Nau Kơp Bunuyh 9 - Nau Brah Ndu Ngơi 2023

Rƀŭn Nau Găn ta bri rdah Sinai

¹ Tâm khay nguay năm tal bar, jêh khân păng du luh tă bơh Êjipt, Brah Yêhôva lah ma Y-Môis tâm bri rdah Sinai pô aơ:

² “Ăn phung ƀon lan Israel djôt prăp Rƀŭn Nau Găn ta nar tâm nal jêh.

³ Ăn khân may djôt prăp nau rƀŭn nây tĭng nâm nar tâm nal jêh, jêng nar jât ma puăn khay aơ dôl kêng măng, jêh ri ăn khân may ƀư tĭng lĕ rngôch nau vay dăp jêh ri nau vay ma nau rƀŭn nây.”

⁴ Tâm ban pônây, Y-Môis lah ma phung ƀon lan Israel ăn khân păng nkra Rƀŭn Nau Găn.

⁵ Phung ƀon lan Israel kah gĭt Rƀŭn Nau Găn dôl kêng măng ta nar jât ma puăn khay nguay tâm bri rdah Sinai nâm Brah Yêhôva hŏ ntăm jêh ma Y-Môis.

⁶ Ƀiălah geh bar pe bunuyh mâu dơi râng Rƀŭn Nau Găn yor geh nau ƀơ̆ ƀơch tă bơh săk jăn khĭt, văch tra năp Y-Môis jêh ri Y-Arôn;

⁷ khân păng lah ma Y-Môis pô aơ: “Hên jêng ƀơ̆ jêh yor săk jăn bunuyh khĭt, ƀiălah mâm ƀư hên mâu dơi nhhơr ndơ ƀư brah ma Brah Yêhôva ta nar tâm nal jêh ta nklang phung ƀon lan Israel?”

⁸ Y-Môis lah: “Kâp hom, gay gâp dơi tăng moh nau Brah Yêhôva mra ntĭnh ma khân may.”

⁹ Brah Yêhôva lah ma Y-Môis:

¹⁰ “Lah hom ma phung ƀon lan Israel pô aơ: ‘Tơlah du huê tâm phung khân may mâu lah tâm phung kon sau khân may jêng ƀơ̆ yor săk jăn khĭt mâu lah nsong tâm ntŭk ngai, ăt păng mra kah gĭt prăp Rƀŭn Nau Găn ma Brah Yêhôva.

¹¹ Ăn khân păng djôt prăp nau rƀŭn aơ tâm kêng măng nar jât ma puăn khay bar jêh ri sa piăng let mâu geh ndrui nđâp ma trau tăng.

¹² Khân păng mâu mra ăn rmeh ôh ndơ sa tât ang ôi taơ, mâu lĕ dơi ƀư deh du mlâm nting. Khân păng mra djôt prăp tĭng lĕ rngôch nau vay dăp di ma Rƀŭn Nau Găn.

¹³ Ƀiălah nơm jêng kloh jêh ri mâu nsong ôh ntŭk ngai, ƀiălah mâu kah gĭt prăp ôh Rƀŭn Nau Găn, bu mra nsot lơi nơm nây luh bơh phung ƀon lan păng nơm, yorlah păng mâu mâp nhhơr ôh ndơ ƀư brah ma Brah Yêhôva ta nar tâm nal jêh. Nơm nây mra anh nau tih păng.

¹⁴ Tơlah du huê bu năch gŭ ta nklang khân may, jêh ri ŭch kah gĭt prăp Rƀŭn Nau Găn ma Brah Yêhôva, ƀư hom tĭng nâm nau vay dăp jêh ri nau vay ma Rƀŭn Nau Găn. Khân may mra geh du nau vay dăp nsum ma nơm gŭ njưh ƀât lât jêh ri ma bunuyh ƀon lan nơm.’

Ndâr tŭk nkŭm Ngih Bok

¹⁵ ‘Ta nar bu ndâk Ngih Bok ndâr tŭk nkŭm Ngih Bok, jêng Ngih Bok Nau Tâm Rnglăp. Ta kêng măng tât ta ang ôi taơ, ndâr tŭk gŭ ta klơ Ngih Bok nâm ndâr ŭnh.

¹⁶ Nôk nar, ndâr tŭk nkŭm Ngih Bok jêh ri păng tâm ban ma ndâr ŭnh tâm dôl măng, kŏ tât geh mro mrăng kơt nĕ.

¹⁷ Ăp tơ̆ ndâr tŭk hao klơ bơh Ngih Bok, phung ƀon lan Israel hăn du luh; moh ntŭk ndâr tŭk nsrŭng, phung ƀon lan Israel ndâk ngih bok gŭ ta nây.

¹⁸ Phung ƀon lan Israel hăn du luh tĭng nâm nau ntăm Brah Yêhôva jêh ri khân păng ndâk ngih bok tĭng nâm nau Brah Yêhôva ntĭnh đŏng. Ndah jŏ ndâr tŭk hôm gŭ ta klơ Ngih Bok Phung ƀon lan Israel kŏ ndâk ngih bok.

¹⁹ Ndah jŏ ndâr tŭk hôm e gŭ jŏ ta klơ Ngih Bok, phung ƀon lan Israel kŏ tông tĭng nau ntăm Brah Yêhôva jêh ri mâu hăn du luh ôh.

²⁰ Ƀiălah tơlah ndâr tŭk gŭ ƀhôi nar ta klơ Ngih Bok, Phung ƀon lan Israel kŏ tông nau ntăm Brah Yêhôva jêh ri khân păng ndâk ngih bok; jêh nây tĭng nâm nau Brah Yêhôva ntăm, khân păng hăn tay.

²¹ Geh tơ̆ ndâr tŭk kŏ gŭ ta nây ntơm bơh kêng măng tât ta ang ôi taơ; lah tât ang ôi taơ ndâr tŭk hao du klơ khân păng hăn du luh. Mâu lah tơlah ndâr tŭk ăt gŭ du nar jêh ri du măng đŏng, nôk ndâr tŭk hao klơ, ri mơ khân păng hăn.

²² Nôk ndâr tŭk gŭ ta klơ Ngih Bok bar nar mâu lah du khay, mâu lah jŏ lơn đŏng, pôri phung ƀon lan Israel ăt ndâk ngih bok jêh ri mâu hăn du luh ôh; ƀiălah tơlah ndâr tŭk hao klơ khân păng hăn tay.

²³ Phung ƀon lan Israel ndâk ngih bok tĭng nâm nau Brah Yêhôva ntăm jêh ri khân păng hăn du luh tĭng nâm nau ntăm Brah Yêhôva. Khân păng ăt tông nau ntăm Brah Yêhôva, tĭng nâm Brah Yêhôva hŏ ntăm jêh ma Y-Môis.’”