Nau Kơp Bunuyh 8 - Nau Brah Ndu Ngơi 2023

Jâng kađen pơh ŭnh kađen

¹ Brah Yêhôva lah ma Y-Môis:

² “Lah hom ma Y-Arôn pô aơ: Tơlah may dăp ŭnh kađen, ăn hom pơh mlâm ŭnh kađen nây nchrat ang panăp jâng kađen.”

³ Y-Arôn ƀư di pônây; păng dơm pơh ŭnh kađen nchrat ang panăp jâng kađen tĭng nâm Brah Yêhôva hŏ ntăm jêh ma Y-Môis.

⁴ Bu ƀư jâng ŭnh kađen ma mah bu chiăr n'hơ tă bơh ndơl kađen kŏ tât ta lĕ kao kađen. Bu ƀư jâng kađen di tĭng nâm rup Brah Yêhôva lĕ ntĭm jêh ma Y-Môis.

Phung Lêvi dơi prăp êng ma Kôranh Brah

⁵ Brah Yêhôva lah ma Y-Môis:

⁶ “Prăp êng hom phung Lêvi bơh ta nklang phung Israel jêh ri ƀư nau rƀŭn ăn khân păng dơi kloh.

⁷ Aơ jêng nau may ƀư kloh ma khân păng: May nsrih dak nau ƀư kloh ta klơ khân păng; ăn may lah ma khân păng poih lĕ rngôch rsau săk jăn khân păng, pih kho ao jêh ri ƀư kloh khân păng nơm.

⁸ Jêh nây, ăn may lah ma khân păng sŏk du mlâm ndrôk nkuăng ndrel ma ndơ ƀư brah rnih môi ma rnih môi tâm pach đah dak ngi, jêh ri ăn may sŏk du mlâm ndrôk nkuăng rah tal bar jêng ndơ ƀư brah chuai nau tih.

⁹ Ăn may lah ma phung Lêvi tât panăp Ngih Bok Nau Tâm Rƀŭn jêh ri rgum lĕ rngôch phung Israel tâm rƀŭn.

¹⁰ Lah may ăn phung Lêvi văch dăch tanăp măt Brah Yêhôva, phung Israel mra pah ti ta klơ phung Lêvi,

¹¹ Y-Arôn mra nhhơr phung Lêvi tanăp Brah Yêhôva nâm du ndơ ƀư brah ryeng pa tê̆ ryeng pa djaơ bơh phung ƀon lan Israel, gay ma khân păng ndrăp jêh pah kan ma Brah Yêhôva.

¹² Phung Lêvi mra pah ti ta klơ bôk lĕ bar mlâm ndrôk nkuăng jêh ri may nhhơr hom du mlâm jêng ndơ ƀư brah chuai nau tih, du mlâm êng dŏng ma ndơ ƀư brah gŭch ma Brah Yêhôva, gay chuai nau ƀư kloh nau tih ma phung Lêvi.

¹³ Jêh ta nây, ăn may lah phung Lêvi dâk tanăp măt Y-Arôn jêh ri phung kon bu klâu păng, jêh nây may nhhơr khân păng nâm du ndơ ƀư brah ryeng pa tê̆ ryeng pa djaơ ma Brah Yêhôva.

¹⁴ Tâm ban pônây, may mra prăp êng phung Lêvi luh tă bơh phung ƀon lan Israel jêh ri phung Lêvi mra jêng phung Gâp.

¹⁵ Jêh may hŏ ƀư kloh jêh jêh ri nhhơr phung Lêvi nâm du ndơ ƀư brah ryeng pa tê̆ ryeng pa djaơ, khân păng mra tât pah kan tâm Ngih Bok Nau Tâm Rƀŭn.

¹⁶ Yorlah, bơh ta nklang ƀon lan Israel phung Lêvi ăn n'ho ma Gâp; Gâp hŏ săch sŏk khân păng ma Gâp gay ntrok ăn lĕ rngôch kon bôk rah tâm phung ƀon lan Israel.

¹⁷ Lĕ rngôch phung kon bôk rah tâm phung ƀon lan Israel jêng ndơ Gâp, nđâp ma bunuyh mâu lah ma mpô mpa. Gâp hŏ prăp êng khân păng ma Gâp tâm nar Gâp nkhĭt jêh lĕ rngôch phung kon bu klâu bôk rah ta Êjipt

¹⁸ jêh ri Gâp hŏ săch jêh phung Lêvi ntrok ma lĕ rngôch phung kon bôk rah bơh phung ƀon lan Israel.

¹⁹ Tă bơh ta nklang phung ƀon lan Israel, Gâp hŏ ăn jêh phung Lêvi jêng ndơ ăn ma Y-Arôn jêh ri ma phung kon bu klâu păng gay ƀư nau kan phung ƀon lan Israel ta Ngih Bok Nau Tâm Rƀŭn, jêh ri ƀư nau rƀŭn chuai nau tih ma phung ƀon lan Israel, gay khân păng mâu mra geh ôh nau mhĭk nôk khân păng hăn dăch ntŭk kloh ueh.”

²⁰ Pôri Y-Môis, Y-Arôn jêh ri lĕ rngôch phung ƀon lan Israel tâm rƀŭn ƀư ma phung Lêvi lĕ rngôch nau Brah Yêhôva ntĭnh ntăm jêh ma Y-Môis.

²¹ Phung Lêvi ƀư kloh khân păng nơm jêh ri pih kho ao, jêh nây Y-Arôn nhhơr khân păng nâm ndơ ƀư brah ryeng pa tê̆ ryeng pa djaơ tanăp Brah Yêhôva jêh ri Y-Arôn ƀư nau rƀŭn chuai nau tih gay ƀư kloh ma khân păng.

²² Jêh nây, phung Lêvi lăp ƀư nau kan khân păng nơm tâm Ngih Bok Nau Tâm Rƀŭn tâm nau chiă uănh Y-Arôn jêh ri phung kon bu klâu păng. Bu ƀư ma phung Lêvi di nâm Brah Yêhôva hŏ ntăm jêh ma Y-Môis.

²³ Brah Yêhôva lah ma Y-Môis:

²⁴ “Aơ jêng lĕ nau vay nal ma phung Lêvi: Ntơm ma bar jât ma prăm năm leo klơ, phung Lêvi mra lăp pah kan tâm Ngih Bok Nau Tâm Rƀŭn.

²⁵ Ƀiălah ntơm bơh prăm jât năm, khân păng mra rlu lơi nau kan, mâu hôm pah kan ôh.

²⁶ Khân păng dơi kâp kơl phung oh nâu khân păng tâm Ngih Bok Nau Tâm Rƀŭn, ƀiălah khân păng nơm mâu mât mray nau kan đŏng. Nĕ jêng nau may tâm pă nau kan ma phung Lêvi.”