brah Yêhôva.

²³ Brah Ndu ƀư rdja jêh nau ktang gâp ta nklang trong; Ƀư gleh lơi nar khay gâp gŭ rêh.

²⁴ Gâp lah pô aơ: “Ơ Brah Ndu! Lĕ năm May gŭ bơh rnôk aơ tât rnôk ri. Lơi ta sŏk gâp Dôl n'gul nau rêh gâp mâu hŏ lôch ôh!”

²⁵ Rnôk kăl e, May rhăk njêng mbon rplay neh, Lĕ ndâr trôk jêng kan bơh ti May nơm.

²⁶ Trôk neh mra rai lôch, ƀiălah Kôranh Brah ăt hôm n'ho ro; Khân păng mra mŭnh sat nâm bu kho ao. May mra tâm rgâl khân păng nâm bu du blah ao jêh ri bu mra tâm rgâl.

²⁷ Ƀiălah May ăt hôm tâm ban nŭm ơm, Lĕ năm May hôm ƀaƀơ n'ho ro.

²⁸ Kon sau phung oh mon May mra hôm gŭ mro, Noi deh khân păng mra gŭ nâp tanăp măt May.