Nau Kơp Bunuyh 6 - Nau Brah Ndu Ngơi 2023

Nau vay ma du huê Nasirit

¹ Brah Yêhôva lah ma Y-Môis:

² “Lah hom ma phung ƀon lan Israel: ‘Tơlah du huê bu klâu mâu lah bu ur ƀư nau ton jêng du huê Nasirit gay prăp êng ăn păng nơm ma Brah Yêhôva,

³ păng mra ver ndrănh jêh ri ndơ nhêt geh ndrui; mâu dơi nhêt ôh srat ƀư tă bơh ndrănh mâu lah ndơ nhêt geh ndrui. Bunuyh nây mâu dơi nhêt ôh dak krăk ƀâu mâu lah sa krăk ƀâu nse mâu lah krăk ƀâu kro jêh.

⁴ Tâm du bông dôl prăp êng, lơi sa ôh moh ndơ ƀư tă bơh tơm krăk ƀâu, nđâp ma găr ntil mâu lah ntâu.

⁵ Tâm du bông dôl păng ton ma Nasirit, păng mâu dơi poih ôh sŏk ta klơ bôk păng. Bunuyh nây mra prăp ăn ma kloh ueh jêh ri rong sŏk jong kŏ tât nôk păng lôch jêh mông nar prăp ma Brah Yêhôva.

⁶ Tâm dôl prăp êng ma Brah Yêhôva, păng mâu dơi hăn dăch ôh săk jăn khĭt.

⁷ Păng mâu dơi ƀư ƀơ̆ păng nơm yor mbơ̆ păng, mê̆ păng, oh nâu păng, mâu lah oh nur păng, tơlah khân păng khĭt; yorlah nau mbên prăp êng ma Brah Yêhôva ăt hôm gŭ ta klơ bôk păng.

⁸ Tâm du bông dôl ƀư nau ton Nasirit, păng prăp êng jêng kloh ueh ma Brah Yêhôva.

⁹ Tơlah geh du huê khĭt ndal êp kêng păng jêh ri ƀư ƀơ̆ bôk păng hŏ prăp êng jêh ăn kloh ueh, păng mra poih lơi sŏk tâm nar păng dơi ƀư kloh, jêng nar tal pơh.

¹⁰ Ta nar tal pham, păng mra djôt leo bar mlâm ntơp mâu lah bar mlâm plŭk kon ma kôranh ƀư brah ta mpông Ngih Bok Nau Tâm Rƀŭn.

¹¹ Kôranh ƀư brah mra nhhơr du mlâm jêng ndơ ƀư brah chuai nau tih, jêh ri du mlâm êng jêng ndơ ƀư brah gŭch gay chuai nau tih ma păng, yorlah săk jăn khĭt. Pônây tâm nar nây, păng mra prăp êng bôk păng ma nau kloh ueh.

¹² Păng prăp êng ma Brah Yêhôva tâm lĕ nar ƀư nau ton Nasirit tay jêh ri nhhơr du mlâm biăp nkuăng du năm jêng ndơ ƀư brah chuai nau ƀư tih, ƀiălah lĕ nar ơm mâu kơp ôh, yorlah nau păng prăp ăn păng nơm jêng ƀơ̆ jêh.

¹³ Aơ nau vay ma bunuyh Nasirit, tơlah lĕ lôch jêh lĕ nar ma nau prăp êng: Bu mra njŭn leo păng ma mpông lăp Ngih Bok Nau Tâm Rƀŭn,

¹⁴ păng nhhơr hom ndơ ƀư brah ăn ma Brah Yêhôva, geh du mlâm biăp nkuăng du năm mâu geh têl khap ôh jêng ndơ ƀư brah gŭch, du mlâm biăp me du năm mâu geh têl khap ôh jêng ndơ ƀư brah chuai nau tih jêh ri du biăp nkuăng mâu geh têl khap jêng ndơ ƀư brah ma nau đăp mpăn,

¹⁵ du bĭ piăng let mâu geh ndrui, ƀănh rnih môi tâm pach đah dak ngi, piăng let n'hơ mâu geh ndrui pot dak ngi nđâp ma ndơ ƀư brah rnih môi jêh ri ndơ nhhơr nhêt.

¹⁶ Kôranh ƀư brah mra leo lĕ ndơ nhhơr nây tât tanăp Brah Yêhôva jêh ri nhhơr ndơ ƀư brah chuai nau tih nđâp ma ndơ ƀư brah gŭch.

¹⁷ Păng ăt nhhơr bĭ piăng let mâu geh ndrui nđâp lah du mlâm biăp nkuăng jêng ndơ ƀư brah ma nau đăp mpăn ndrel ma ndơ ƀư brah rnih môi jêh ri ndơ nhhơr nhêt đŏng.

¹⁸ Ta mpông Ngih Bok Nau Tâm Rƀŭn, bunuyh Nasirit mra poih sŏk ta klơ bôk hŏ prăp êng jêh ri chalơi sŏk nây tâm ŭnh dôl ŭnh hit tâm dâng ndơ ƀư brah ma nau đăp mpăn.

¹⁹ Jêh bunuyh Nasirit hŏ poih sŏk, kôranh ƀư brah mra dơm tâm bar mpang ti bunuyh nây du glo puăch nglik biăp nkuăng lĕ gâm sĭn jêh, jêh ri du piăng let mâu geh ndrui tă tâm bĭ jêh nây du piăng let n'hơ mâu geh ndrui.

²⁰ Jêh nây, kôranh ƀư brah nhhơr lĕ ndơ nây ma nau ryeng pa tê̆ ryeng pa djaơ tanăp Brah Yêhôva. Nây jêng du ndơ kloh ueh prăp ma kôranh ƀư brah, ndrel ma ntang ntơh nhhơr ma nau ryeng pa tê̆ ryeng pa djaơ jêh ri nglik nhhơr yơr leo klơ. Jêh nây bunuyh Nasirit dơi vay nhêt ndrănh.

²¹ Nây jêng nau vay ma bunuyh Nasirit hŏ ƀư jêh nau ton jêh ri ndơ ƀư brah păng mra nhhơr ăn ma Brah Yêhôva tĭng nâm nau ton, nđâp lah lĕ ndơ ƀư brah êng păng geh nau dơi nhhơr ntop. Ăn păng ƀư tĭng nau vay Nasirit păng nơm hŏ ƀư nau ton.’”

Ăn nau ueh uĭn

²² Brah Yêhôva lah ma Y-Môis:

²³ “Lah hom ma Y-Arôn jêh ri phung kon bu klâu păng pô aơ: ‘Khân may mra ăn nau ueh uĭn ma phung ƀon lan Israel kơt aơ:

²⁴ Dăn ma Brah Yêhôva ăn nau ueh uĭn ma may Jêh ri kâp kơl may!

²⁵ Dăn ma Brah Yêhôva nchrat ang muh măt Păng ma may Jêh ri ƀư nau yô̆ ma may!

²⁶ Dăn ma Brah Yêhôva mêt uănh ma may Jêh ri ăn nau đăp mpăn ma may!’

²⁷ Ăn khân păng dơm amoh Gâp ta klơ phung ƀon lan Israel, tâm ban pônây Gâp mra ăn nau ueh uĭn ma Phung ƀon lan aơ.”