Nau Mprơ Ơm 10 - Nau Brah Ndu Ngơi 2023

Dăn Kôranh Brah rklaih tă bơh phung djơh mhĭk

¹ Ơ Brah Yêhôva! Mâm ƀư May gŭ ngai? Mâm ƀư May pôn muh măt tâm rnôk geh nau rêh ni?

² Nau sưr rlau phung mhĭk hăn tĭng bunuyh o ach; Ăn khân păng tŭp tâm nau khân păng ŭch mĭn nchră hŏ ƀư jêh.

³ Yorlah phung mhĭk tâm rnê ma nuih n'hâm khân păng ŭch; Phung ndơm kơnh ma nau suai rak jêh ri dun Brah Yêhôva.

⁴ Phung mhĭk ngơi nau sưr, mâu tĭng joi Kôranh Brah; Păng mĭn pô aơ mâu geh Brah Ndu ôh.

⁵ Trong păng geh jêng nau ndrŏng ƀaƀơ; Nau Kôranh Brah phat dôih prêh ngăn, păng mâu dơi gĭt rbăng; Păng mưch lĕ rngôch phung rlăng đah păng.

⁶ Păng lah tâm nuih n'hâm: “Gâp mâu mra mpât n'gơ; Gâp mâu mra mâp nau mhĭk tât.”

⁷ Trôm mbung păng bêng ma nau rak rtăp, mƀruh ndơm jêh ri nau thăm rmat; Mpiăt păng ngơi nau mhĭk jêh ri nklă nchơt.

⁸ Păng gŭ rmoch kâp tâm ntŭk lĕ ƀon jê̆, Nde krap ta ntŭk ngo gay nkhĭt bunuyh mâu geh nau tih. Măt păng uănh joi jŭm phung rêh ni.

⁹ Păng gŭ krap tâm ntŭk ndâp nâm bu yau mŭr tâm trôm, Păng gŭ krap gay ma nhŭp phung rêh ni; Păng têk bunuyh o ach lăp tâm nhuăl gay nhŭp khân păng.

¹⁰ Păng kŭnh jêh ri dâk hăn, Phung rêh ni prah sơmok tanăp nau ktang păng.

¹¹ Păng mĭn tâm nuih n'hâm: “Brah Ndu chuêl jêh, Păng lĕ pôn măt jêh ri mâu mra saơ nau aơ ôh.”

¹² Brah Yêhôva ơi! Dăn dâk hom; Brah Ndu ơi! Dăn yơr hom ti Kôranh Brah; Lơi ta chuêl ôh phung rêh ni.

¹³ Mâm ƀư phung mhĭk mưch ma Brah Ndu Jêh ri mĭn tâm nuih n'hâm: “Kôranh Brah mâu mra mâp ôp âk ntil ôh”?

¹⁴ Ƀiălah, Kôranh Brah hŏ saơ jêh! Kôranh Brah uănh kŏ tât nau rêh ni jêh ri ji ngăn; Păng sek uănh gay yơr ti ƀư. Phung rêh ni jao khân păng nơm ma Kôranh Brah; May jêng Nơm kơl phung kon đơi.

¹⁵ Dăn nkê̆ch pă lơi nting tur phung ƀai jêh ri phung djơh mhĭk; Tĭng joi nau mhĭk khân păng kŏ tât lôch.

¹⁶ Brah Yêhôva ƀư hađăch tât ƀaƀơ n'ho ro; Lĕ bri dak bu mra ƀư rai tă bơh neh Păng.

¹⁷ Ơ Brah Yêhôva, May hŏ iăt jêh nau ŭch phung dêh rhêt; May ăn khân păng nâp nuih n'hâm, jêh ri rkêng tôr iăt khân păng

¹⁸ Gay ƀư nau di ma phung kon đơi jêh ri phung bu tŭn jot, Ƀư ăn kon bunuyh ơm tă bơh ndruyh neh, mâu hôm klach đŏng ôh.