Nau Kơp Bunuyh 36 - Nau Brah Ndu Ngơi 2023

Drăp ndơn phung bu ur Y-Sêlôpêhat

¹ Phung kôranh ndŭl mpôl Gilêat jêng phung kon bu klâu Y-Makir, sau Y-Manasê, tâm noi deh Yôsep, hăn dăch tanăp Y-Môis jêh ri tanăp phung kôranh chiă uănh jêng phung kôranh ndŭl mpôl phung ƀon lan Israel jêh ri ngơi:

² “Brah Yêhôva ntĭnh ntăm ma kôranh gâp nchroh n'hôr gay tâm pă n'gor jêng drăp ndơn ma phung ƀon lan Israel jêh ri Brah Yêhôva ntĭnh jêh ma kôranh gâp jao drăp ndơn Y-Sêlôpêhat jêng nâu hên ma phung kon bu ur păng.

³ Tơlah phung bu ur gŭ sai đah du huê tâm phung kon bơh lĕ ndŭl mpôl êng êng tâm phung ƀon lan Israel, drăp ndơn khân păng mra sŏk tă bơh drăp ndơn phung chô yau hên jêh ri ntop drăp ndơn ma ndŭl mpôl phung bu ur nây gŭ sai jêh. Pôri bu mra sŏk ndơ nây tă bơh drăp ndơn hên.

⁴ Tât Năm Ueh Maak phung ƀon lan Israel, drăp ndơn khân păng mra ntop đŏng ma drăp ndơn ndŭl mpôl phung bu ur nây gŭ sai jêh. Tâm ban pônây, drăp ndơn khân păng bu mra sŏk tă bơh drăp ndơn ndŭl mpôl chô yau hên.”

⁵ Pôri, Y-Môis ngơi nau ntăm Brah Yêhôva ma phung ƀon lan Israel: “Kon sau ndŭl mpôl Yôsep lah geh nau găl.

⁶ Aơ jêng nau Brah Yêhôva hŏ ntăm jêh tât ma phung kon bu ur Y-Sêlôpêhat: ‘Khân păng ŭch gŭ sai đah mbu tĭng mĭn khân păng ŭch, ƀiălah knŏng dơi gŭ sai đah du tâm lĕ rnăk vâl ndŭl mpôl chô yau khân păng nơm.

⁷ Pônây, tâm phung ƀon lan Israel mâu geh drăp ndơn dơi jao tă bơh du ndŭl mpôl nây ma du ndŭl mpôl êng ôh, yorlah ăp nơm tâm phung ƀon lan Israel mra mât mray drăp ndơn prăp ma ndŭl mpôl chô yau păng nơm.

⁸ Ăp nơm kon bu ur ŭch dơi dơn du kô̆ drăp ndơn tâm lĕ ndŭl mpôl phung ƀon lan Israel, ăn bu ur nây gŭ sai jêh đah du huê tă bơh du tâm lĕ rnăk vâl ndŭl mpôl chô yau păng nơm. Pônây, ăp nơm tâm phung ƀon lan Israel dơi dơn kô̆ drăp ndơn chô yau păng nơm.

⁹ Pôri mâu geh du kô̆ drăp ndơn dơi jao ôh tă bơh ndŭl mpôl nây tât ma ndŭl mpôl êng, yorlah ăp ndŭl mpôl Israel mra mât mray drăp ndơn khân păng nơm.’”

¹⁰ Phung kon bu ur Y-Sêlôpêhat ƀư tĭng di nâm nau Brah Yêhôva ntĭnh ntăm jêh ma Y-Môis.

¹¹ Phung bu ur Y-Sêlôpêhat jêng H'Mahla, H'Tirsa, H'Hôgla, H'milka jêh ri H'Nôa gŭ sai jêh đah phung kon bu klâu kônh khân păng nơm.

¹² Khân păng gŭ sai đah phung bu klâu tâm lĕ ndŭl mpôl phung kon sau Y-Manasê jêng kon bu klâu Y-Yôsep; kô̆ drăp ndơn khân păng hôm e mât mray tay tâm ndŭl mpôl chô yau khân păng nơm.

¹³ Nây jêng nau vay ntăm jêh ri nau vay ƀư bơh Brah Yêhôva hŏ ntĭnh ma phung ƀon lan Israel găn Y-Môis ta neh lâng n'gor Môap, dăch dak krong Yurdan tâm tra đah ƀon Yêrikô.