Nau Kơp Bunuyh 4 - Nau Brah Ndu Ngơi 2023

Nau kan phung Lêvi tă bơh ndŭl mpôl Kôhat

¹ Brah Yêhôva lah ma Y-Môis jêh ri Y-Arôn:

² “Kơp hom phung kon bu klâu Y-Kôhat tâm phung kon bu klâu Lêvi tĭng nâm ndŭl mpôl jêh ri ndŭl mpôl khân păng,

³ ntơm bơh pe jât năm tât ma prăm jât năm, jêng lĕ rngôch phung dơi lăp tâm pah kan Ngih Bok Nau Tâm Rƀŭn.

⁴ Aơ jêng nau kan phung kon bu klâu Y-Kôhat tâm Ngih Bok Nau Tâm Rƀŭn: Khân păng mra djôt kan chiă uănh lĕ ndơ dŭt kloh ueh.

⁵ Tơlah rmlak tahan trơn ntŭk, Y-Arôn jêh ri phung kon bu klâu păng mra tât rơih lơi bok nching jêh ri nkŭm klơ Hip Nau Tâm Rnglăp,

⁶ jêh ri khân păng nkŭm klơ nây du blah ntâu ka toyh; tâm thoi, ling ntop du blah bok dak piâk, jêh nây nsro mâng tung lăp.

⁷ Khân păng ling đŏng du blah bok dak piâk ta klơ sưng piăng let nhhơr jêh ri dơm klơ sưng nây ngan jam, kachok, khăl toyh jêh ri glah dŏng ma ndơ nhhơr nhêt; bu dơm piăng let ta klơ sưng ƀaƀơ.

⁸ Khân păng nkŭm du blah bok sut chăng rhưch ta klơ lĕ ndơ nây, ling ntop du blah ntâu ka toyh, jêh nây nsro mâng tung lăp.

⁹ Ăn khân păng sŏk đŏng du blah bok dak piâk gay nkŭm jâng kađen, kađen, katrei nkăp ŭch kađen, ndơ dơm buh jêh ri lĕ yăng dak ngi ôlive gay mpoh ŭnh kađen.

¹⁰ Jêh nây khân păng mra dơm jâng kađen jêh ri lĕ rngôch ndơ dŏng tâm du blah ntâu ka toyh, dơm klơ nâr gay tung hăn.

¹¹ Ăn khân păng ling du blah bok dak piâk ta klơ nơng ƀư brah ma mah, jêh ri nkŭm ntop nây du blah ntâu ka toyh jêh nây nsro mâng tung lăp.

¹² Ăn khân păng ăt sŏk lĕ ndơ dŏng prăp ma kan dŏng tâm jêh ri nklâm tay tâm du blah bok dak piâk jêh nây nkŭm ta klơ du blah ntâu ka toyh, jêh nây dơm ta klơ nâr gay tung.

¹³ Ăn khân păng kuak lơi ŭnh buh ta klơ nơng ƀư brah jêh ri ling ta klơ nây du blah bok sut chăng,

¹⁴ jêh nây khân păng mra dơm ta klơ ndơ nây lĕ rngôch ndơ dŏng ma nơng ƀư brah nâm khăl gŭch ƀâu kah, n'hoi srang, ndroh, khăl nđâp lah lĕ ndơ dŏng tât ma nơng ƀư brah. Khân păng nkŭm đŏng ta klơ nơng ƀư brah du ntâu ka toyh jêh ri nsro mâng tung lăp.

¹⁵ Lah jêh Y-Arôn jêh ri phung kon bu klâu păng hŏ nkŭm jêh ntŭk kloh ueh jêh ri lĕ ndơ dŏng kloh ueh lôch jêh, jêh ri dôl phung ƀon lan ndrăp jêh hăn du luh, phung kon bu klâu Y-Kôhat văch hom tung lĕ ndơ dŏng, ƀiălah khân păng mâu dơi mpât ôh tât lĕ ndơ kloh ueh, klach lah khân păng mra khĭt. Nây jêng lĕ ndơ dŏng tâm Ngih Bok Nau Tâm Rƀŭn ma phung kon bu klâu Y-Kôhat mra tung hom.

¹⁶ Y-Êlêasar, kon bu klâu kôranh ƀư brah Y-Arôn, mra djôt kan chiă uănh dak ngi mpoh ŭnh kađen, ndơ ƀâu kah, ndơ ƀư brah rnih môi mro mrăng, dak ƀâu kah mhĭng, jêh ri lĕ Ngih Bok nđâp lah lĕ ndơ dŏng tâm păng, glom geh ntŭk kloh ueh jêh ri lĕ ndơ dŏng.”

¹⁷ Brah Yêhôva lah ma Y-Môis jêh ri Y-Arôn pô aơ:

¹⁸ “Lơi ăn ôh ndŭl mpôl Kôhat roh rai tă bơh ta nklang ndŭl mpôl Lêvi.

¹⁹ Aơ jêng nau khân may ƀư ma khân păng gay ma khân păng dơi gŭ rêh, mâu geh khĭt ôh tơlah khân păng hăn dăch lĕ ndơ dŭt kloh ueh: Y-Arôn jêh ri phung kon bu klâu păng mra lăp ntŭk kloh ueh, tâm pă nau kan ma ăp nơm jêh ri lĕ ndơ dŏng khân păng tung hom.

²⁰ Ƀiălah phung Kôhat mâu dơi uănh ôh lĕ ndơ kloh ueh, nđâp lah ƀât lât kđôi lĕ, klach lah khân păng mra khĭt.”

²¹ Brah Yêhôva lah tay ma Y-Môis:

²² “Kơp hom phung kon Y-Gersôn tĭng nâm ăp ndŭl mpôl jêh ri noi deh khân păng.

²³ Nchih hom amoh săk phung ntơm bơh pe jât năm tât ma prăm jât năm, jêng lĕ phung dơi lăp ƀư nau kan tâm Ngih Bok Nau Tâm Rƀŭn.

²⁴ Aơ jêng nau kan ndŭl mpôl Gersôn mra pah jêh ri ndơ khân păng ăn ƀư mâu lah tung:

²⁵ Khân păng mra tung lĕ bok nching Ngih Bok, jêh ri Ngih Bok Nau Tâm Rƀŭn, blah nkŭm padih ma ntâu ka toyh jêh ri bok nching ta mpông lăp tâm Ngih Bok Nau Tâm Rƀŭn,

²⁶ lĕ bok nching tâm ndring ngih jŭm Ngih Bok jêh ri nơng ƀư brah, bok nching ta bôk mpông lăp tâm ndring ngih, lĕ rse ndrăn jêh ri lĕ rngôch ndơ dŏng tâm nau pah kan.

²⁷ Lĕ rngôch kan phung kon sau Y-Gersôn, mâu lah tung, mâu lah ƀư moh nau kan ƀư hom tĭng nâm nau ntĭm njŭn Y-Arôn jêh ri phung kon bu klâu păng. Ăn khân may jao ma khân păng mât uănh lĕ rngôch ndơ dŏng khân păng mra tung.

²⁸ Nây jêng lĕ nau kan ma ndŭl mpôl Y-Gersôn tâm Ngih Bok Nau Tâm Rƀŭn. Nau kan khân păng gŭ tâm nau dơi chiă uănh Y-Ithamar, kon bu klâu kôranh ƀư brah Y-Arôn.

²⁹ Ăn may kơp phung kon bu klâu Y-Mêrari tĭng ăp ndŭl mpôl jêh ri noi deh khân păng,

³⁰ ntơm bơh pe jât năm tât ma prăm jât, jêng phung dơi lăp pah kan tâm Ngih Bok Nau Tâm Rƀŭn.

³¹ Aơ jêng lĕ nau kan khân păng tâm Ngih Bok Nau Tâm Rƀŭn: Ăn khân păng tung lĕ pŏk kađar Ngih Bok, lĕ njon rkăng, meh n'gâng, ndơl meh n'gâng,

³² lĕ meh n'gâng jŭm ndring ngih jêh ri ndơl meh n'gâng, mâng pêr, rse ndrăn, nđâp lah lĕ rngôch ndơ dŏng jêh ri lĕ ndơ dŏng êng. Khân may mra jao ma ăp nơm mât uănh ma lĕ ndơ tung.

³³ Nây jêng nau kan ma ndŭl mpôl Y-Mêrari ƀư hom tâm Ngih Bok Nau Tâm Rƀŭn tâm nau dơi chiă uănh Y-Ithamar, kon bu klâu kôranh ƀư brah Y-Arôn.”

³⁴ Pônây Y-Môis, Y-Arôn jêh ri phung kôranh chiă uănh nau kơp phung ƀon lan Y-Kôhat tĭng nâm ăp ndŭl mpôl jêh ri noi deh khân păng,

³⁵ ntơm bơh pe jât tât ma prăm jât năm, jêng lĕ rngôch phung dơi lăp pah kan tâm Ngih Bok Nau Tâm Rƀŭn.

³⁶ Rnoh bunuyh hŏ kơp dơi tĭng nâm ăp ndŭl mpôl jêng bar rbăn pơh rhiăng prăm jât nuyh.

³⁷ Nĕ jêng rnoh bunuyh tâm ndŭl mpôl Kôhat, jêng lĕ rngôch phung pah kan tâm Ngih Bok Nau Tâm Rƀŭn dơi Y-Môis jêh ri Y-Arôn hŏ kơp tĭng nâm nau vay Brah Yêhôva ntăm hŏ lah jêh ma Y-Môis.

³⁸ Phung kon sau Y-Gersôn hŏ kơp dơi tĭng nâm ăp ndŭl mpôl jêh ri noi deh khân păng,

³⁹ ntơm bơh pe jât tât ma prăm jât năm, jêng phung dơi lăp pah kan tâm Ngih Bok Nau Tâm Rƀŭn,

⁴⁰ lĕ rngôch jêng bar rbăn prao rhiăng pe jât nuyh.

⁴¹ Nĕ jêng phung kon sau tâm ndŭl mpôl Y-Gersôn, jêng lĕ rngôch phung pah kan tâm Ngih Bok Nau Tâm Rƀŭn dơi Y-Môis jêh ri Y-Arôn hŏ kơp jêh tĭng nâm nau ntăm Brah Yêhôva.

⁴² Rnoh kơp phung kon sau tâm ndŭl mpôl Y-Mêrari hŏ kơp dơi tĭng nâm ăp ndŭl mpôl, tĭng nâm noi deh khân păng,

⁴³ ntơm bơh pe jât tât ma prăm jât năm, jêng lĕ rngôch dơi lăp pah kan tâm Ngih Bok Nau Tâm Rƀŭn,

⁴⁴ lĕ rngôch jêng pe rbăn bar rhiăng nuyh.

⁴⁵ Nĕ jêng phung kon sau tâm lĕ ndŭl mpôl Y-Mêrari dơi Y-Môis jêh ri Y-Arôn hŏ kơp jêh tĭng nâm nau vay Brah Yêhôva ntăm hŏ ntăm jêh ma Y-Môis.

⁴⁶ Lĕ rngôch phung Lêvi dơi Y-Môis, Y-Arôn jêh ri phung kôranh chiă uănh Israel kơp jêh, tĭng nâm ăp rnăk vâl jêh ri noi deh khân păng,

⁴⁷ ntơm bơh pe jât tât ma prăm jât năm, jêng lĕ rngôch dơi lăp pah kan jêh ri tung ndơ dŏng tâm Ngih Bok Nau Tâm Rƀŭn,

⁴⁸ lĕ rngôch jêng pham rbăn prăm rhiăng pham jât nuyh.

⁴⁹ Bu kơp hung Lêvi tĭng nâm nau vay Brah Yêhôva ntăm hŏ ntăm jêh ma Y-Môis jêh ri tâm pă ma ăp nơm nau kan nđâp lah ndơ dŏng tung hom. Pônây bu hŏ kơp jêh khân păng tĭng nâm nau ntăm Brah Yêhôva hŏ ntăm jêh ma Y-Môis.