Nau Kơp Bunuyh 7 - Nau Brah Ndu Ngơi 2023

Ndơ nhhơr tâm nar nhhơr Ngih Bok

¹ Tơlah hŏ ndâk jêh Ngih Bok, Y-Môis tŏ dak ƀâu kah jêh ri prăp êng ma nau kloh ueh lĕ rngôch ndơ dŏng Ngih Bok, tâm ban đŏng tŏ dak ƀâu kah jêh ri prăp êng ma nau kloh ueh nơng ƀư brah jêh ri lĕ rngôch ndơ dŏng ma nơng ƀư brah.

² Jêh nây, phung kôranh chiă uănh Israel, jêng phung kôranh ndŭl mpôl, phung kôranh ndŭl mpôl hŏ sâm dơn kơp rnoh bunuyh da dê djôt leo nhhơr ndơ nhhơr păng nơm.

³ Khân păng djôt leo lĕ ndơ nhhơr tât tanăp Brah Yêhôva: Prao bôk ndeh geh ndơ nkŭm jêh ri jât ma bar mlâm ndrôk nkuăng; ăp kôranh chiă uănh nhhơr du mlâm ndrôk jêh ri bar hê bunuyh nhhơr du bôk ndeh. Khân păng nhhơr lĕ ndơ nhhơr panăp Ngih Bok.

⁴ Brah Yêhôva lah ma Y-Môis:

⁵ “Sŏk dơn hom lĕ ndơ nhhơr tă bơh khân păng gay dŏng tâm nau kan ta Ngih Bok Nau Tâm Rƀŭn jêh ri jao ăn ma phung Lêvi tĭng nâm nau kan ma ăp nơm.”

⁶ Pônây, Y-Môis sŏk dơn bôk ndeh jêh ri lĕ ndrôk nkuăng jêh nây jao ma phung Lêvi.

⁷ Păng jao bar bôk ndeh jêh ri puăn mlâm ndrôk nkuăng ma phung kon sau Y-Gersôn tĭng nâm kan khân păng.

⁸ Păng ăn puăn bôk ndeh jêh ri pham mlâm ndrôk nkuăng ma phung kon sau Y-Mêrari tĭng nâm kan khân păng. Khân păng tâm dâng nau chiă uănh Y-Ithamar, phung kon bu klâu kôranh ƀư brah Y-Arôn.

⁹ Ƀiălah păng mâu ăn moh ndơ ôh ma phung kon sau Y-Kôhat, yorlah ăn khân păng djôt kan chiă uănh lĕ ndơ kloh ueh khân păng tung ta klơ săng nglik khân păng nơm.

¹⁰ Tâm nar bu tŏ dak ƀâu kah ma nơng ƀư brah, phung kôranh chiă uănh djôt leo ndơ nhhơr ma nau nhhơr nơng ƀư brah tât nhhơr panăp nơng ƀư brah.

¹¹ Brah Yêhôva lah ma Y-Môis: “Phung kôranh tâm tơh du nar du huê, djôt leo ndơ gay nhhơr nơng ƀư brah.”

¹² Nơm nhhơr ndơ nhhơr tâm nar tal nguay jêng Y-Nahsôn, kon bu klâu Y-Aminadap, bơh ndŭl mpôl Yuđa.

¹³ Ndơ nhhơr păng jêng du mlâm ngan jam prăk jâk du kilô n'gul, du mlâm ngan grưng jâk pham rhiăng gram, tĭng nâm sêkel tâm ntŭk kloh ueh; lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi,

¹⁴ du mlâm kachok mah jâk du rhiăng jât mprăm gram bêng ma dak si ƀâu kah,

¹⁵ du mlâm ndrôk nkuăng rah, du mlâm biăp nkuăng, du mlâm biăp kon nkuăng du năm dŏng ƀư ndơ ƀư brah gŭch;

¹⁶ du be nkuăng dŏng ma ndơ ƀư brah chuai nau tih

¹⁷ jêh ri bar mlâm ndrôk nkuăng, prăm biăp mlâm nkuăng, prăm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Nahsôn, kon bu klâu Y-Aminadap.

¹⁸ Nar tal bar, Y-Nêthanel, kon bu klâu Y-Suar, kôranh ma ndŭl mpôl Isakar, nhhơr ndơ nhhơr.

¹⁹ Păng nhhơr du ngan jam prăk jâk păng du kilô n'gul, du ngan grưng prăk jâk pham rhiăng gram tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach dak ngi dŏng ma ndơ ƀư brah rnih môi;

²⁰ du kachok mah jâk du rhiăng jât mprăm gram bêng ma dak si ƀâu kah;

²¹ du ndrôk nkuăng rah, du mlâm biăp nkuăng, du biăp kon du năm dŏng ma ndơ ƀư brah gŭch;

²² du mlâm be nkuăng dŏng ma ndơ ƀư brah chuai nau tih

²³ jêh ri bar mlâm ndrôk nkuăng, prăm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Nêthanel, kon bu klâu Y-Suar.

²⁴ Ta nar tal pe, Y-Êliap, kon bu klâu Y-Hêlôn, kôranh ma ndŭl mpôl Sabulôn tât nhhơr ndơ nhhơr.

²⁵ Ndơ nhhơr păng jêng du ngan jam prăk jâk du kilô n'gul, du ngan grưng prăk jâk pham rhiăng gram tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

²⁶ du kachok mah jâk du rhiăng jât mprăm gram bêng ma dak si ƀâu kah;

²⁷ du mlâm ndrôk nkuăng rah, du mlâm biăp nkuăng, du mlâm biăp kon nkuăng du năm dŏng ma ndơ ƀư brah gŭch;

²⁸ du mlâm be nkuăng dŏng ma ndơ ƀư brah chuai nau tih

²⁹ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Êliap, kon bu klâu Y-Hêlôn.

³⁰ Nar tal puăn, Y-Êlisur, kon bu klâu Y-Sêdur, kôranh ma phung Ruben, tât nhhơr ndơ nhhơr.

³¹ Ndơ nhhơr păng jêng du ngan jam prăk jâk du kilô n'gul, du ngan grưng prăk jâk păng rhiăng gram tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

³² du kachok mah jâk du rhiăng jât mprăm gram bêng ma dak si ƀâu kah,

³³ du mlâm ndrôk nkuăng rah, du mlâm biăp nkuăng; du mlâm biăp kon nkuăng du năm dŏng ma ndơ ƀư brah gŭch;

³⁴ du mlâm be nkuăng dŏng ma ndơ ƀư brah chuai nau tih

³⁵ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Êlisur, kon bu klâu Y-Sêdur.

³⁶ Nar tal prăm, Y-Sêlumiel, kon bu klâu Y-Surisadai, kôranh ma phung Simêôn, tât nhhơr ndơ nhhơr.

³⁷ Ndơ nhhơr păng geh du ngan jam prăk jâk păng du kilô n'gul, du ngan grưng prăk jâk pham rhiăng gram tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

³⁸ du kachok mah jâk du rhiăng jât mprăm gram, bêng ma dak si ƀâu kah;

³⁹ du mlâm ndrôk nkuăng rah, du mlâm biăp nkuăng, du mlâm biăp kon nkuăng du năm dŏng ma ndơ ƀư brah gŭch;

⁴⁰ du mlâm be nkuăng dŏng ma ndơ ƀư brah chuai nau tih

⁴¹ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Sêlumiel, kon bu klâu Y-Surisadai.

⁴² Nar tal prao, Y-Êliasap, kon bu klâu Y-Dêuel, kôranh ma phung Gat, tât nhhơr ndơ nhhơr.

⁴³ Ndơ nhhơr păng geh du ngan jam prăk jâk du kilô n'gul, du ngan grưng prăk jâk pham rhiăng gram tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

⁴⁴ du kachok mah jâk du rhiăng jât mprăm gram bêng ma dak si ƀâu kah;

⁴⁵ du mlâm ndrôk nkuăng rah, du mlâm biăp nkuăng, du mlâm biăp kon nkuăng du năm dŏng ndơ ƀư brah gŭch;

⁴⁶ du mlâm be nkuăng dŏng ndơ ƀư brah chuai nau tih

⁴⁷ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Êliasap, kon bu klâu Y-Dêuel.

⁴⁸ Nar tal pơh, Y-Êlisama, kon bu klâu Y-Amihut, kôranh ma phung Êphraim, tât nhhơr ndơ nhhơr.

⁴⁹ Ndơ nhhơr păng geh du ngan jam prăk jâk kilô n'gul, du ngan grưng prăk jâk pham rhiăng gram tĭng nâm sêkel tâm ntŭk kloh ueh; lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

⁵⁰ du kachok mah jâk du rhiăng jât mprăm gram bêng ma dak si ƀâu kah;

⁵¹ du mlâm ndrôk nkuăng rah, du mlâm biăp nkuăng, du mlâm biăp kon du năm dŏng ma ndơ ƀư brah gŭch;

⁵² du mlâm be nkuăng dŏng ma ndơ ƀư brah chuai nau tih;

⁵³ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Êlisama, kon bu klâu Y-Amihut.

⁵⁴ Ta nar tal pham, Y-Gamaliel, kon bu klâu Y-Pêdasur, kôranh phung Manasê tât nhhơr ndơ nhhơr.

⁵⁵ Ndơ păng nhhơr geh du ngan jam prăk jâk kilô n'gul, du ngan grưng jâk pham rhiăng gram tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

⁵⁶ du kachok mah du rhiăng jât mprăm gram bêng ma dak si ƀâu kah;

⁵⁷ du mlâm ndrôk nkuăng rah, du mlâm biăp nkuăng, du mlâm biăp kon nkuăng du năm dŏng ma ndơ ƀư brah gŭch;

⁵⁸ du mlâm be nkuăng dŏng ma ndơ ƀư brah chuai nau tih

⁵⁹ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Gamaliel, kon bu klâu Y-Pêdasur.

⁶⁰ Ta nar tal sĭn, Y-Abidan, kon bu klâu Y-Gidêôni, kôranh ma phung Benjamin, tât nhhơr ndơ nhhơr.

⁶¹ Ndơ nhhơr păng geh du ngan prăk jâk păng kilô n'gul, du ngan grưng prăk jâk pham rhiăng gram, tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

⁶² du kachok mah du rhiăng jât mprăm gram bêng ma dak si ƀâu kah;

⁶³ du mlâm ndrôk nkuăng rah, du mlâm biăp nkuăng, du mlâm biăp kon nkuăng du năm dŏng ma ndơ ƀư brah gŭch;

⁶⁴ du mlâm be nkuăng dŏng ma ndơ ƀư brah chuai nau tih;

⁶⁵ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng, prăm mlâm biăp kon nkuăng du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Abidan, kon bu klâu Y-Gidêôni.

⁶⁶ Ta nar tal jât, Y-Ahiêser, kon bu klâu Y-Amisadai, kôranh ma phung Dan, tât nhhơr ndơ nhhơr.

⁶⁷ Ndơ nhhơr păng geh du ngan jam prăk jâk du kilô n'gul, du ngan grưng jâk pham rhiăng gram, tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

⁶⁸ du kachok mah du rhiăng jât mprăm gram bêng ma dak si ƀâu kah;

⁶⁹ du mlâm ndrôk nkuăng rah, du mlâm biăp nkuăng, du mlâm kon nkuăng du năm dŏng ma ndơ ƀư brah gŭch;

⁷⁰ du mlâm be nkuăng dŏng ma ndơ ƀư brah chuai nau tih;

⁷¹ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Ahiêser, kon bu klâu Y-Amisadai.

⁷² Ta nar tal jât ma nguay, Y-Pagiel, kon bu klâu Y-Ôkran, kôranh ma phung Aser, tât nhhơr ndơ nhhơr.

⁷³ Ndơ nhhơr păng nhhơr du ngan jam prăk jâk du kilô n'gul, du ngan grưng prăk jâk pham rhiăng gram, tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

⁷⁴ du kachok mah du rhiăng jât mprăm gram bêng ma dak si ƀâu kah;

⁷⁵ du mlâm ndrôk nkuăng rah, du mlâm biăp nkuăng, du mlâm biăp kon nkuăng du năm dŏng ma ndơ ƀư brah gŭch;

⁷⁶ du mlâm be nkuăng dŏng ma ƀư brah chuai nau tih;

⁷⁷ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Pagiel, kon bu klâu Y-Ôkran.

⁷⁸ Ta nar tal jât ma bar, Y-Ahira, kon bu klâu Y-Ênan, kôranh ma phung Naptali, tât nhhơr ndơ nhhơr.

⁷⁹ Ndơ păng nhhơr du ngan jam prăk jâk du kilô n'gul, du ngan grưng jâk pham rhiăng gram, tĭng nâm sêkel tâm ntŭk kloh ueh, lĕ bar ndơ nây bêng ma rnih môi pach đah dak ngi dŏng ma ndơ ƀư brah rnih môi;

⁸⁰ du kachok mah du rhiăng jât mprăm gram bêng ma dak si ƀâu kah;

⁸¹ du mlâm ndrôk nkuăng rah, du mlâm biăp nkuăng, du mlâm biăp kon nkuăng du năm dŏng ma ndơ ƀư brah gŭch;

⁸² du mlâm be nkuăng dŏng ma ndơ ƀư brah chuai nau tih;

⁸³ jêh ri bar mlâm ndrôk nkuăng, prăm mlâm biăp nkuăng, prăm mlâm be nkuăng jêh ri prăm mlâm biăp kon du năm dŏng ma ndơ ƀư brah ma nau đăp mpăn. Nây jêng ndơ nhhơr Y-Ahira, kon bu klâu Y-Ênan.

⁸⁴ Nây jêng lĕ ndơ nhhơr phung kôranh Israel nhhơr ma nau nhhơr nơng ƀư brah nôk bu tŏ dak ƀâu kah ma nơng ƀư brah: Jât ma bar ngan jam prăk, jât ma bar ngan grưng prăk, jât ma bar kachok mah.

⁸⁵ Ăp ngan jam prăk jâk du kilô n'gul jêh ri ăp ngan grưng jâk pham rhiăng gram. Lĕ rngôch prăk tă bơh ngan jam jêh ri ngan grưng jêng bar jât ma pham kilô, tĭng nâm sêkel tâm ntŭk kloh ueh.

⁸⁶ Jât ma bar kachok mah bêng ma dak si ƀâu kah, ăp kachok jâk jât mprăm gram, tĭng nâm sêkel tâm ntŭk kloh ueh. Lĕ rngôch mah tă bơh kachok jâk du kilô puăn rhiăng gram.

⁸⁷ Lĕ rngôch ndrôk biăp dŏng ma ndơ ƀư brah gŭch jêng jât ma bar mlâm ndrôk nkuăng, jât ma bar mlâm biăp nkuăng, jât ma bar mlâm biăp kon nkuăng du năm, ndrel ma ndơ ƀư brah rnih môi jêh ri jât ma bar mlâm be nkuăng jêng ndơ ƀư brah chuai nau tih.

⁸⁸ Lĕ rngôch ndrôk biăp dŏng ma nau ƀư brah ma nau đăp mpăn geh bar jât ma puăn ndrôk nkuăng, prao jât biăp nkuăng, prao jât be nkuăng, jêh ri prao jât biăp kon du năm. Nây jêng ndơ nhhơr ma nau nhhơr nơng ƀư brah jêh dơi bu tŏ dak ƀâu kah ma păng.

⁸⁹ Tơlah Y-Môis lăp Ngih Bok Nau Tâm Rƀŭn gay tâm ngơi ndrel đah Brah Yêhôva, păng tăng bâr Kôranh Brah ngơi ma păng nơm tă bơh ndrŭp nau yô̆ an ta klơ Hip Nau Tâm Rnglăp, ta vah vang bar chêrubim. Jêh ri kơt nĕ păng tâm ngơi ndrel jêh đah Brah Yêhôva.